To ka koow kɛ ka kɛɲɛ ni “ɲumanya ka sariya ye”

LISAa ko: “Balimaw ka ɲumanya lo ye nɔɔ to ne kan kosɔbɛ.” A tun b’a ɲɛfɔra le fɛɛn min y’a to ale sɔnna tiɲɛn batoli ma. Anne fana ka koo kɛra o cogo la. Ale ko: “A daminɛ na, fɛɛn min y’a to n’ sɔnna tiɲɛn batoli ma, Jehova Seerew ka kalanw tɛ, nka u ka ɲumanya lo.” A ka di o balimamuso fila ye ka Bibulu kalan ani ka miiri a kan, nka ɲumanya lo ye nɔɔba to u kan.

An be se ka ɲumanya yira tɔɔw la cogo di o min bena u dusukun sɔrɔ? An ka o kɛcogo fila lajɛ: An ka kumaw ani an ka kɛwalew. O kɔ, an bena a filɛ an ka ɲi ka mɔgɔ minw minɛ ni ɲumanya ye.

“ƝUMANYA KA SARIYA” KA BƆ I DAA LA

Muso ɲuman min kofɔra Talenw sapitiri 31nan kɔnɔ, “ɲumanya ka sariya lo be bɔ a daa la.” (Talenw 31:26, NW). A b’a to o sariya be nɔɔ to a ka kumaw n’a kumacogo kan. Denfaw fana ka ɲi ka to k’o ɲɔgɔn lo kɛ. Bangebaga caaman b’a lɔn ko kuma juguw be se ka nɔɔ jugu to u deenw kan. Ni bangebagaw be pɛrɛn u deenw kan ani u tɛ kuma u fɛ ni kanuya ye, u deenw man teli ka mɛnni kɛ u fɛ. Nka, n’u be kuma u deenw fɛ ni ɲumanya ye, u deenw ka teli k’u lamɛn ani ka kolo u ye.

I ye bangebaga ye wo, i tɛ bangebaga ye wo, i be se k’i jija cogo di ka kuma ni ɲumanya ye? An b’o kɛcogo dɔ sɔrɔ Talenw 31:26 yɔrɔ fɔlɔ la. A fɔra yen ko: “A be kuma ni hakilitigiya ye.” O kɔrɔ ko an ka ɲi k’an ka kumaw sugandi ni hakilitigiya ye ani k’u fɔcogo ɲɛ. Tuma caaman na, a ka ɲi an k’an yɛrɛ ɲininga ko: “N’ be nana kuma min fɔ, yala o be mɔgɔ dusu gwan le wala a b’a suma le?” (Talenw 15:1). Tiɲɛn na, n’an be miiri fɔlɔ ka sɔrɔ ka kuma, o ye hakilitigiya ye.

Talen wɛrɛ b’a fɔ ko: “Mɔgɔ min be kuma a kunfɛ, a be digi mɔgɔ la i ko murujan.” (Talenw 12:18). An ka kumaw n’u fɔcogo be nɔɔ min to mɔgɔw kan, n’an be miiri o la, o be se k’an lasun an k’an kumacogo kɔrɔsi. N’an be kuma ka kɛɲɛ ni “ɲumanya ka sariya ye,” an tɛna kuma ka don mɔgɔ gasi la wala ka kuma jugu fɔ mɔgɔ ma (Efɛz. 4:31, 32). An bena miiriya juguw ni kuma juguw to yen ka to ka kuma ɲumanw fɔ ni kaan diiman ye. Jehova ye ɲɛyirali to an ye o koo la tuma min na a tun be a ka kira Eli hakili sigira. O y’a sɔrɔ Eli tun sirannin lo. Jehova ka mɛlɛkɛ ye “ŋunuŋunukan,” o kɔrɔ kumakan diiman dɔ fɔ a ye “min te mɛn ka ɲa.” (1 Mas. 19:12). Nka ka ɲumanya kɛ, o tɛ dan kuma ɲumanw dama ma. An ka ɲi ka koo ɲumanw fana kɛ. An be se k’o kɛ cogo di do?

