Kafo ka lajɛnw, vidéoconférence sababu fɛ

Duniɲa kuru bɛɛ kɔnɔ, jamana caaman faamanw ye sariya sigi ko mɔgɔw ka furancɛ dɔ to u ni ɲɔgɔn cɛ ani ko a daganin tɛ jama ka ɲɔgɔn lajɛn. Jehova Seerew cɛsirinin lo ka o cikanw labato ani o wagati kelen na ka to ka Ala bato ɲɔgɔn fɛ. O kama, kafow tɛmɛna apilikasɔn dɔw fɛ i n’a fɔ Zoom walisa ka kafo ka lajɛnw kɛ.

Walisa kafow ka se ka lajɛnw kɛ tuma o tuma ani cogo latanganin na, Koow Ɲɛnabɔla Jɛnkulu ye sira di ko wari ka bɔ niliw la ka apilikasɔn Zoom kɔntiw san kafow ye. O ye kafo caaman dɛmɛ sabu u tun tɛ se ka wari sɔrɔ ka Zoom kɔnti san, o min sɔngɔ be se dɔrɔmɛ 8000-11000 FCFA ma wala ka tɛmɛ o kan yɛrɛ. O kafow tun be baara kɛra ni Zoom apilikasɔn dɔw ye minw labilara mɔgɔw ye gwansan. Nka, mɔgɔ bɛrɛ tun tɛ se ka konɛkte ka lajɛnw kɛ n’o apilikasɔnw ye ani u latanganin tɛ. Ɔriganisasiyɔn ye Zoom kɔntiw san kafo minw ye, u be se k’u ka lajɛnw kɛ cogo latanganin na, ani mɔgɔ caamanba be se ka konɛkte ka lajɛnw kɛ. Fɔɔ ka na se sisan ma, kafo 65000 ni kɔ lo be baara kɛra n’o kɔntiw ye jamana 170 la.

Indonezi jamana na, Kairagi kafo be Manado dugu la, Sulawesi Sayɛli fan fɛ. An ka ɔriganisasiyɔn ye Zoom apilikasɔn kɔnti dɔ san o kafo ye ani u tun be lajɛnw kɛ ni Zoom apilikasɔn min ye gwansan, u y’o to yen. Balimacɛ Hadi Santoso y’a fɔ ko: “Hali balima minw t’a lɔn ka ɲɛ baara be kɛ ni tablɛti n’a ɲɔgɔnnafɛnw ye cogo min na, u be se ka lajɛnw diyabɔ sisan sabu kuun t’a la tugun u ka konɛkte siɲɛ caaman lajɛn kelen na.”

Balimacɛ Lester Jijón, Jr. ye diinan mɔgɔkɔrɔ ye Guayacanes Oeste kafo kɔnɔ, o min be sɔrɔ Guayaquil mara la, Ekuwatɛri jamana na. Ale y’a fɔ ko: “Komi gwɛlɛya be balima caaman kan wariko ta fan fɛ, tiɲɛn na kafo dɔw tun tɛna se ka wari sɔrɔ ka Zoom kɔnti san walisa kafo kuru bɛɛ ka se ka lajɛnw kɛ. Nka sisan, ɔriganisasiyɔn ka dɛmɛ barika la, an ye kɔnti dɔ sɔrɔ min b’a to mɔgɔ wɛrɛw be se ka fara an kan lajɛnw na hali an yɛrɛ tɛ siran ko mɔgɔw hakɛ bena a dama tɛmɛ.”

Johnson Mwanza, ye diinan mɔgɔkɔrɔ dɔ ye Ngwerere North kafo kɔnɔ, Lusaka mara la, Zambi jamana na. Ale y’a fɔ ko: “Balima caaman be to k’a fɔ ko “Ɔriganisasiyɔn ye Zoom kɔnti minw san an ye, tiɲɛn lo ko o kɔntiw b’a to an be se k’an magwɛrɛ balimaw na kosɔbɛ. Nka o dɔrɔn tɛ. O b’a yira an na fana ko Jehova b’an kanu ani a b’a janto an na.””

Wari min tun bilara dan na balawokow kama, an ye dɔ bɔ o lo la walisa ka Zoom kɔntiw san kafow ye. O wari tun sɔrɔla cogo di? A tun sɔrɔla niliw lo sababu fɛ minw be kɛ ka dɛmɛ don Masaya ka baaraw la duniɲa kuru bɛɛ kɔnɔ. O niliw caaman be kɛ donate.jw.org sababu fɛ. Aw b’aw tɛgɛ labila ka nili minw kɛ, an b’aw fo o kosɔn. O b’a to fana an be se ka dɛmɛ lase balimaw ma cogo wɛrɛw la duniɲa kuru bɛɛ kɔnɔ.—2 Korɛntikaw 8:14.