Baraji be muɲuli la

¹ “Aw ka muɲuli de n’a to aw ka aw yɛrɛw niw sɔrɔ.” (Luka 21:19). O kumaw bɔra Yesu ka ciraya kumaw la, a ye minw fɔ “diɲɛ laban” koo la. U b’a yira ko an kɛtɔ k’an ka kantigiya mara, an ka kan k’an labɛn ka kɔrɔbɔli caaman kunbɛn. Nka Jehova ka fanga sababu la, an kelen kelen be se ka “muɲuli kɛ fo a laban” ani ka “kisi.”—Mat. 24:3, 13; Filip. 4:13.

² Kɔrɔbɔli, kɛnɛyako, wariko ni kɔnɔgwan kosɔn, loon kelen kelen bɛɛ be se ka gwɛlɛya kosɔbɛ an fɛ. Nka an man kan ka ɲinɛ abada ko Sitanɛ b’a ɲinina k’an bali an ka kantigiya kɛ Jehova ye. Loon o loon an mana kantigiya kɛ an Faa ye, dɔ be fara an ka seereya kan ka Sitanɛ ka darabɔli jaabi. Kɔrɔbɔli muɲutɔ, an be “ɲɛji” min bɔn, nafa b’a la k’a lɔn ko Jehova tɛ ɲinɛ u kɔ dɛ! U nafa ka bon kosɔbɛ Jehova ɲɛɛ kɔrɔ, ani an ka kantigiya b’a dusu diya!—Zab. 56:9; Ntal. 27:11.

³ Kɔrɔbɔliw b’an jogo fisaya: Tɔɔrɔ be se k’a yira ko an ka lanaya barika ka dɔgɔ wala ko fiyɛn dɔ be an ka jogo la, i n’a fɔ kuncɛbaya wala kɔrɔtɔ. Sanni an k’a ɲini k’an kuun bɔ o kɔrɔbɔli la wala ka daan sigi a la cogo dɔ fɛ min ma bɛn Bibulu ka miiriya ma, an ka kan k’an janto Ala ka Kuma ka ladili la. A b’a fɔ ko an k’a to “muɲuli ka a ka baara kɛ k’a dafa.” Mun na do? Katugu n’an be kɔrɔbɔli muɲu ni kantigiya ye, o b’an dɛmɛ an ka “dafa ka kɔgɔ.” ( Yaku. 1:2-4). Muɲuli be se k’an dɛmɛ ka jogo nafamanbaw kɛ an yɛrɛ la i n’a fɔ makari , hinɛ, ani ka koow kɛ k’a dama kɛɲɛ.—Rom. 12:15.

⁴ Lanaya min nafa kɔrɔbɔra: N’an be kɔrɔbɔliw muɲu, an be lanaya sɔrɔ min nafa kɔrɔbɔra, ani a nafa ka bon kosɔbɛ Ala ɲɛ kɔrɔ (1 Piɛre 1:6, 7). O lanaya ɲɔgɔn b’an dɛmɛ an ka sabati ka kɔrɔbɔli nataw kɛlɛ. Ka fara a kan, an b’a ye ko an ye Ala diyanye sɔrɔ. O b’an ka jigiya barikaya k’a kɛ tiɲɛnko ye an ɲɛɛ kɔrɔ.—Rom. 5:3-5.

⁵ Yakuba 1:12 b’a yira baraji fisaman min be se ka sɔrɔ muɲuli fɛ. A b’a fɔ ko: ‘Kɔrɔbɔli bɛ kun mɔgɔ min na, o ye dubaden ye, katuguni ni a tilennen sɔrɔla kɔrɔbɔli fɛ, a na ɲɛnamaya masafugula sɔrɔ.’ O kama, an masirilen ka to Jehova la kosɔbɛ. An ka la a la ko a bena barajiba di “a kanubaaw” ma.

