Aw “ka makari mɔgɔ tɔɔrɔlenw na”
1. Mɔgɔw makoya gwɛlɛ be mun lo la bi?
1 Bi ka tɛmɛ sanga ni wagati bɛɛ kan, mɔgɔ caaman makoya gwɛlɛ b’a la dɔ ka makari u la k’u dɛmɛ. Duniɲa ka koow be nagasira ka taga. O kama mɔgɔw tɛ hɛɛrɛ la, u hakili ɲagaminin lo ani u jigi tigɛnin lo. Mɔgɔ miliyɔn caaman mako be dɛmɛ na. An minw ye kerecɛnw ye, see b’an ye k’an mako don an sigiɲɔgɔnw na sɔbɛ la (Mat. 22:39; Gal. 6:10). An be se k’o yira cogo di?
2. Fɛɛrɛ fisaman juman lo b’an fɛ k’a yira ko an be makari mɔgɔw la?
2 Makari be yira baara min fɛ: Tiɲɛn na, Ala kelenpe lo be se ka mɔgɔw dusu saalo sɔbɛ la ani o b’u nafa fɔɔ abada (2 Kɔr. 1:3, 4). Jehova b’an jija ko an k’ale ladegi “ka makari mɔgɔ tɔɔrɔlenw na.” A ye cii di an ma fana ko an ka taga Masaya kibaro duman fɔ an sigiɲɔgɔnw ye (1 Piɛrɛ 3:8). N’an b’an seko bɛɛ kɛ o baara la, o ye fɛɛrɛ fisaman ye an fɛ ka “mɔgɔ jigitigɛlɛnw” dusu saalo, sabu Ala ka Masaya kelenpe lo be se ka mɔgɔ tɔɔrɔlenw jigi tugu sɔbɛ la (Es. 61:1). Komi Jehova be makari a ka mɔgɔw la, yanni dɔɔni a bena juguya bɛɛ ban ani ka duniɲa kura tilennin sigi.—2 Piɛrɛ 3:13.
3. An be se ka Yesu ladegi cogo di?
3 An ka Yesu ladegi: Hali ni Yesu tun be mɔgɔw waaju u jɛnkululaman, a tun b’a janto u kelen kelen na fana. Alako nege tun be minw na a tun b’olu kɔrɔsi. U tun be i ko sagaw, dɛndɛbaga tɛ minw na. Yesu ye koo minw ye, o ye mɔgɔw hinɛ don a la ani o y’a lasun k’u kalan ni muɲuli ye (Marka 6:34). N’an be mɔgɔw jati i ko Yesu tun b’a kɛ cogo min na, o bena an lasun an ka makari u kelen kelen na ni kɔnɔgwɛ ye. O bena ye an kumacogo n’an ɲɛda cogo fɛ. Ka fara o kan, an bena waajuli kɛ an ɲɛnako fɔlɔ ye ani k’an ka kumaw yɛlɛma ka kɛɲɛ n’an lamɛnbagaw kelen kelen bɛɛ ka makoyaw ye.—1 Kɔr. 9:19-23.
4. Mun na an ka kan ka makari mɔgɔw la?
4 Siyaw bɛɛ la, jamakuluba be sɔnna Masaya kibaro la. Ani, an b’an mako don u la cogo min na, o fana b’u dusu saalo. N’an be to ka makari mɔgɔw la, an bena an ka Ala, hinɛtigi Jehova bonya ani an bena a dusu diya.—Kol. 3:12.