Jehova be fɔrɔmasɔn dira an ma a ka baara kama

1. Jehova mana baara kalifa adamadenw ma, a be mun lo kɛ fana?

¹ Jehova mana baara kalifa adamadenw ma, u mako be dɛmɛ min na, a b’o di u ma fana. Ɲɛyirali fɛ, Jehova tun y’a ɲini Nuhun fɛ ko a ka kurun dɔ dilan. Nuhun tun m’o baara kɛ ka ye. Nka, Jehova y’o kurun dilancogo yira a la (Jen. 6:14-16). Musa tun ye sagadɛndɛla ye min majiginin lo. Tuma min na Jehova y’a ci Israɛl cɛkɔrɔbaw ni Faraon fɛ, a y’a jigi sigi ko: “Ne na i da dɛmɛ ka i kalan i ka fɔta la.” (Ekis. 4:12) Min ye an ka waajuli baara fana koo ye, Jehova m’an to an yɛrɛ ma. A be tɛmɛna Ala ka Mara cidenyabaara lakɔli ani waajuliko lajɛnw fɛ ka fɔrɔmasɔn di an ma o baara kama. An be se ka nafa sɔrɔ o fɔrɔmasɔn na cogo di?

2. I be se ka nafa sɔrɔ cogo di Ala ka Mara cidenyabaara lakɔli la?

² Ala ka Mara cidenyabaara lakɔli: Sanni i ka taga lajɛn kelen kelen bɛɛ la, i ka kalanw lajɛ fɔlɔ. O kɔ, a kɔrɔsi kalandenw b’u ka kalanw walawala cogo min na. O bena i dɛmɛ i ka mɔgɔw kalancogo fisaya (Ntal. 27:17). Taga n’i ka gafe École du ministère ye lajɛn na ani i k’i ka degelibaara kɛ a kɔnɔ. Lakɔliden kelen kelen bɛɛ ka kalan banni kɔ, lakɔli kɔrɔsibaga b’o gafe yɔrɔ dɔw ɲɛfɔ. E b’a fɛ ka baara kɛ ni hakilinata jɔnjɔn minw ye, i k’olu kɔrɔci, ani i ka miiriyaw sɛbɛ i ka gafe dafɛlaw kan. Nka i be se ka nafa bɛrɛbɛrɛ sɔrɔ o lakɔli la cogo min na, o ye k’i niin don a la. Yala i tɔgɔ sɛbɛra o lakɔli la wa? Ni kalan kɛta dira i ma, i k’i yɛrɛ labɛn ka ɲɛ. Ladiliw mana di i ma, i k’u sira tagama. I ye fɔrɔmasɔn min sɔrɔ, baara kɛ n’o ye waajuli la.

3. An be se ka nafa sɔrɔ cogo di waajuliko lajɛn na?

³ Waajuliko lajɛn: An k’o lajɛn ka kalanw lajɛ ani k’an yɛrɛ labɛn lakalitaw kama. O la, ladili minw be di o lajɛn na, u bena to an hakili la. N’an be lakalitaw kɛ ka surunya, mɔgɔ caaman bena se ka lakalita kɛ fana. Ɲɛyiraliw kɛcogo kɔrɔsi ka ɲɛ. N’i y’a ye ko ladili fɛɛn o fɛɛn bena i dɛmɛ ka waajuli kɛcogo fisaya, baara kɛ n’a ye. An ka Masaya Cidenyabaara ka barokun minw be se k’i dɛmɛ waajuli la, i k’olu bila i bolo kɔrɔ.

4. Mun na an mako b’a la Jehova ka fɔrɔmasɔn di an ma?

⁴ Cii min tun kalifara Nuhun ni Musa ma, a tun man nɔgɔ. Cii min dira an ma ka kibaro diiman waajuli kɛ duniɲa kuru bɛɛ kɔnɔ, o fana tɛ kɔlɔkɔlɔko ye (Mat. 24:14). Nka an bena se k’a dafa n’an b’an jigi la an Karamɔgɔba Jehova kan. A be fɔrɔmasɔn min di an ma, an ka baara ɲuman kɛ n’o ye fana.—Es. 30:20.