Masacɛ Zoziyasi saan 26, a y’a daminɛ ka Alabatosoba lalaga. O baara kɛtɔ, u ye “Masaba ka sariyasɛbɛ ye, Musa tun ye min di.” Tuma min na masacɛ ye o kalan lamɛn, a sinna ka yɛlɛmaniw kɛ walisa k’o sariyasɛbɛ kɔnɔnakumaw labato (2 Til. Kib. 34:14, 19-21). Yala i b’a fɛ ka Bibulu kalan loon o loon wa? N’i b’o kɛra ka ban, yala o kalan ka di i ye wa? O kalan kɛtɔ, yala i b’a ɲini k’i hakili to vɛrisew la minw be se k’i dɛmɛ wa? Tuma min na Zoziyasi tun be ni saan 39 ɲɔgɔn ye, a ye fili dɔ kɛ min y’a to a bɔnɛna a niin na. Sanni a k’a to Jehova k’a ɲɛminɛ, a y’a jigi la a yɛrɛ kan (2 Til. Kib. 35:20-25). An be kalan juman lo sɔrɔ o la? An sanda mana kɛ min o min ye wala an be Bibulu kalanna a mɛnna cogo o cogo, an ka ɲi ka to ka Jehova yɔrɔ ɲini. O kɔrɔ ko tuma o tuma, an ka ɲi ka to ka Jehova deli a k’an ɲɛminɛ, k’a ka Kuma sɛgɛsɛgɛ ani ka sɔn kerecɛn kolɔnbagaw ka ladiliw la. N’an y’o kɛ, an man teli ka filibaw kɛ ani an bena ninsɔndiya sɔrɔ.—Zaki 1:25. w23.09 12 § 15-16

Bibulu be muso caaman kofɔ minw tun be Jehova kanu ani u tun b’a sago kɛ. O musow tun b’u “yɛrɛ kɔlɔsi kosɔbɛ” ani u tun be “tilenninya kɛ koo bɛɛ la.” (1 Tim. 3:11). Ka fara o kan, balima sunguruw be se ka balimamuso kolɔnbagaw sɔrɔ u ka kafo kɔnɔ, u be se ka minw ladegi. N’i ye balima sunguru ye, yala i be balimamuso kolɔnbaga dɔw lɔn i be se ka minw ladegi wa? N’o lo, u ka jogo ɲumanw kɔrɔsi. O kɔ, a filɛ i be se k’u ladegi cogo min na. Walisa ka kɛ balimamuso kolɔnbaga ye, majigilenya kɔrɔtanin lo kosɔbɛ. Muso majiginin be jɛnɲɔgɔnya ɲuman kɛ ni Jehova ani tɔɔw ye. Misali la, muso min be Jehova kanu, a be a yɛrɛ majigi ka 1 Korɛntikaw 11:3 ka sariyakolo labato, o min ye ka kolo balimacɛw ye a sankolola Faa ye kuntigiya kalifa minw ma. A be se k’o kɛ kafo ani denbaya kɔnɔ. w23.12 18-19 § 3-5

Jehova b’a ɲini cɛɛ fɛ a k’a muso kanu ani k’a janto a la farikolo, dusukunnako ani Alako ta fan fɛ. N’i y’a ɲini ka kɛ ni jogow ni setigiya dɔw ye i n’a fɔ ka se jatiminɛ na, ka bonya la musow kan ani ka kɛ lannamɔgɔ ye, olu bena i dɛmɛ ka kɛ furucɛ ɲuman ye. I furunin kɔ, i be se ka kɛ denfa ye. I be se ka kalan juman lo sɔrɔ Jehova fɛ denfa ɲuman koo la? (Efɛz. 6:4). Misali la, Jehova y’a fɔ a Dencɛ Yezu ye ka gwɛ ko a koo ka di ale ye (Mat. 3:17). N’i kɛra denfa ye, to k’i deenw hakili sigi ko u koo ka di i ye. U mana koo ɲuman kɛ, i kɔnɔ gwɛ k’u tando. Denfa minw be Jehova ladegi, olu be u deenw dɛmɛ u be kɔrɔbaya ka kɛ balimacɛ ni balimamuso kolɔnbagaw ye. I be se k’i yɛrɛ labɛn kabi sisan o kama. O la, to k’i janto i somɔgɔw ni kafodenw na ani k’a yira u la ko i b’u kanu ani ko u koo ka gwɛlɛ i ma.—Zan 15:9. w23.12 28-29 § 17-18