Yɔrɔ 3nan: An ka bibulukalanw kɛ minw be ɲɛtaga sɔrɔ

An ka baara kɛ bɛrɛbɛrɛ ni Bibulu ye

¹ Bibulukalanw kɛtɔ ni mɔgɔw ye, an ka laɲinita ye k’u dɛmɛ ka Ala ka Kuma kalansiraw faamu, ka sɔn u la, k’u sira tagama u ka ɲɛnamaya kɔnɔ ani ka kɛ Kirista ka kalandenw ye (Mat. 28:19, 20; 1 Tes. 2:13). O kama, kalan ka kan ka basigi Bibulu kan. A daminɛ na, a ka ɲi an k’a yira kalandenw la cogo min na u be se ka bibulusen dɔw ɲini ka sɔrɔ u tɔgɔla Bibulu kɔnɔ. Nka cogo juman na an be se ka baara kɛ ni Bibulu ye walisa k’u dɛmɛ u ka ɲɛtaga sɔrɔ Alako ta fan fɛ?

² An bena bibulusen minw kalan, an k’olu ɲɛnatɔmɔ: Kalan labɛntɔ, an k’a ɲini k’a filɛ cogo min na kalansen ka vɛrise kelen kelen ɲɛsinna kalan ma. Ani, an k’a latigɛ an bena vɛrise minw kalan k’u ɲɛfɔ kalan kɛtɔ ni kalanden ye. Tuma caaman na, a ka fisa an ka vɛrisew kalan minw b’an ka lannakow bɔyɔrɔ yira Bibulu kɔnɔ. Vɛrise minw ɲɛsinna kunnafoniw misɛnmanw ma, waajibi tɛ k’olu kalan. An k’an janto kalanden kelen kelen bɛɛ ka makoyaw n’a ka cogoya la.

³ An ka baara kɛ ni ɲiningaliw ye: Sanni an ka bibulusenw ɲɛfɔ kalanden ye, an k’a ɲini ale yɛrɛ fɛ a k’u ɲɛfɔ an ye. An be se k’a lasun a k’o kɛ n’an be ɲiningali tilennenw bila a ye. Ni bibulusen dɔ sira tagamacogo gwɛnen be kalanden ɲɛɛ na, an be se k’a ɲininga dɔrɔn cogo juman na o vɛrise be dakun kɔnɔnakow kɔrɔta. A dɔ la, fɔɔ an ka tɛmɛ ɲiningali tigitigi dɔ fɛ wala ɲiningali dɔw fɛ ka kalanden ɲɛsin jaabili tilennen ma. Ni ɲɛfɔli wɛrɛw ka kan ka kɛ, an k’a to kalanden ka jaabili di fɔlɔ.

⁴ An ka kalan kɛ cogo nɔgɔman na: Kalatigi min tɛgɛ ka di, tuma caaman na a be fɛɛn bon ka sɔrɔ siɲɛ kelenpe dɔrɔn. O cogo kelen na, karamɔgɔ ɲuman mako t’a la ka kuma caaman kɛ ka sɔrɔ ka hakilinata dɔ ɲɛfɔ. A ka kunnafoni dicogo ka nɔgɔ, a gwɛnen lo, ani a be tigitigi. Tuma dɔw la, an mako be se ka kɛ a la ka sɛgɛsɛgɛriw kɛ Sosiyete ka gafew kɔnɔ walisa ka vɛrise dɔ faamuya ani k’a ɲɛfɔ cogo tilennen na (2 Tim. 2:15). Nka an kana a ɲini ka vɛrise kelen kelen faan bɛɛ ɲɛfɔ kalan kɛtɔ. An mako be kunnafoni minw na walisa ka sinsin kalan kan, an k’olu dɔrɔn lajɛ.

⁵ An ka kalan sira tagama-cogo nafaman yira: Tuma min na a bɛnnen be, an ka kalanden dɛmɛ a k’a faamu cogo min na bibulusenw ɲɛsinna ale yɛrɛ ma. Ɲɛyirali fɛ, n’an be Heburuw 10:24, 25 lajɛra ni kalanden dɔ ye min tɛ na lajɛnw na fɔlɔ, an ka ɲi ka baro kɛ lajɛn kelen kan ani ka kalanden weele a ka na o lajɛn na. Nka an kana a ɲini k’a degun. An k’a to Ala ka Kuma k’a lasun a k’a latigɛ k’a yɛrɛ koo diya Jehova ye.—Heb. 4:12.

⁶ Cii dira an ma ka mɔgɔw kɛ kalandenw ye. An kɛtɔ k’o cii dafa, an ka baara kɛ bɛrɛbɛrɛ ni Bibulu ye walisa k’u dɛmɛ u ‘ka da Ala la ka a kan minɛ.’—Rom. 16:26.

Zurunaliw yiracogo

Réveillez-vous ! 22 Oct.

“Mɔgɔ caaman y’a faamu ko a kɔrɔtalen be ka denmisɛnw kolo kabini u fitininmanw. E ka miiri la, yala o ye waajibiko ye bi tile la wa? [A ka jaabili lamɛn, ani Ntalen 22:6 kalan.] Réveillez-vous ! nin b’a yira bangebagaw be se ka koo tigitigi minw kɛ walisa k’u denmisɛnw dɛmɛ u ka kɛ baliku tilennenw ye, minw be hɛɛrɛ la.”

La Tour de Garde 1^er Nov.

“Mɔgɔ caaman lanen t’a la ko hadamadenw kuntigiw be se ka bi tilew ka kunkow ɲɛnabɔ. E ka miiri la, yala mɔgɔ be yen, min be se ka ciraya kuma ninw dafa wa? [Zaburu 72:7, 12, 16 kalan. Ani, a ka jaabili lamɛn.] Kuntigi min kofɔra yan, zurunali nin b’a yira jɔn lo, ani a bena min kɛ.”

Réveillez-vous ! 8 Nov.

“Bi tilew la, degunw be denmisɛnw kan. U mako be ladiliw la walisa ka se k’u yɛrɛw lafasa. Tiɲɛn tɛ? [A ka jaabili lamɛn. Ani, Efesekaw 6:4 kalan.] Ladili kɔrɔ yɛrɛ yɛrɛ ye min ye, zurunali nin b’o ɲɛfɔ. A fana b’a yira cogo min na bangebagaw be se k’u denmisɛnw ɲɛminɛ ani k’u kolo n’u m’u fari faga.”

La Tour de Garde 15 Nov.

“Mɔgɔ caaman b’a fɛ ka kɛnɛya ɲuman ni sii jan sɔrɔ. Nka ni ɲɛnamaya banbali tun be se ka kɛ, yala i tun tɛna kɛ a fɛ wa? [A ka jaabili lamɛn. Ani, Yuhana 17:3 kalan.] Ɲɛnamaya banbali layidu be sɔrɔ Bibulu kɔnɔ. Zurunali nin be baro kɛ o kan. A fana b’a yira ɲɛnamaya bena kɛ min ye tuma min na o layidu bena dafa ka kɛ tiɲɛnko ye.”