Nafolo nafamanba b’an fɛ k’a tilan ni mɔgɔw ye

¹ Alako nafolo minw ka di an ye kosɔbɛ, u falen be Ala ka Kuma kɔnɔ (Zab. 12:7; 119:11, 14). Sababu tigitigi dɔ la, Yesu tɛmɛna ntalenw fɛ ka Ala ka Masaya cogoyaw ɲɛfɔ. O kɔ, a y’a ka kalandenw ɲininga ko: “Aw ye o kow bɛɛ faamu wa?” A ka kalandenw y’a jaabi ko ɔnhɔn tuma min na, a y’a fɔ u ye ko: “O cogo la sariya karamɔgɔ fɛn o fɛn kalannen bɛ sankolo masaya ko la, o bɔlen bɛ sotigi dɔ fɛ min bɛ fɛn kuraw ni fɛn kɔrɔw sɔrɔ ka bɔ a ka nafolo mara yɔrɔ la.”—Mat. 13:1-52.

² An ye tiɲɛnko minw lɔn tuma min na an y’a daminɛ ka Bibulu kalan, o be se ka jati i ko nafolo kɔrɔmanw. An kɛtɔ ka to ka Ala ka koo dunbaw kalan an ka kelenna kalan na, o y’a to an ye tiɲɛnko wɛrɛw sɔrɔ Bibulu kɔnɔ, o minw be jati i ko nafolo kura sɔrɔlenw (1 Kɔr. 2:7). “Jɔnkɛ dannamɔgɔ hakiliman” fana sababu fɛ, an sera ka Alako nafolo kuraw faamu.—Mat. 24:45.

³ An b’o Alako nafolo nunu jati fɛɛnbaw ye, a kɔrɔmanw fara kuramanw kan. O b’an lasun k’a ɲini ka fɔrɔmasɔn sɔrɔ, ka kɛ Ala ka Kuma karamɔgɔ kolɔnbagaw ye ani k’an tɛgɛ labila k’o tiɲɛn kalan nafamanba tilan ni mɔgɔw ye.

⁴ Yesu ka ɲɛyirali b’an kalan min na: Yesu tun b’o nafolow jati cogo min na, a y’o yira a kɛtɔ k’a jija sɔbɛ la k’u tilan ni mɔgɔw ye. Hali n’a tun sɛgɛnnen lo, a tun t’a dabila fewu ka nafolow bɔ a ka “jiginɛ kɔnɔ.”—Yuh. 4:6-14.

⁵ Mɔgɔ minw tun ye fantanw ye Alako ta fan fɛ, Yesu tun b’u kanu. O kama, Alako nafolo minw be ɲɛnamaya di mɔgɔ ma, a y’o tilan n’u ye (Zab. 72:13). Kɔngɔ tun be minw na Alako ta fan fɛ, olu hinɛ tun b’a la. O y’a lasun k’u “kalan fɛn caman na.”—Marka 6:34.

⁶ An ka Yesu ladegi: Alako nafolo minw b’an bolo n’an b’o jati fɛɛnbaw ye i ko Yesu, an bena kɔrɔtɔ ka sin k’o yira mɔgɔw la Bibulu yɛrɛ kɔnɔ (Ntal. 2:1-5). Hali n’a y’a sɔrɔ ko an sɛgɛnnen lo tuma dɔw la, an bena an dusu diya ka kuma Bibulu ka tiɲɛn kalanw koo la (Marka 6:34). Alako nafolo minw b’an fɛ, n’an b’o jati fɛɛnbaw ye, o bena an lasun k’an seko bɛɛ kɛ cidenya baara la ani k’a ɲini ka dɔ fara a kan hali bi.