An b’an Faa Jehova kanu kosɔbɛ

1-2. Mun na Jehova ye sababu di an ma an ka kɛ a ka denbayamɔgɔ dɔw ye ani a y’o kɛ cogo di?

JEHOVA y’an weele ka kɛ a ka denbayamɔgɔ dɔw ye. O ye nɛɛmaba yɛrɛ lo ye! Mɔgɔ minw y’u yɛrɛkun di Ala ma ani u lanin b’a Dencɛ ka kunmabɔ saraka la, olu lo b’o denbaya kɔnɔ. An be hɛɛrɛ la o denbaya kɔnɔ. Kabi sisan yɛrɛ, kuun b’an ka ɲɛnamaya la ani an ninsɔn ka di sabu an jigi b’a la ka ɲɛnamaya banbali kɛ sankolo la wala alijɛnɛ kɔnɔ, dugukolo kan.

² Jehova ye sarakaba dɔ kɛ walisa ka sababu di an ma an ka kɛ a ka denbayamɔgɔ dɔw ye. A y’o kɛ sabu a b’an kanu kosɔbɛ (Zan 3:16). A y’an “kunmabɔ” Yezu ka kunmabɔsara sababu la (1 Kor. 6:20). O cogo la, a ye sababu di an ma ka jɛnɲɔgɔnya ɲuman kɛ n’ale ye. Jehova lo ye duniɲa kuru bɛɛ Masaba ye. Nɛɛmaba lo an fɛ k’a weele ko an Faa. I ko an y’a ye barokun tɛmɛnin na cogo min na, Jehova ye Faa ye min ɲɔgɔn tɛ yen.

3. An be se k’an yɛrɛ ɲininga mun ni mun lo la? (Koorilen nin lajɛ fana: “Jehova b’a mako don ne la wa?”)

³ I ko Bibulu sɛbɛbaga dɔ, an be se k’an yɛrɛ ɲininga ko: “Masaba ye koɲuman minw bɛɛ kɛ ne ye, ne bena se ka mun le kɛ a ye o kosɔn?” (Zab. 116:12). An sankolola Faa ye koo ɲuman minw kɛ an ye, an tɛ se k’a sara o kosɔn. Nka, a ka kanuya b’an lasun k’a kanu. Ciden Zan y’a sɛbɛ ko: “Kanuya b’an na, bari Ala le kɔnna k’an kanu.” (1 Zan 4:19). An be se k’a yira an sankolola Faa la cogo di ko an b’a kanu?

I MAGWƐRƐNIN KA TO JEHOVA LA

4. Ka kɛɲɛ ni Zaki 4:8 ye, mun na an ka ɲi k’an jija k’an magwɛrɛ Jehova la?

⁴ Jehova b’a fɛ an k’an magwɛrɛ ale la ani an ka kumaɲɔgɔnya kɛ n’ale ye (Zaki 4:8 kalan). A ko an k’an “jija [k’ale] daali.” A labilanin lo fana k’an lamɛn tuma bɛɛ ani a tɛ sɛgɛn k’o kɛ (Ɔrɔm. 12:12). An fana be Jehova lamɛn n’an b’a ka Kuma kalan ani n’an be sɛbɛ wɛrɛw kalan minw b’an dɛmɛ k’a ka Kuma faamu. An b’a lamɛn fana n’an be mɛnni kɛ koɲuman lajɛnw na. Ni denmisɛnw be kumaɲɔgɔnya kɛ n’u bangebagaw ye koɲuman, u magwɛrɛnin be to u la. N’an fana be to ka kumaɲɔgɔnya kɛ ni Jehova ye, an magwɛrɛnin bena to a la.

