Krista saya Hakilijigi wagati la, yala i bena Jehova ni Yezu ka kisɛya ladegi wa?

1. Hakilijigi wagati la, mun na Jehova Seerew be jijaliba kɛ?

¹ Jehova b’a sago dafa ni kisɛya ye. Ala ka Masaya bena na ni duga minw ye, Ezayi 9:6 b’a fɔ o koo la ko: “Masaba, Setigi bena o kɛ bari a jijanin lo o kama.” O cogo kelen na, Yezu ka cidenya baara wagati la dugukolo kan, a y’a yira ko a kisɛyanin lo tiɲɛn batoli koo la (Zan 2:13-17; 4:34). Duniɲa kuru bɛɛ kɔnɔ, saan o saan Hakilijigi wagati la, weleweledala miliyɔn caaman be jijaliba kɛ walisa ka Jehova ni Yezu ka kisɛya ladegi. U b’o kɛ, u kɛtɔ ka dɔ fara u ka waajuli baara kan. Yala i bena kɛ olu dɔ ye wa?

2. K’a ta marisi tile 7nan ma, kisɛya bena an lasun ka mun lo kɛ?

² Hakilijigi lajɛn kanpaɲi: Ɲinan, Hakilijigi lajɛn kanpaɲi bena daminɛ samedilon, marisi tile 7nan na. I yɛrɛ labɛn kabini sisan walisa ka se ka waajuli kɛ ni kisɛya ye. An kɛtɔ k’an seko kɛ walisa k’an ka kiin caaman boliboli, o bena kɛ ɲagaliba ye kafow kɔnɔ. I jija sɔbɛ la ka welelisɛbɛ dɔ di i ka kalandenw, viziti kuraw, baarakɛɲɔgɔnw, somɔgɔw ani lakɔli filankuruw ma. I be se ka tɛmɛ jw.org fɛ fana k’u weele ka na.

3. Cogo juman na an be se ka caaman kɛ waajuli la marisi ni awirili kalow la?

³ Piyɔniye kɔrɔsigi: Kisɛya bena an lasun fana ka caaman kɛ waajuli la. Siga t’a la, mɔgɔ caaman bena se ka kɛ piyɔniye kɔrɔsigiw ye marisi ni awirili kalow la sabu an bena se k’a sugandi ka lɛri 30 kɛ. Gwa kɔnɔ batoli tuma na wala kelenna kalan tuma na, i ka delili kɛ o koo la ani i ka miiri k’a filɛ i be se k’o kɛ cogo min na (Talenw 15:22). N’i dusu diyanin lo k’i sendon kanpaɲi na, o bena i balimaw lasun u ka kisɛya waajuli la. N’i ye yɛlɛmani dɔw kɛ walisa ka caaman kɛ waajuli la, i bena a yira ko i be Yezu ka kisɛya ladegira.—Mariki 6:31-34.

4. N’an be Jehova ni Yezu ka kisɛya ladegi, duga jumanw lo bena sɔrɔ o la?

⁴ N’an ye Jehova ni Yezu ka kisɛya ladegi Hakilijigi wagati la, an bena duga caaman sɔrɔ. An bena se ka seereya kɛ mɔgɔ caaman ye an ka kiinw kɔnɔ. N’an be baara kɛ Jehova ye ani ka tɔɔw dɛmɛ ni kisɛya ye, o bena an ninsɔndiya ani k’an wasa (Kɛw. 20:35). Min yɛrɛ kɔrɔtanin lo, o ye ko an koo bena diya an ka Ala n’a Dencɛ ye, olu minw be baara kɛ ni kisɛya ye.