An ka cidenya baara tɛ ɲɛ muɲuli kɔ
1. Jehova y’a yira cogo di ko a muɲunin lo hadamadenw kɔrɔ?
1 Ala ye muɲuliba kɛ hadamadenw kɔrɔ (Ekis. 34:6; Zab. 106:41-45; 2 Piɛrɛ 3:9). Masaya waajuli baara min be kɛra duniɲa kuru bɛɛ kɔnɔ, o ye a ka muɲuli kɛcogo kabakoman dɔ ye a be min kɛ ni kanuya ye. Jehova muɲuna hadamadenw kɔrɔ fɔɔ saan 2000 ɲɔgɔn kɔnɔ. Nka, a bele be mɔgɔ kɔnɔgwɛw sama ka na a yɛrɛ fɛ (Yuh. 6:44). An be se ka Jehova ka muɲuli kɛcogo ladegi cogo di an ka cidenya baara la?
2. An be se k’a yira cogo di ko an be muɲuli kɛ an ka kiinmɔgɔw kɔrɔ?
2 Soo ni soo waajuli baara la: An be Jehova ka muɲuli kɛcogo ladegi n’an tɛ waajuli “dabila” kiinw kɔnɔ yɔrɔ minw na mɔgɔw ma u mako don fɔlɔ (Kɛw. 5:42). Ni mɔgɔw t’u mako don, n’u be yɛlɛ an na ani n’u b’an kɛlɛ an ka cidenya baara kosɔn, an b’o koow muɲu (Marka 13:12, 13). An fana b’a yira ko an be muɲuli kɛ n’an b’an jija ka kɔsegi ka taga makodon mɔgɔw dɛmɛ hali n’u sɔrɔ man di u ka soo.
3. Mun na viziti kuraw ni bibulukalanw tɛ ɲɛ muɲuli kɔ?
3 Bibulukalanw: Walisa yiri ka falen ani ka bonya fɔɔ an ka muɲu a kɔrɔ. An be se ka jii ni nɔgɔ don a kɔrɔ, nka an tɛ se k’a karaba a ka bonya (Yak. 5:7). O cogo kelen na, Alako ta fan fɛ, mɔgɔ be ɲɛtaga kɛ dɔɔni dɔɔni le (Marka 4:28). An ka Bibulu kalandenw be se k’a jati ko a ka gwɛlɛ u fɛ ka ban ngalon lannakow la wala landakow la minw bɛnnin tɛ Bibulu ka fɔta ma. An man kan k’a gwan u kun ko u ka yɛlɛmani dɔw kɛ walisa u ka se ka taga ɲɛ joona joona. An ka kan ka muɲu kalanden kɔrɔ wagati dɔ kɔnɔ walisa Ala ka hakili senu ka se ka baara kɛ a dusukun na.—1 Kɔr. 3:6, 7.
4. Muɲuli be se k’an dɛmɛ cogo di ka seereya kɛ bɛrɛbɛrɛ an somɔgɔ dannabaliw ye?
4 An somɔgɔ dannabaliw: Hali n’an b’a fɛ sɔbɛ la ko an somɔgɔ dannabaliw ka tiɲɛn lɔn, an b’a yira ko an be muɲu u kɔrɔ n’an be wagati bɛnnin makɔnɔ ka sɔrɔ k’an ka limaniya kofɔ u ye. An k’an janto an kana u tulo gwan kojugu ni kunnafoni caaman ye (Waaj. 3:1, 7). Nka, an k’a to an ka kɛwalew k’a yira an kɛra mɔgɔ sugu min ye tiɲɛn sababu la. An fana labɛnnin ka sɔrɔ k’an ka limaniya kofɔ u ye, nka an k’o kɛ ni majigilenya ni bonyaba ye (1 Piɛrɛ 3:1, 15). Tiɲɛn na, n’an b’an ka cidenya baara kɛ ni muɲuli ye, nafa bɛrɛbɛrɛ bena sɔrɔ a la ani a bena diya an sankolola Faa ye.