KƐWALE ƝUMANW BE TƆƆW JIJA

N’an be kuma ɲumanw fɔ ani ka koo ɲumanw kɛ, an be Jehova lo ladegira (Efɛz. 4: 32; 5: 1, 2). Lisa min kofɔra ka tɛmɛ, ale y’a ye Jehova Seerew ye ale n’a ka denbayamɔgɔw minɛ ni ɲumanya ye cogo min na. A ko: “Wagati dɔ la, dɔw ye an ka denbaya waajibiya ka yɛlɛma wagati kunkurunin kɔnɔ. Kafomɔgɔ fila n’u musow ye kɔnze ta u ka baarakɛyɔrɔ la walisa ka na an dɛmɛ ka minanw siri. O wagati la, n’ yɛrɛ tun tɛ bibulukalan kɛra!” O ɲumanya walew ye Lisa lasun a y’a mako don kosɔbɛ tiɲɛn batoli la.

Anne min kofɔra barokun daminɛ na, Jehova Seerew ye ale fana minɛ ni ɲumanya ye cogo min na, o diyara a ye. A ko: “Duniɲa cogoya kosɔn, n’ tun be sigasiga koo bɛɛ la. A tun ka gwɛlɛ n’ ma ka la mɔgɔ la.” A y’a fɔ fana ko: “Tuma min na Jehova Seerew kumana ni n’ ye, n’ ma la u ka kuma na. N’ ye n’ yɛrɛ ɲininga ko ‘mun na u be u mako donna n’ na ten?’ Balimamuso min tun be bibulukalan kɛra ni n’ ye, a tun be n’ minɛ ni ɲumanya ye sɔbɛ la. O y’a to n’ lara a la.” Mun lo sɔrɔla o la? “A laban, n’ tun be min kalanna, n’ y’a daminɛ ka miiri koɲuman o kan.”

A kɔrɔsi ko kafoden dɔw ye Lisa ni Anne minɛ cogo min na ni kanuya ani ɲumanya ye, o ye nɔɔba to u kan. Ani o ye u dɛmɛ u y’a ɲini ka tiɲɛnkalanw lɔn. Kafodenw ye u minɛ ni ɲumanya ye cogo min na, o ye u dɛmɛ u lara Jehova n’a sagokɛlaw la.

ALA LADEGI ANI TƆƆW MINƐ NI ƝUMANYA YE

Dɔw lamɔcogo ani u bɔyɔrɔ kosɔn, a ka nɔgɔ u ma ka kuma ɲumanw fɔ ani ka yɛlɛmisɛnw kɛ. Koo ɲuman lo k’a ye ko mɔgɔ dɔw sɔɔn wala u lamɔcogo b’u lasun ka ɲumanya kɛ. Nka n’an sɔɔn wala an lamɔcogo dɔrɔn lo b’an lasun ka ɲumanya kɛ, n’a sɔrɔ an tɛ Ala ka ɲumanya lo ladegira.—Kɛwaliw 28:2 lajɛ.

Ɲumanya sɔbɛ ye Ala ka hakili senu deen faan dɔ lo ye (Gal. 5:22, 23). O kama, walisa ka koow kɛ ni ɲumanya ye sɔbɛ la, an ka ɲi k’a to Ala ka hakili senu lo k’an lasun ka koow kɛ ani ka miiri. N’an b’o kɛ, an be Jehova ni Yezu lo ladegira. Ka fara o kan, komi an ye kerecɛnw ye, an b’an mako don tɔɔw la sɔbɛ la. O la, an be ni kanuya min ye Jehova Ala n’an mɔgɔɲɔgɔnw koo la, o lo b’an lasun ka ɲumanya kɛ tɔɔw ye. O cogo la, an ka ɲumanya be kɛ jogo barikaman ye min be bɔ an dusukun na ani o ka di Ala ye.

AN KA ƝI KA JƆNW LO MINƐ NI ƝUMANYA YE?

