An k’an yɛrɛ labɛn koɲuman Hakilijigi lajɛn kama

An minw ye Krista ka kalandenw ye, k’an yɛrɛ labɛn koɲuman saan o saan walisa k’an hakili jigi Yesu Krista ka saya koo la, o ye ninsɔndiya ni nɛɛma koo ye an fɛ dɛ! (Luka 22:19). An ka kan ka koo nafaman jumanw lo kɛ walisa k’an yɛrɛ labɛn Hakilijigi lajɛn kama?

◼ Lajɛn lɛri n’a kɛyɔrɔ: Hakilijigi lajɛn bena kɛ lɛri min na ani yɔrɔ min na, bɛɛ kelen-kelen ka kan k’o lɔn koɲuman. Ni kafo caaman ka lajɛn bena kɛ Masaya Boon kelen kɔnɔ, a kɔrɔtalen lo an ka na lɛri la ani an ka segi ka taga joona sabu wagati bɛrɛ ma labila lajɛn fila cɛ. A kɔrɔtalen lo ka koow labɛn koɲuman walisa mɔgɔw kana ɲɔgɔnw degun gwansan donda la, siradaw la, ani bolifɛnw lɔyɔrɔw la ni o dɔ be yen.

◼ Welelisɛbɛw: Yala weleweledalaw bɛɛ be n’u ka welelisɛbɛw ye ani u b’u kɔnɔna koow lɔn ka ɲɛ wa? Yala a’ ye o welelisɛbɛ yiracogo kɛ k’a filɛ wa? Aw bena jɔn lo weele? An ka kan k’an jija ka welelisɛbɛw bɛɛ di mɔgɔw ma.

◼ Taransipɔriko: N’a sɔrɔ makodon mɔgɔ ani balima dɔw mako be taransipɔriko wala dɛmɛ wɛrɛ la. Labɛn jumanw lo kɛra walisa k’u dɛmɛ u ka na Hakilijigi lajɛn na?

◼ Tagamasiɲɛw: A’ ye aw janto ko tagamasiɲɛw tɛna tɛmɛ ni tile ma ben fɔlɔ. Ni mɔlen dɔ ye namara ye, ani a tɛ se ka na lajɛn na, labɛn ka kan ka kɛ walisa ka tagamasiɲɛw lase a ma. Buru ni diwɛn minw dagalen lo, u ka kan ka labɛn ka bila.—A filɛ saan 2003 ka La Tour de Garde ɲɛɛ 14 § 14 kɔnɔ, feburukalo tile 15nan ta.

◼ Masaya Boon: Lajɛn kɛyɔrɔ ka kan ka saniya koɲuman ka kɔn wagati ɲɛ. Tasaw, vɛriw, tabali ɲuman ani tabali fani ka kan ka kɔn ka labɛn. Ni yɔrɔ wɛrɛ sugandira Hakilijigi lajɛn kama, a’ ye aw janto ko sono ɲɛnaman bena kɛ yen walisa bɛɛ ka se ka kalankɛla lamɛn koɲuman. A’ ye kɔn ka mɔgɔ kunbɛnbagaw ani tagamasiɲɛw latɛmɛbagaw sugandi, k’u ka baaraw ni koow kɛcogo ɲuman yira u la. U ka fani doncogo n’u kuun masiricogo ka kan ka bɛn.

Nin koo kɔrɔtalenba wagati la min ye Yesu Krista ka saya Hakilijigi ye, an kelen-kelen bɛɛ ani kafo bɛɛ ka kan ka labɛn koɲuman. Jehova tɛmɛna a Dencɛ kanulen Yesu Krista ka saraka fɛ ka koo minw bɛɛ kɛ hadamadenw ye, minw bɛɛ be u ka waleɲumanlɔn sɔbɛ yira a la o kosɔn, siga t’a la olu bena Jehova ka duga sɔrɔ caaman.