An ka bibulukalanw daminɛ sodaw la ani telefɔni fɛ

¹ Bi, mɔgɔw bolo degunnen be. O bɛɛ n’a ta, u caaman b’u mako don Alakow la. Cogo juman na an be se k’u dɛmɛ k’u yɛrɛw wasa Alakow la (Mat. 5:3)? Weleweledala caaman be se ka bibulukalan kɛ ni mɔgɔw ye u ka sodaw la wala telefɔni fɛ. Yala i be se ka dɔ fara i ka waajuli baara kan o cogo la wa?

² N’an b’a fɛ ka bibulukalanw daminɛ, fɔɔ an k’an labɛn k’a kɛcogo ɲɛyira mɔgɔw la ni sababu dira an ma tuma o tuma. An be se k’o kɛ cogo juman na ani yɔrɔ juman na?

³ Sodaw la: N’an ye mɔgɔ dɔ kunbɛn min sɔnna ka baro kɛ Bibulu koo la, nka n’a t’a fɛ k’an ladon a ka boon kɔnɔ, an ka gafe dayɛlɛ dɔrɔn ka dakun dɔ ta, an tun kɔnna ka min labɛn kalan kama. A be se ka kɛ kitabunin Ɲini ka kalansen fɔlɔ, dakun fɔlɔ ye. An k’o dakun kalan, an ka dakun ka ɲiningali bila, ani an ka baro kɛ dakun ka vɛrise kelen wala fila kan. Tuma caaman na, an be se ka sin k’o kɛ soda la, miniti looru ni miniti tan cɛ. Ni baro diyara a tigi ye, an ka labɛn kɛ walisa ka segi ka na dakun nɔfɛta kelen wala fila lajɛ wagati wɛrɛ la.—Ladili wɛrɛw be sɔrɔ saan 2002, zanwiye ka An ka Masaya cidenyabaara ɲɛɛ 6nan kɔnɔ. U b’a yira cogo min na an be se ka sin ka bibulukalanw daminɛ.

⁴ An be se ka tɛmɛ o kɛcogo kelen fɛ ka bibulukalanw daminɛ n’an be viziti kuraw kɛra. Ɲɛyirali fɛ, an be se ka kitabunin Ɲini bɔ, ka kalansen 2nan ta, ani ka baro kɛ Ala tɔgɔ koo la dakun 1-2nan kɔnɔ. Viziti kura nɔfɛta kɛtɔ, an be se ka dakun 3-4nan ta k’a yira Bibulu be min fɔ Jehova ka jogow koo la. Siɲɛ wɛrɛ, an be se ka dakun 5-6nan ani ɲɛɛ 5nan ka jaa lajɛ n’a tigi ye walisa k’a yira cogo min na Bibulu b’an dɛmɛ ka Jehova lɔn. An be se k’o bɛɛ kɛ n’an lɔnen be o tigi ka soda la.

⁵ Telefɔni fɛ: A ka di mɔgɔ dɔw ye ka Bibulu kalan kɛ telefɔni fɛ sanni k’a kɛ n’an ye ɲɛɛ ni ɲɛɛ. An ka wale nin lajɛ: Waajuli kɛtɔ soo ni soo, balimamuso dɔ ye musonin dɔ kunbɛn. O muso tun ye denbatigi ye, ani a bolo degunnen tun be tuma bɛɛ a ka baara la. Balimamuso dɛsɛra k’a kunbɛn kokura a ka soo minkɛ, a y’a latigɛ ka telefɔni ci a fɛ. Musonin y’a ɲɛfɔ ko sɔbɛ la, wagati t’ale fɛ ka baro kɛ Bibulu koo la. Balimamuso y’a fɔ ko: “Miniti 10 wala miniti 15 cɛ i be se ka lɔnniya kura sɔrɔ, hali telefɔni fɛ.” Muso y’a jaabi ko: “Ayiwa, n’a bena kɛ telefɔni lo fɛ, ne sɔnna!” A ma mɛɛn, bibulukalan daminɛna n’a ye telefɔni fɛ.

⁶ I be to ka taga bɔ mɔgɔ minw fɛ, yala u dɔw bena sɔn ka kalan kɛ telefɔni fɛ wa? Kɛcogo min lakalila san fɛ, i be se k’o kɛ k’a filɛ, wala i be se k’a fɔ dɔrɔn ko: “N’a ka fisa i ma, an be se ka baro kɛ Bibulu kan telefɔni fɛ. Yala o ka fisa i ma wa?” N’an b’an ka bibulukalan porogaramu yɛlɛma ka bɛn ni mɔgɔw ka koow cogoya ye, an bena se k’u dɛmɛ ka “Ala dɔnniya sɔrɔ.”—Ntal. 2:5; 1 Kɔr. 9:23.

[Study Questions]

Zurunaliw yiracogo

Réveillez-vous! 8 août

“Siranya be mɔgɔ caaman na tuma o tuma. E ka miiri la, o bɔra mun lo la? [An k’a tigi ka jaabili lamɛn.] Zurunali nin be ladili nafaman dɔw di. U b’an tanga farati dɔw ma minw be kɛ yɔrɔ ni yɔrɔ. A fana b’a yira ko Bibulu ye layidu ta ko duniɲa nata dɔ kɔnɔ, siranya tɛna kɛ yen tugun.” An ka Esayi 11:9 kalan.

La Tour de Garde 15 août

“Mɔgɔ caaman ka mɔgɔ sɔbɛ dɔ mana sa, u b’u yɛrɛw ɲininga mun lo be yen saya kɔ. E ka miiri la, yala an be se ka sayako faamu wa? [An k’a tigi ka jaabili lamɛn.] Zurunali nin b’a yira Bibulu be min fɔ suuw koo la. A fana b’a yira ko Ala ye layidu ta k’an ka mɔgɔ kanulen salenw lakunu. An ka Yuhana 5:28, 29 kalan.

Réveillez-vous! 22 août

“Yala i b’a lɔn ko mɔgɔw ka diyanye tagamaw lo kɛra sababu fɔlɔ ye mɔgɔ caaman ye baara sɔrɔ bi wa? [An k’a tigi ka jaabili lamɛn.] O diyanye tagamaw yiriwali kosɔn, tɔnɔw sɔrɔla. Nka o nana ni kunkow ye fana. Zurunali nin be mɔgɔw ka fɛtaw yira o koo kan: minw b’a fɛ, ani minw b’a kɛlɛ. A fana be ladili nafaman dɔw di, minw ɲɛsinna tagamaw ma jamana wɛrɛw la.”

La Tour de Garde 1er sept.

“Bi duniɲa kɔnɔ, kantigiya ye jogo ɲuman ye, mɔgɔw be min tando nka u caaman t’a kɛ. Yala a tun tɛna kɛ koo ɲuman ye ni mɔgɔ caaman tun be i n’a fɔ teri min kofɔra yan wa? [An ka Ntalen 17:17 kalan. O kɔ an k’a tigi ka jaabili lamɛn.] Zurunali nin b’a yira nafa min b’a la n’an be kantigiya kɛ an somɔgɔw n’an teriw ye.”