Mɔgɔ minw b’an minɛ ni ɲumanya ye wala an be minw lɔn, n’a sɔrɔ a ka nɔgɔ an ma k’olu lo minɛ ni ɲumanya ye (2 Sam. 2:6). O kɛcogo dɔ ye k’u waleɲuman lɔn (Kɔlɔs. 3:15). Nka n’an b’a jati ko a man kan an ka mɔgɔ dɔ minɛ ni ɲumanya ye do?

Miiri nin na: Mɔgɔ si tɛ nɛɛma wala ɲumanya kɛ an ye ka se Jehova ma, hali k’a sɔrɔ an man kan n’o ye. Ka fara o kan, a ka Kuma b’an dɛmɛ ka koo nafaman dɔ faamu o jogo koo la. Jehova ka “nɛɛma” kofɔra siɲɛ caaman Gɛrɛkikan sɛbɛninw kɔnɔ. A b’o nɛɛma kɛ an ye cogo di?

Mɔgɔ miliyɔn caamanba lo be dugukolo kan bi. Miiri k’a filɛ Jehova b’a ka ɲumanya yira an bɛɛ la cogo min na, a kɛtɔ k’an dɛmɛ an k’an makoɲɛfɛnw sɔrɔ walisa ka to niin na (Mat. 5: 45). Tiɲɛn na, sanni an yɛrɛ ka Jehova lɔn, a tun b’an minɛna ni ɲumanya ye (Efɛz. 2: 4, 5, 8). Misali la, a Dencɛ kelenpe bangelen min koo ka gwɛlɛ a ma kosɔbɛ, a y’o di adamadenw bɛɛ kosɔn. Ciden Pol y’a sɛbɛ ko Jehova ye kunmabɔsara di ka “kɛɲɛ ni [a] ka nɛɛma dafanin ye.” (Efɛz. 1:7). Ka fara o kan, hali n’an ye jurumu kɛ ani ka Jehova dusu tiɲɛ, a bele be to k’an ɲɛminɛ ani k’an kalan. A ka ladiliw n’a ka kuma be i ko “komiji” (Deter. 32:2). Jehova be ɲumanya min bɛɛ kɛra an ye, siga t’a la, an tɛ se k’a sara o kosɔn. Ani an b’a lɔn ko ni Jehova tun ma nɛɛma kɛ an ye, an tun tɛna kɛ ni jigiya foyi ye siniɲasigi koo la.—1 Piyɛri 1:13 lajɛ.

Siga t’a la, Jehova ka ɲumanya ɲɔgɔn tɛ yen ani o b’an lasun k’a ladegi. O la, sanni an ka ɲumanya kɛ mɔgɔ damanin dɔrɔn ye, an ka ɲi k’an jija ka Jehova ladegi an kɛtɔ ka tɔɔw minɛ ni ɲumanya ye loon o loon (1 Tes. 5: 15). N’an be tɔɔw minɛ ni ɲumanya ye tuma o tuma, o be tɔɔw nafa i ko tasuma be mɔgɔ nafa cogo min na nɛnɛ tuma na. An be kɛ an somɔgɔw, an kerecɛnɲɔgɔnw, an baarakɛɲɔgɔnw, an ka lakɔli filankuruw ani an sigiɲɔgɔnw dususalobagaw ye.

Miiri k’a filɛ i ka kumaw n’i ka kɛwale ɲumanw be se k’i somɔgɔw wala i ka kafomɔgɔ nafa cogo min na. N’a sɔrɔ i ka kafomɔgɔ dɔ mako be dɛmɛ na walisa k’a ka boon n’a ka zaradɛn ladon wala k’a ka loon o loon baara dɔw kɛ, i n’a fɔ ka taga sanni kɛ. Ka fara o kan, n’i ye mɔgɔ dɔ kunbɛn waajuli la min mako be dɛmɛ na, i be se ka koo tigitigi dɔw kɛ k’a tigi dɛmɛ.

An ka to ka Jehova ladegi an kɛtɔ ka to ka kuma ani ka koow kɛ ka kɛɲɛ ni “ɲumanya ka sariya ye.”