5. An be se k’an ka deliliw cogoya fisaya cogo di?

⁵ Miiri k’a filɛ i ka deliliw be cogo min na. Jehova b’a fɛ an k’an dusukunnakow bɛɛ fɔ ale ye delili la (Zab. 62:9). A ka ɲi an k’an yɛrɛ ɲininga ko: “Yala n’ ka teli ka delili kɛ sanfɛ sanfɛ ani n’ be segi kuma kelen kelen nunu lo kan wa? Wala n’ be delili kɛ ni n’ dusu bɛɛ ye?” Siga t’a la, i be Jehova kanu kosɔbɛ ani i b’a fɛ aw ka jɛnɲɔgɔnya sabatinin ka to. Walisa o ka kɛ, i ka ɲi ka kumaɲɔgɔnya kɛ n’a ye tuma o tuma. I dusukunnakow fɔ a ye, o kɔrɔ i ka ninsɔndiyakow ani i ka dusukasikow. La a la ko i be se ka dɛmɛ ɲini a fɛ.

6. An ka ɲi ka mun lo kɛ walisa an magwɛrɛnin ka to an sankolola Faa la?

⁶ Walisa an magwɛrɛnin ka to an sankolola Faa la, an ka ɲi k’a waleɲuman lɔn tuma bɛɛ. An be ni Zaburu sɛbɛbaga dɔ ka miiriya ɲɔgɔn ye. Ale y’a sɛbɛ ko: “U cayara Masaba ne ka Ala, i ka kabako n’i ka kolatigɛninw cayara an faan fɛ. Foyi te ele bɔ. Ne b’a fɛ k’u koo fɔ, nga ne te se, bari u cayara kojugu, n te se k’u bɛɛ koo fɔ.” (Zab. 40:6). An tɛ Ala waleɲuman lɔn an kɔnɔ dɔrɔn. An b’a yira an ka kumaw n’an ka kɛwalew fana fɛ ko an b’a waleɲuman lɔn. O b’a yira ko an be dan na mɔgɔw fanba la bi. U fanba tɛ Ala waleɲuman lɔn a ka ɲumanya kosɔn. Fɛɛn minw b’a yira ko an be “laban tuma” na, o dɔ ye ko mɔgɔw ye ɲumanlɔnbaliw ye (2 Tim. 3:1, 2). An t’a fɛ k’u ladegi fewu!

7. Jehova be mun lo ɲini an fɛ ani mun na do?

⁷ Bangebagaw t’a fɛ u deenw ka to ka kɛlɛ, nka u b’a fɛ u ka kɛ teriw ye. O cogo kelen na, Jehova b’a fɛ a deenw bɛɛ ka kɛ teriw ye. An be ni kanuya min ye an ni ɲɔgɔn cɛ, o b’a yira ko an ye kerecɛn sɔbɛw ye (Zan 13:35). An be ni Zaburu sɛbɛbaga dɔ ka miiriya ɲɔgɔn ye. Ale y’a sɛbɛ ko: “Tiɲɛ na, balimaw ka to ɲɔgɔn fɛ, o ka ɲi, o ka di.” (Zab. 133:1). N’an b’an balimaw kanu, an b’a yira Jehova la ko an b’a kanu (1 Zan 4:20). An ninsɔn ka di ka kɛ denbaya dɔ kɔnɔ o min na balimaw be “hinɛ ɲɔgɔn na ka koɲuman kɛ ɲɔgɔn ye”!​—Efɛz. 4:32.

A YIRA KO I BE JEHOVA KANU I KƐTƆ KA MƐNNI KƐ A FƐ

8. Ka kɛɲɛ ni 1 Zan 5:3 ye, kuun jɔnjɔn juman lo kama an be mɛnni kɛ Jehova fɛ?

⁸ Jehova b’a ɲini denmisɛnw fɛ u ka mɛnni kɛ u bangebagaw fɛ. Ani a b’a ɲini an fɛ an ka mɛnni kɛ ale fɛ (Efɛz. 6:1). Ale lo y’an Danbaga ye ani an mako be min na walisa ka to niin na, a b’o di an ma. A ka hakilitigiya ɲɔgɔn tɛ yen fana. O koow bɛɛ kama an ka ɲi ka mɛnni kɛ a fɛ. Nka, kuun jɔnjɔn min kama an be mɛnni kɛ a fɛ, o ye ko an b’a kanu (1 Zan 5:3 kalan). Hali n’an ka ɲi ka mɛnni kɛ a fɛ kuun caaman kosɔn, a t’an waajibiya k’o kɛ. A ye see di an ma an ka koow latigɛ an yɛrɛ ma. O kama, n’an be mɛnni kɛ a fɛ sabu an b’a kanu, o b’a ninsɔn diya.

