Baara kɛcogo ni barokɛcogo modɛliw ye

Kabi saan 2018 zanwiyekalo la, barokɛcogo modɛliw be sɔrɔ Kerecɛnw ka ɲɛnamaya n’u ka waajuli baara: Lajɛnsɛbɛ ɲɛɛ fɔlɔ kan. An be se ka baara kɛ n’u ye cogo di?

N’i ka ɲi ka kalan dɔ kɛ lajɛn na: Ɲiningali, vɛrise ani ɲiningali minw labɛnna viziti kura kama, i ka ɲi ka baara kɛ n’u ye. Nka, o kɔrɔ tɛ ko min fɔra barokɛcogo modɛli ka videwo kɔnɔ, i ka ɲi k’o lo fɔ tigitigi. Waajuli bena kɛ koo min sen fɛ, i bena baro dadon ani ka hakilijagabɔ kɛ cogo min na, o be se ka kɛ dan na ni videwo ta ye. I be se k’an ka kalankɛ gafe dɔ di a tigi ma hali n’o ma fɔ an ka lajɛnsɛbɛ kɔnɔ.

N’i be waajuli la: Barokɛcogo modɛliw labɛnna walisa k’an dɛmɛ ka kɛ ni hakilinata ɲumanw ye waajuli kama. Ni mɔgɔ dɔ y’a mako don i ka kumaw na ani a b’a fɛ ka dɔ lɔn tugun, i be se ka taga ɲɛ ni baro ye. N’a sɔrɔ i be se k’o kɛ i kɛtɔ ka baara kɛ ni barokɛcogo modɛli yɔrɔ nin ye: “Viziti kura.” I be se ka barokɛcogo modɛli kɔnɔnakumaw yɛlɛma dɔɔni wala i yɛrɛ be se k’u yɛlɛma pewu. Yala barokun wala vɛrise dɔ be sɔrɔ kalo tɛmɛnin dɔ ka lajɛnsɛbɛ kɔnɔ min ka teli ka mɔgɔw dusukun sɔrɔ i ka kiin kɔnɔ wa? Yala koo dɔ be kɛra i sigida la wala kibaruya dɔ be yen kiinmɔgɔw ka teli k’u mako don min na wa? I mana a latigɛ ka baara kɛ ni barokɛcogo modɛliw ye cogo min na, i ka laɲinita ka ɲi ka kɛ min ye, o ye ka koo “bɛɛ kɛ kibaru diman kosɔn” walisa k’o kofɔ mɔgɔw ye.—1 Kor. 9:22, 23.