A to i hakili la ko Jehova “Ala ɲanaman lo”

1. Mun lo be Jehova sagokɛlaw dɛmɛ u ka to k’a bato gwɛlɛyaw bɛɛ n’a ta?

BIBULU b’a fɔ ko an be ‘waati . . . gwɛlɛw’ lo la (2 Tim. 3:1). Gwɛlɛya minw be mɔgɔ tɔɔw kan Sutana ka duniɲa juguman nin kɔnɔ, o fana be Jehova sagokɛlaw kan. Ka fara o kan, mɔgɔw b’an tɔɔrɔ sabu an be Jehova sago kɛra. O bɛɛ n’a ta, mun lo b’an dɛmɛ an ka to ka Jehova bato? Koo jɔnjɔn minw b’an dɛmɛ k’o kɛ, u la dɔ ye ko an b’a lɔn ko Jehova ye “Ala ɲanaman ye.”—Zer. 10:10, Biblu Ala ta Kuma; 2 Tim. 1:12.

2. Kɔrɔ juman na Jehova ye Ala ɲɛnaman ye?

² Jehova b’a lɔn gwɛlɛya minw b’an kan ani a be sababuw ɲini tuma bɛɛ k’an dɛmɛ (2 Til. Kib. 16:9; Zab. 23:4). N’an b’a jati Ala ɲɛnaman ye, o be se k’an dɛmɛ k’an ka gwɛlɛyaw bɛɛ muɲu. An k’a filɛ o ye masacɛ Dawuda dɛmɛ cogo min na.

3. Dawuda tun b’a fɛ ka mun lo fɔ tuma min na a ko Jehova ye “Ala ɲanaman” ye?

³ Dawuda tun be Jehova lɔn ani a tun b’a jigi la a kan. Tuma min na masacɛ Sayuli ni mɔgɔ wɛrɛw tun b’a ɲinina k’a faga, a ye dɛmɛ ɲini Jehova fɛ (Zab. 18:7). Ala y’a ka delili jaabi ani k’a dɛmɛ. O kɔ, Dawuda ko: “Matigi Ala ɲanaman lo!” (Zab. 18:47; Biblu Ala ta Kuma). O kumaw kɔrɔ tɛ dɔrɔn ko a tun lanin b’a la ko Ala be yen. Ka kɛɲɛ ni lɔnniya gafe dɔ ye, Dawuda tun b’a fɔra le ko ale lanin b’a la ko Jehova ye “tiɲɛn Ala ye min b’a sagokɛlaw dɛmɛ tuma bɛɛ.” Tiɲɛn na, koo minw ye Dawuda sɔrɔ a ka ɲɛnamaya la, o y’a to a tun lanin b’a la ko Jehova ye Ala ɲɛnaman ye. O kama, a tun cɛsirinin lo ka to ka baara kɛ a ye ani k’a tando.—Zab. 18:29, 30, 50.

4. N’an b’a lɔn ko Jehova ye Ala ɲɛnaman ye, o b’an nafa cogo di?

⁴ N’an lanin b’a la kosɔbɛ ko Jehova ye Ala ɲɛnaman ye, o b’an dɛmɛ ka baara kɛ a ye ni kisɛya ye. An bena fanga sɔrɔ k’an ka gwɛlɛyaw muɲu ani o bena an lasun an ka to k’an seko bɛɛ kɛ a ka baara la. An bena an jija fana walisa an magwɛrɛnin ka to Jehova la.