9-10. Mun na a kɔrɔtanin lo an ka Ala ka sariyaw lɔn ani k’u labato?

⁹ Bangebagaw b’a fɛ k’u deenw latanga. O kama, u be sariyaw sigi u deenw nafa kosɔn. Ni deenw b’o sariyaw labato, u b’a yira k’u lanin b’u bangebagaw la ani k’u b’u bonya. A kɔrɔtanin lo kosɔbɛ an k’an sankolola Faa ka sariyaw lɔn ani k’u labato. N’an b’o kɛ, an b’a yira ko an b’a kanu ani ko an b’a bonya. O b’an nafa fana (Ezayi 48:17, 18). Nka, minw be ban ka Jehova ka sariyaw labato, olu be tɔɔrɔ la u yɛrɛ kan.​—Gal. 6:7, 8.

¹⁰ N’an be koow kɛ i ko Jehova b’a fɛ cogo min na, o b’an tanga tɔɔrɔw ma farisogo, dusukunnakow ani Alako ta fan fɛ. Jehova b’a lɔn min ka fisa an ma. Aurora be Etazini ani a ko: “N’ lanin b’a la ko n’an be mɛnni kɛ Jehova fɛ, an bena ɲɛnamaya kɛ cogo fisaman na.” O ye wulibali ye. Jehova b’an ɲɛminɛ ni kanuya ye. Miiri k’a filɛ i ye duga minw sɔrɔ i kɛtɔ ka mɛnni kɛ a fɛ!

11. Delili b’an dɛmɛ cogo di?

¹¹ Delili b’an dɛmɛ ka mɛnni kɛ Jehova fɛ hali n’o man nɔgɔ tuma dɔw la. Tuma dɔw la, a man nɔgɔ ka mɛnni kɛ Jehova fɛ sabu an ye dafabaliw ye. Nka, an ka ɲi k’an jija kosɔbɛ k’o kɛ. Zaburu sɛbɛbaga dɔ ye Ala deli ko: “Hakilitigiya di ne ma janko ne k’i ka sariya bato k’a mara ni n dusu bɛɛ ye.” (Zab. 119:34). Denise ye kudayi piyɔniye ye ani a ko: “Ni n’ y’a ye ko a ka gwɛlɛ n’ ma ka Jehova ka cikan dɔ labato, n’ be fanga deli a fɛ walisa ka koo tilennin kɛ.” An ka la a la ko Jehova bena o deliliw ɲɔgɔn jaabi tuma bɛɛ.​—Luka 11:9-13.

TƆƆW DƐMƐ U K’AN FAA KANU

12. Ka kɛɲɛ ni Efɛzikaw 5:1 ye, an ka ɲi ka mun lo kɛ?

¹² Efɛzikaw 5:1 kalan. An ye Jehova “deenw ye minw koo ka d’a ye.” O kama, an b’an seko bɛɛ kɛ k’a ladegi: An be tɔɔw kanu, an be ɲumanya kɛ u ye ani an be yafa u ma. Minw tɛ Ala lɔn, n’u y’an ka kɛwale ɲumanw ye, u be se k’a ɲini ka dɔ lɔn Ala koo la (1 Piyɛri 2:12). Jehova b’an minɛ cogo min na, kerecɛn bangebagaw ka ɲi k’u deenw minɛ o cogo la. O la, n’a sɔrɔ u deenw bena a ɲini ka kɛ Jehova teriw ye.