An ka bibulukalanw kɛ minw be ɲɛtaga sɔrɔ

Yɔrɔ 2nan: An k’an yɛrɛ labɛn ka taga kalan kɛ

¹ Ka mɔgɔ kalan bɛrɛbɛrɛ bibulukalan kɛtɔ, a daan tɛ ka baro kɛ gafe kɔnɔnakow kan ani ka vɛrisew lajɛ Bibulu kɔnɔ. An ka kan k’o kalan di cogo dɔ la walisa ka kalanden dusu sɔrɔ. O la, fɔɔ an k’an yɛrɛ labɛn koɲuman an kɛtɔ k’an janto kalanden makoyaw la.—Ntal. 15:28.

² Labɛn be kɛ cogo di? A daminɛ ka Jehova deli kalanden koo la ani i k’a makoyaw kofɔ Jehova ye. Jehova deli a k’i dɛmɛ ka kalanden dusukun sɔrɔ kalan fɛ (Kolos. 1:9, 10). Walisa i ka kalan barokun faamu koɲuman, i ka wagati dɔ ta ka sapitiri tɔgɔ lajɛ, ka barokunw ni jaaw ni tagamasiɲɛw fana lajɛ. I k’i yɛrɛ ɲininga: ‘Kalan nin kuun jɔnjɔn ye juman ye?’ O bena i dɛmɛ ka sinsin hakilinata jɔnjɔnw kan kalan kɛtɔ.

³ I ka dakun kelen kelen bɛɛ lajɛ ka tugu ɲɔgɔnw kɔ koɲuman. Ɲiningali minw bilara gafe kɔnɔ, i k’u jaabiliw ɲini k’u lɔn, i kɛtɔ ka tagamasiɲɛ kɛ daɲɛw ni kumasen kunbabaw dɔrɔn na. Vɛrise minw dira, a filɛ jɛnɲɔgɔnya juman be yen olu ni dakun ka hakilinata jɔnjɔnw cɛ. Ani, a filɛ i bena u jumanw kalan Bibulu kɔnɔ kalan kɛtɔ. N’a sɔrɔ i bena a ye ko nafa b’a la ka miiriya dɔw sɛbɛ ka surunya dakunw dakɛnɛw kɔnɔ. A ka kan ka gwɛ kalanden ɲɛɛ na ko a be koo minw kalanna, u bɔra Ala ka Kuma lo kɔnɔ.—1 Tes. 2:13.

⁴ Kalan makɛɲɛ n’a tigi makoyaw ye: O kɔ, kalan lajɛ ka kɛɲɛ ni kalanden kelen kelen makoyaw ye. Kɔn k’a filɛ kalanden bena ɲiningali minw bila ani yɔrɔ minw faamuyali bena gwɛlɛya a ma. I k’i yɛrɛ ɲininga ko: ‘A mako b’a la ka mun lo faamuya wala ka baara kɛ yɔrɔ juman lo kan walisa ka ɲɛtaga sɔrɔ Alako ta fan fɛ? Ne be se k’a dusukun sɔrɔ cogo juman na?’ O kɔ, i k’i ka kalan makɛɲɛ n’o jateminɛ ye. Tuma dɔw la, n’a sɔrɔ i bena a ye k’i mako b’a la ka ɲɛyirali dɔ labɛn, wala ka ɲɛfɔli wala ɲiningali dɔw labɛn walisa ka kalanden dɛmɛ a ka hakilinata dɔ wala vɛrise dɔ faamu (Neh. 8:8). Nka kana a to ka kunnafoniw wɛrɛw fara a kan gwansan n’u tɛ barokun kɔrɔta bɛrɛbɛrɛ. Kalan laban na, n’i be segikanni fitinin kɛ, o bena kalanden dɛmɛ a ka hakilinata jɔnjɔnw mara a hakili la.

⁵ Mɔgɔ kuraw mana tilennenya walew kɛ minw be Jehova tando, o be kɛ ɲagaliba sababu ye an fɛ dɛ! (Filip. 1:11). Tuma o tuma n’i be bibulukalan kɛ ni mɔgɔw ye, i k’i yɛrɛ labɛn koɲuman walisa k’u dɛmɛ k’o laɲinita dafa.