ALA ƝƐNAMAN BENA I BARIKA BONYA

5. Mun lo bena barika don an na gwɛlɛyaw wagati la? (Filipikaw 4:13).

⁵ N’an b’a to an hakili la ko Jehova ye Ala ɲɛnaman ye ani ko a b’an dɛmɛ tuma bɛɛ, an bena se ka gwɛlɛya sifaw bɛɛ muɲu, fitinin fara belebelebaw kan. Tiɲɛn na, gwɛlɛya si tɛ yen, Ala tɛ se ka min ɲɛnabɔ. Sebagayabɛɛtigi lo ani a be se ka barika don an na walisa an k’an ka gwɛlɛyaw muɲu (Filipikaw 4:13 kalan)a. O la, an hakili tɛ ɲagami ni gwɛlɛyaw b’an kan. N’an y’a ye Jehova b’an dɛmɛna kɔrɔbɔli denninw na, o b’a to an be la a la ko a bena an dɛmɛ fana kɔrɔbɔlibaw la.

6. Dawuda kanbele tuma, mun lo y’a to a lara kosɔbɛ Jehova la?

⁶ An ka koo fila lajɛ minw y’a to Dawuda lara kosɔbɛ Jehova la. A kanbele tuma, k’a to a facɛ ka sagaw dɛndɛ na, loon dɔw la urusi wara ani jara nana saga dɔw minɛ. O koo fila bɛɛ la, Dawuda y’a jaa gwɛlɛya k’o bɛgɛnw gwɛn ani k’a ka sagaw bɔsi u la. Nka a m’a miiri ko a sera k’o kɛ ale yɛrɛ ka setigiya lo barika la. A tun b’a lɔn ko Jehova lo y’a dɛmɛ (1 Sam. 17:34-37). Dawuda ma ɲinɛ o koow kɔ abada! A kɛtɔ ka miiri u la, a lara a la kosɔbɛ ko Ala ɲɛnaman bena a barika bonya loon nataw la.

7. Dawuda kɛtɔ ka koow jati cogo ɲuman na, o y’a dɛmɛ cogo di ka see sɔrɔ Goliyati kan?

⁷ Kɔfɛ, tuma min na Dawuda bele tun ye kanbele ye, a tagara bɔ Israɛldenw ye kɛlɛyɔrɔ la. A y’a ye ko u ka sɔrɔdasiw tun siranninba lo sabu Filisicɛ jamanjanba dɔ, min tɔgɔ ko Goliyati, ale tora ka Israɛldenw mafiɲɛya. A ko ‘u ka mɔgɔ kelen di ale ma u be kɛlɛ kɛ.’ (1 Sam. 17:10, 11). Israɛldenw sinsinna Goliyati janya, a bonya ani a ka darabɔli kumaw kan minkɛ, o lo ye siranya bila u la (1 Sam. 17:24, 25). Nka, Dawuda sinsinna koo wɛrɛ lo kan. A y’a faamu ko Goliyati kɛtɔ ka Israɛldenw ka kɛlɛdenw lɔgɔbɔ, a tun be “Ala ɲɛnama” lo nɛnina (1 Sam. 17:26, Bible senuma). Dawuda tun be miirila Jehova lo koo la. A tun lanin b’a la ko Ala min y’ale dɛmɛ k’a ka sagaw kisi, o Ala kelen lo bena ale dɛmɛ tugun nin sen fɛ. Dawuda tun lanin b’o la minkɛ, a ye Goliyati kɛlɛ ani a ye see sɔrɔ a kan!—1 Sam. 17:45-51.

