Kalanbagaw ka Ɲiningaliw

Jehova bena “ŋaniya” juman lo don jamanaw ɲɛmɔgɔw dusukun na yanni dɔɔni?

Yirali 17:16, 17 b’a fɔ tɔɔrɔba wagati daminɛ koo la ko: “Sogo nin, ani a gɔɔn tan nunu bena wili kakalamuso nin kama k’a kɔniya. U ben’a walaka k’a to lakolon, u ben’a sogo ɲimi. A tɔɔ min bena to, u bena o jɛni. Bari, Ala le ye ŋaniya kelen d’u ma waasa u k’u ka fanga fara ɲɔgɔn kan ka baara kɛ sogo ni ye.” Fɔlɔ la a tun fɔra an ka gafew kɔnɔ ko Jehova bena “ŋaniya” min di jamanaw ɲɛmɔgɔw ma, o ye ka ngalon diinanw halaki.

Nga, an ka ɲi ka yɛlɛmani don o vɛrise faamuyali koo la. Jehova bena “ŋaniya” min di jamanaw ɲɛmɔgɔw ma, o ye k’u ka masaya “fanga” di “sogo” nin ma. Walisa k’a faamu o kiraya kuma bena dafa cogo min na, an ka ɲiningali nunu jaabi:

Jɔnw lo kofɔra o kiraya kuma na? “Kakalamuso,” u be min weele fana ko Babilonɛba, o ye duniɲa kuru bɛɛ ka ngalon diinanw jɛnkulu tagamasiɲɛ lo ye. “Sogo wuleman” ye Nasiyɔn Zini tagamasiɲɛ lo ye. O ɔriganisasiyɔn bilara sen kan saan 1919 walisa ka hɛɛrɛ sigi duniɲa kɔnɔ. A daminɛ na, a tun be weele ko Société des Nations (Yir. 17:3-5). “Gɔɔn tan” nunu ye gofɛrɛnɛmanw bɛɛ lajɛnnin ye minw be sogo dɛmɛna.

Jɛnɲɔgɔnya juman lo be kakalamuso ni sogo wulenman cɛ? Kakalamuso “siginin” be sogo kan. O kɔrɔ, kakalamuso be sogo dɛmɛna ani a b’a ɲinina a k’ale sago kɛ.

Mun lo bena kakalamuso sɔrɔ? Sogo nin ani gɔɔn tan minw be kakalamuso dɛmɛna, olu bena “wili [a] kama k’a kɔniya.” U bena a ka nafolo bɛɛ bɔsi a la ani k’a ka kɔnɔnajuguya yira bɛɛ la. Ka fara o kan, i ko Jehova y’a fɔ cogo min na, u bena a halaki pewu (Yir. 17:1; 18:8). O bena kɛ ngalon diinanw bɛɛ laban ye. Nga Yanni o cɛ, Jehova Ala bena jamanaw ɲɛmɔgɔw lasun ka koo dɔ kɛ min ɲɔgɔn ma deli ka kɛ ka ye.

Jehova bena jamanaw ɲɛmɔgɔw lasun ka mun lo kɛ? Jehova bena a “ŋaniya,” o kɔrɔ, k’a ka miiriya don gɔɔn tan nunu dusukun na walisa u “k’u ka sebagaya, n’u fanga” di “sogo [wuleman ma],” o min ye Nasiyɔn Zini ye (Yir. 17:13). Miiri k’a filɛ o bena kɛ cogo min na. Yala jamanaw ɲɛmɔgɔw bena a latigɛ u yɛrɛ ma ten dɔrɔn k’u ka sebagaya n’u fanga di sogo ma wa? Ayi! Kiraya kuma b’a yira ko Ala yɛrɛ lo bena u lasun k’o kɛ (Talenw 21:1; Ezayi 44:28 lajɛ). Yala u bena u ka fanga di sogo ma dɔɔni dɔɔni le wa? Ayi. Siga t’a la, o bena bari ka kɛ yɔrɔ nin kelen. Fanga sɔrɔnin kɔ, sogo nin bena Jehova ka kiti tigɛ ngalon diinanw kan k’u halaki pewu pewu.

An jigi b’a la ko mun lo bena kɛ sini ma? An kana a miiri ko an bena kunnafoniw sɔrɔ arajo, telewisɔn n’a ɲɔgɔnnaw na minw b’a yira ko jamanaw ɲɛmɔgɔw be dɛmɛ min donna Nasiyɔn Zini ka koow la, dɔ be farala o kan. An k’a lɔn ko koow bena bari ka kɛ le. Jehova bena a ka miiriya don jamanaw ɲɛmɔgɔw dusukun na walisa u k’u ka fanga di sogo ma. N’o kɛra, an k’a lɔn ko tɔɔrɔba bena daminɛ yanni dɔɔni. Yanni o cɛ, “an k’an yɛrɛ kɔlɔsi an labɛnnin ka to ɲana tuma bɛɛ” sabu yɛlɛmaniw bena kɛ yanni dɔɔni!—1 Tes. 5:6.