Ala ka mara cidenyabaara lakɔli segikanni

Ɲiningali ninw bena jaabiliw sɔrɔ dalafɔli la Ala ka Mara cidenyabaara lakɔli la, saan 2004, awirilikalo tile 26nan lɔgɔkun kɔnɔ. Miniti 30 kɔnɔ, lakɔli kɔrɔsibaga bena segikanni koo ɲɛnabɔ. O bena basigi kalanw kan, minw kɛra saan 2004 kɔnɔ, kabini marisikalo tile 1nan lɔgɔkun, ka taga a bila awirilikalo tile 26nan lɔgɔkun na. [I janto: N’u ma gafe si kofɔ ɲiningali kɔ, i yɛrɛ lo ka kan ka sɛgɛsɛgɛriw kɛ.​—Gafe École du ministère ɲɛɛ 36-7 lajɛ.]

KUMACOGO FƐƐRƐW

1. Jigi min b’an kɔnɔ, cogo juman na an be se k’o ɲɛfɔ “ni majiginlenya ni bonyali ye”? (1 Piɛre 3:15) [2, be ɲɛɛ 192 § 2-4]

2. Mun na a kɔrɔtalen be an ka kuma ni jigi dali ye? (Rom. 8:38, 39; 1 Tes. 1:5; 1 Piɛre 5:12). [3, be ɲɛɛ 194]

3. Jigi dali be yira cogo juman na? [4, be ɲɛɛ 195 § 3–ɲɛɛ 196 dakun 4]

4. Ka koow kɛ nɛmɛnɛmɛ, o ye mun ye, ani mun na a kɔrɔtalen be? Cogo juman na an be se k’o kɛ k’a dama kɛɲɛ ni jagwɛlɛya ye (Rom. 12:18)? [5, be ɲɛɛ 197]

5. Sanni ka kuma daminɛ, mɔgɔ min be koow kɛ nɛmɛnɛmɛ, a bena a janto mun lo la (Ntal. 25:11; Yuh. 16:12)? [7, be ɲɛɛ 199]

CII FƆLƆ KALAN

6. Cogo juman na an ka barow ani an ka delinankow Bibulukalan na b’a yira ko an ye ɲɛtaga sɔrɔ tiɲɛn koo la? [2, be ɲɛɛ 74 § 3–ɲɛɛ 75 § 2]

7. “Ka waati kunmabɔ”, o kɔrɔ ye mun ye? Ani an be se k’o kɛ cogo di (Efes. 5:16)? [5, w02 11/15 ɲɛɛ 23]

8. Cogo juman na Bibulu b’a yira ka gwɛ ko hadamadenw bɛɛ ye kelen ye Ala ɲɛɛ kɔrɔ? Ani cogo juman na o ka kan ka ye an ka waajuli baara la? [6, w02 1/1 ɲɛɛ 5, 7]

9. Danbaga tɔgɔ kelenpe min ye Jehova ye, o kɔrɔ ye mun ye? [7, w02 1/15 ɲɛɛ 5]

10. Mun de y’a to Abɛl ka saraka tun “ka fisa Kaɛn ta ye”, ani an be kalan juman sɔrɔ o la ka ɲɛsin an ka “tanuli sarakaw” ma? (Heb. 11:4; 13:15) [8, w02 1/15 ɲɛɛ 21 § 6-8]

LƆGƆKUN KƆNƆ KA BIBULU KALANGWƐ

11. Cogo juman na Levitike 18:3 be se k’an dɛmɛ an kana ɲuman ni juguman jati ɲɛɛ jugu la (Efes. 4:17-19)? (1, w02 2/1 ɲɛɛ 29)

12. Sarakalasebaga kuntigi tun be “nbuurukun fila” minw kɛ “saraka finifanata” ye lɔgɔkunw seli (Pantekɔte) la, u tun be ciraya koo juman lakali? (Lev. 23:15-17). [2, w98 3/1 ɲɛɛ 13 § 21]

13. Jatɔya tun mana kɛ, i ko min kofɔra Nɔnburuw sapitiri 5nan kɔnɔ, cogo juman na jatɔmuso ‘woto tun be ja’? (Nɔnb. 5:27, NW ) [5, w84 7/15 ɲɛɛ 29]

14. Mun na Mariyama ni Aron ye Musa kɔrɔfɔ a ka muso Etiopika kosɔn (Nɔnb. 12:1)?

15. “Matigi ka kɛlɛ kow kitabu” tun ye mun ye (Nɔnb. 21:14)?