8. Kɔrɔbɔliw tuma na, mun lo bena a to an be la a la ko Jehova bena an dɛmɛ? (jaa lajɛ fana).

⁸ An fana be se ka see sɔrɔ an ka gwɛlɛyaw kan, n’an lanin b’a la ko Ala ɲɛnaman labɛnnin lo k’an dɛmɛ (Zab. 118:6). An bena la o la, an kɛtɔ k’a lajɛ a ye min kɛ galen. Bibulu ka maana minw b’a yira Jehova y’a sagokɛlaw kisi cogo min na, olu kalan (Ezayi 37:17, 33-37). Kunnafoniw lajɛ fana jw.org kan minw b’a yira Jehova y’an balimaw dɛmɛ cogo min na an ka wagati la. Ka fara o kan, a ye ele yɛrɛ dɛmɛ cogo min na, miiri o la. N’a sɔrɔ i b’a miiri ko Jehova m’i dɛmɛ cogo kabakoman dɔ la, i n’a fɔ k’a to i sera ka urusi wara wala jara faga. Nka tiɲɛn fɔ ka di, Jehova ye koo caaman kɛ i ye. A y’i dɛmɛ i kɛra a teri ye (Zan 6:44). Fɔɔ ka na se sisan ma, a ka dɛmɛ lo barika la i bele be tiɲɛn sira kan. Mun na i t’a ɲini a fɛ a k’i hakili jigi wagati min na a ye koo nunu kɛ i ye: a y’i ka deliliw jaabi, a y’i makoɲɛfɛn jɔnjɔn dɔ di i ma wagati bɛnnin na ani k’i dɛmɛ gwɛlɛyaba dɔ tuma na. N’i tora ka miiri o koow la, o bena a to i be la a la kosɔbɛ ko Jehova bena to k’i dɛmɛ.

9. An ka ɲi k’an hakili to mun lo la gwɛlɛyaw tuma na? (Talenw 27:11).

⁹ N’an b’a jati ko Jehova ye Ala ɲɛnaman ye, o bena an dɛmɛ k’an ka gwɛlɛyaw filɛ ni ɲɛɛ ɲuman ye. Cogo di do? An bena a daminɛ k’a jati ko an ka gwɛlɛyaw ye sababu ye an fɛ ka sɔsɔlikoba dɔ jaabi min be Sutana ni Jehova cɛ. Sutana y’a fɔ ko ni gwɛlɛyaw b’an kan, an bena bɔ Jehova kɔ (Zɔbu 1:10, 11; Talenw 27:11 kalan). N’an be to ka Jehova sago kɛ kantigiya la an ka gwɛlɛyaw bɛɛ n’a ta, an b’a yira ko an be Jehova kanu ani ko Sutana ye ngalontigɛla ye. I be jamana min na, n’a sɔrɔ faamanw be Jehova sagokɛlaw kɛlɛla. A be se ka kɛ ko wariko gwɛlɛya b’i kan wala i be mɔgɔ minw waaju, u tɛ u mako don kibaro diiman na, wala gwɛlɛya wɛrɛw lo b’i kan. N’o lo, a to i hakili la ko o be sababu di i ma ka Jehova dusu diya. A to i hakili la fana ko Jehova tɛna a to i be kɔrɔbɔ ka tɛmɛ i barika daan kan (1 Kor. 10:13). A bena barika don i la walisa i ka se k’i ka gwɛlɛyaw muɲu.

ALA ƝƐNAMAN BENA I DUGA

10. Ala ɲɛnaman bena mun lo kɛ a sagokɛlaw ye?

¹⁰ Jehova b’a sagokɛlaw duga tuma bɛɛ (Eburuw 11:6). Kabi sisan, a be hɛɛrɛ di an ma ani an wasanin lo. A bena ɲɛnamaya banbali fana di an ma sini ma. An be se k’an jigi la Jehova kan sabu an lanin b’a la ko a b’a fɛ ani see b’a ye k’an duga. O kama, an be to k’an seko bɛɛ kɛ a ka baara la i ko a sagokɛlaw y’a kɛ cogo min na galen. Timote y’o lo kɛ saan kɛmɛkulu fɔlɔ la.—Eburuw 6:10-12.