13. An ka ɲi ka mun lo kɛ walisa ka jagwɛlɛya sɔrɔ?

¹³ Denmisɛn fɛ, a facɛ ɲɔgɔn tɛ yen ani a ninsɔn ka di k’a kofɔ tɔɔw ye. O cogo kelen na, an b’a jati ko an sankolola Faa Jehova ɲɔgɔn tɛ yen ani an b’a fɛ tɔɔw k’a lɔn. An be ni masacɛ Dawuda dusukunnako ɲɔgɔn ye. A y’a sɛbɛ ko: “Ne ta bonya sababu ye [Jehova] Ala le ye!” (Zab. 34:3, Biblu Ala ta Kuma). Nka, ni kuma man di an ye do? An be se ka jagwɛlɛya sɔrɔ cogo di? N’an be Jehova kofɔ tɔɔw ye, o b’a ninsɔn diya kosɔbɛ. Ka fara o kan, ka Jehova lɔn, o be tɔɔw nafa kosɔbɛ. N’an be miiri o bɛɛ la, an jaa bena gwɛlɛya. An mako be jagwɛlɛya min na, Jehova bena o di an ma. A ye kerecɛn fɔlɔw dɛmɛ u ye jagwɛlɛya sɔrɔ. A bena an fana dɛmɛ.​—1 Tes. 2:2.

14. Mun na waajuli baara kɔrɔtanin lo?

¹⁴ Jehova tɛ mɔgɔ bɔ mɔgɔ la. O la, a ninsɔn ka di n’an be tɔɔw kanu u bɔyɔrɔ mana kɛ min o min ye (Kɛw. 10:34, 35). An be se k’an ka kanuya yira tɔɔw la cogo fisaman minw na, o dɔ ye k’u waaju (Mat. 28:19, 20). Waajuli baara be tɔɔw nafa cogo di? Minw b’an lamɛn, u ka ɲɛnamaya be se ka fisaya sisan yɛrɛ. U be se ka jigiya sɔrɔ fana ka ɲɛnamaya kɛ fɔɔ abada!​—1 Tim. 4:16.

AN FAA KANU ANI NINSƆNDIYA SƆRƆ

15-16. Mun na an be se ka ninsɔndiya?

¹⁵ Jehova ye Faa kanutigi ye. O kama, a b’a fɛ a ka denbaya ka ninsɔndiya sɔrɔ (Ezayi 65:14). Kabi sisan, an be se ka ninsɔndiya kuun caaman kosɔn hali ni gwɛlɛyaw b’an kan. Ɲɛyirali fɛ, an lanin b’a la ko an sankolola Faa b’an kanu kosɔbɛ. An be ni lɔnniya sɔbɛ ye ka bɔ Ala ka Kuma kɔnɔ, o min ye Bibulu (Zer. 15:16). An be denbaya min kɔnɔ, o ɲɔgɔn tɛ yen. O denbaya kɔnɔ, Jehova n’a ka sariyaw koo ka di bɛɛ ye ani an be ɲɔgɔn kanu.​—Zab. 106:4, 5.

¹⁶ An ninsɔndiyanin be se ka to sabu an jigi b’a la ko ɲɛnamaya bena fisaya. An b’a lɔn ko yanni dɔɔni, Jehova bena mɔgɔ juguw bɛɛ halaki ani ko a ka Masaya kɔrɔ, dugukolo bena kɛ alijɛnɛ ye. An jigi b’a la fana ko mɔgɔ saninw bena lakunu ani ko an bena kɛ n’u ye tugun (Zan 5:28, 29). O bena kɛ ninsɔndiyaba ye dɛ! Min yɛrɛ kɔrɔtanin lo kosɔbɛ, o ye ko Jehova ka kan ni nɔɔrɔ, tandoli ani batoli min ye, yanni dɔɔni, minw bɛɛ be sankolo la ani dugukolo kan, u bena se k’o di a ma.