Krista saya Hakilijigi wagati: Sababu lo ka dɔ fara an ka waajuli baara kan!

1. Sababu jumanw b’an fɛ k’a filɛ n’an be se ka dɔ fara an ka waajuli baara kan marisi, awirili ani mɛkalo la?

¹ Yala i be se ka dɔ fara i ka waajuli baara kan Krista saya Hakilijigi wagati nata la wa? Weleweledala dɔw bena kɔnze sɔrɔ ani u be se k’o wagati ta ka waajuli kɛ. K’a ta awirili tile 2nan ma, an bena kanpaɲi kɛrɛnkɛrɛnnin dɔ kɛ ka makodon mɔgɔw weele u ka na Hakilijigi lajɛn kɛ n’an ye awirili tile 17nan loon. O kɔ, mɔgɔ minw sɔnna ka na, an bena an jija k’u dɛmɛ ani k’u weele u ka na forobakalan kɛrɛnkɛrɛnnin lamɛn min bena di awirili tile 25nan lɔgɔkun kɔnɔ. Tiɲɛn na, sababu caaman b’an fɛ k’a filɛ n’an be se ka dɔ fara an ka waajuli baara kan marisi, awirili ani mɛkalo la.

2. Sababu ɲuman juman be se k’an dɛmɛ ka dɔ fara an ka waajuli baara kan?

² Piyɔniye kɔrɔsigi baara: Piyɔniye kɔrɔsigi baara be sababu ɲuman di an ma ka dɔ fara an ka waajuli baara kan. Komi an bɛɛ bolo degunnen lo, o kama an ka kan ka kɔn k’an yɛrɛ labɛn ani ka yɛlɛmani dɔw kɛ an ka porogramu na (Ntal. 21:5). Baara minw tɛ waajibiko ye i fɛ loon o loon, n’a sɔrɔ i be se k’olu dɔw bila wagati wɛrɛ la (Fil. 1:9-11). Mun na i t’a fɔ kafoden dɔw ye ko ele b’a fɛ ka kɛ piyɔniye kɔrɔsigi ye? O la, i bena se k’a lɔn n’olu fana be se ka fara i kan.

3. Denbaya mɔgɔw be se ka mun lo kɛ walisa ka dɔ fara u ka cidenya baara kan?

³ Aw ka gwa kɔnɔ batoli nata wagati la sufɛ, a ka ɲi aw ka baro kɛ k’a filɛ denbaya be se ka laɲinita minw latigɛ (Ntal. 15:22). Ni gwamɔgɔw be ɲɔgɔn dɛmɛ baaraw la, u la dɔw be se ka kɛ piyɔniye kɔrɔsigi ye kalo kelen kɔni na. Nka, ni aw y’a ye k’o tɛ se ka kɛ do? Denbaya mɔgɔw bele be se ka labɛn kɛ walisa ka dɔ fara u ka cidenya baara kan loon dɔw wulafɛ wala wikɛniw na.

4. N’an ye dɔ fara an ka waajuli baara kan Krista saya Hakilijigi wagati la ɲinan, an bena duga jumanw lo sɔrɔ?

⁴ An be koo o koo kɛ Jehova ye, a b’a janto o la ani an b’an yɛrɛ saraka koo minw na o ka di a ye (Heb. 6:10). Ka Jehova n’an mɔgɔɲɔgɔnw sɔn, ninsɔndiya be sɔrɔ o la (1 Til. Kib. 29:9; Kɛw. 20:35). Yala i be se ka dɔ fara i ka waajuli baara kan Krista saya Hakilijigi wagati la ɲinan wa? Ɲagaliba ni dugaba minw be bɔ o la, i bena u sɔrɔ.