11. Mun lo ye Timote lasun a ye baaraba kɛ kafo kɔnɔ? (1 Timote 4:10).

¹¹ Vɛrise nin kalan: 1 Timote 4:10. Timote y’a jigi la Ala ɲɛnaman kan. O lo kama, a y’a jija kosɔbɛ ka baara kɛ Jehova ye ani ka tɔɔw mako ɲɛ. A ye mun lo kɛ do? Ciden Pol y’a jija ko a k’a ka mɔgɔw kalancogo fisaya waajuli la ani kafo kɔnɔ. A y’a jija fana ko a ka kɛ ɲɛyirali ɲuman ye a kerecɛnɲɔgɔnw fɛ, denmisɛnw fara mɔgɔkɔrɔbaw kan. Ani a ye baara gwɛlɛ dɔw kalifa Timote ma. Misali la, minw mako tun be ladili barikamanw na, a ko Timote k’o di u ma, nka a k’o kɛ ni kanuya ye (1 Tim. 4:11-16; 2 Tim. 4:1-5). Timote tun be baara min kɛ, tuma dɔw la dɔw tun t’o kɔrɔsi wala u tun t’a waleɲuman lɔn. Nka, a tun lanin b’a la ko Jehova bena a duga a ka jijaliw kosɔn.—Ɔrɔm. 2:6, 7.

12. Mun lo be se ka diinan mɔgɔkɔrɔw lasun u bolo degunnin ka to kafo kɔnɔ? (jaa lajɛ fana).

¹² Bi, diinan mɔgɔkɔrɔw fana be se ka la a la ko u be baara ɲuman min kɛra, Jehova ɲɛɛ b’o la ani o ka di a ye. Diinan mɔgɔkɔrɔw be u balimaw jija, k’u kalan ani k’u niin don waajuli baara la. Ka fara o kan, u caaman b’u niin don Masaya Boonw n’a ɲɔgɔnnaw lɔli baara la ani u be dɛmɛ don kasaraw tuma na. U dɔw be taga bɔ balima banabagatɔw ye dɔgɔtɔrɔso wala u be dɛmɛ don CLH ka koow la. Diinan mɔgɔkɔrɔ minw b’u yɛrɛ labila k’o baaraw kɛ, olu b’a jati ko kafo ye Jehova ta lo ye, adamaden ta tɛ. O la, u b’u ka baara kɛ n’u dusu bɛɛ ye ani u lanin b’a la kosɔbɛ ko Jehova bena u duga o kosɔn.—Kɔlɔs. 3:23, 24.

13. An be jijali minw kɛ Jehova ka baara la, a b’u jati cogo di?

¹³ Bɛɛ lo tɛ se ka kɛ diinan mɔgɔkɔrɔ ye. Nka, an bɛɛ be se ka fɛɛn dɔ di Jehova ma. N’an b’an seko bɛɛ kɛ ka baara kɛ a ye, o ka di a ye. An be nili minw kɛ duniɲa kuru bɛɛ waajuli baara kama, hali ni bɛrɛ tɛ, a b’o kɔrɔsi. N’an b’an jija ka see sɔrɔ an ka siranya kan ani k’an bolo wuli ka lakalita kɛ lajɛnw na, o ka di a ye. N’an be yafa an hakɛtabagaw ma, o fana ka di a ye. Hali n’i b’a jati ko i tɛ sera ka caaman kɛ Jehova ka baara la i ko i b’a fɛ cogo min na, la a la ko i be sera ka min kɛ, o b’a dusu diya. A b’i kanu o kosɔn ani a bena i duga.—Luka 21:1-4.

I MAGWƐRƐNIN TO ALA ƝƐNAMAN NA

14. N’an magwɛrɛnin tora Jehova la, cogo juman na o bena an dɛmɛ ka to kantigiya la? (jaa lajɛ fana).

¹⁴ N’an be jɛnɲɔgɔnya teriman kɛra ni Jehova ye, a bena nɔgɔya an ma ka to ka kantigiya kɛ a ye. Yusufu ka koo b’o lo yira. A banna ka kakalayako kɛ sabu a tun be jɛnɲɔgɔnya teriman kɛra ni Jehova ye ani a tun t’a fɛ k’a dusu tiɲɛ (Zɛnɛzi 39:9). Walisa ka jɛnɲɔgɔnya teriman kɛ ni Jehova ye, an ka ɲi ka wagati kunmabɔ loon o loon walisa k’a deli ani k’a ka Kuma sɛgɛsɛgɛ. O la, an ka teriya barika bena bonya. I ko Yusufu, n’an be jɛnɲɔgɔnya teriman kɛra ni Jehova ye, an tɛna sɔn ka koo si kɛ min bena a dusu tiɲɛ.—Zaki 4:8.

15. Min ye Israɛldenw sɔrɔ kongokolon kɔnɔ, an be kalan juman lo sɔrɔ o la? (Eburuw 3:12).

¹⁵ Minw be ɲinɛ ko Jehova ye Ala ɲɛnaman ye, olu ka teli k’u yɔrɔ janya a la. A kɔrɔsi min ye Israɛldenw sɔrɔ kongokolon kɔnɔ. U tun b’a lɔn ko Jehova be yen, nka u tun lanin t’a la n’a bena a janto u la. U yɛrɛ ye ɲiningali kɛ ko: “Masaba b’an cɛma wa, walima a t’an cɛma?” (Ɛkiz. 17:2, 7). O kɔ, u murutira Ala ma. Siga t’a la, an t’a fɛ ka tugu u ka ɲɛyirali jugu kɔ.—Eburuw 3:12 kalan.

16. Mun lo be se k’an ka limaniya kɔrɔbɔ?

¹⁶ Duniɲa nin kɔnɔ, a man nɔgɔ an magwɛrɛnin ka to Jehova la. Mɔgɔ caaman lanin t’a la ko Ala be yen ani tuma caaman na minw t’a ka sariyaw labato, a be komi koow be ɲɛ olu bolo. O koo be se k’an ka limaniya kɔrɔbɔ. Hali n’an lanin b’a la ko Ala be yen, an be se k’a daminɛ k’a miiri ko a tɛna an dɛmɛ. Wagati dɔ la, Zaburu 73nan sɛbɛbaga tun b’o lo miiri. Minw tɛ Ala ka sariyaw labato, a tun ɲɛɛ b’a la ko olu be ɲɛnamaya diyabɔra. O kama, a y’a daminɛ k’a yɛrɛ ɲininga ni kuun b’a la ka Ala sago kɛ.—Zab. 73:11-13.

17. Mun lo bena an dɛmɛ an magwɛrɛnin ka to Jehova la?

¹⁷ Kɔfɛ, mun lo ye Zaburu sɛbɛbaga dɛmɛ a y’a miiricogo yɛlɛma? Minw be ɲinɛ Jehova kɔ, a miirila olu laban koo la (Zab. 73:18, 19, 27). Nafa minw b’a la ka Ala sago kɛ, a miirila o fana na (Zab. 73:24). Jehova y’an duga cogo minw bɛɛ la, an fana be se ka miiri o la. Ani an ka miiri k’a filɛ an ka ɲɛnamaya tun bena kɛ cogo min na n’an tun tɛ Jehova batora. O bena an dɛmɛ ka to kantigiya la Jehova ye ani i ko Zaburu sɛbɛbaga, an bena a fɔ ko: “Ne ka to ele Ala fɛ, o ye ne ka dagamu ye.”—Zab. 73:28.

18. Mun na an man ɲi ka siran sinikow ɲɛ?

¹⁸ Gwɛlɛya o gwɛlɛya mana an sɔrɔ laban loon nunu na, an bena se k’o muɲu sabu an be “baara kɛ Ala sɛbɛ ɲɛnama” lo ye (1 Tes. 1:9, Bible senuma). An ka Ala b’a janto an na ani a bena to k’an dɛmɛ tuma bɛɛ. A y’a sagokɛlaw dɛmɛ galen ani a be an fana dɛmɛna bi. Yanni dɔɔni, tɔɔrɔba dɔ bena kɛ, min ɲɔgɔn ma kɛ ka ye dugukolo kan (Ezayi 41:10). Nka Jehova tɛna an to an kelen. An bɛɛ k’an “jigi la a kan o tuma na k’a fɔ ko: ‘Matigi ye ne dɛmɛbaga ye, ne tena siran foyi ɲa.’”—Eburuw 13:5, 6.