KALANSEN 52
Mun na an ka ɲi k’an janto an sawura ani an ka fanidoncogo la?
An ɲɛnafaniw n’an kuun dilancogo tɛ kelen ye. Bibulu be min fɔ fanidoncogo ani sawura koo la, o ka nɔgɔ. N’an b’o sariyakolow labato, an bena se k’an ɲɛnafaniw don ani fana k’an koo diya Jehova ye. An k’o sariyakolo dɔw lajɛ.
1. An ka ɲi ka tugu sariyakolo jumanw kɔ fanidoncogo ani sawura koo la?
An ka ɲi k’an “yɛrɛ masiri cogo bɛnnin na, ka fani don minw [b’an] sutara.” Ka fara o kan, an sawura ka ɲi k’a yira ko an “be siran Ala ɲa.” (1 Timote 2:9, 10). An ka sariyakolo naani lajɛ o koo la: 1) An ka ɲi ka fani don “cogo bɛnnin na.” N’a sɔrɔ i y’a kɔrɔsi kafo ka lajɛnw na ko Jehova sagokɛlaw ka faniw tɛ kelen ye. Nka an ka fanidoncogo n’an kuun dilancogo b’a yira tuma bɛɛ ko an be bonya la an ka Ala kan. 2) An ka faniw ka ɲi k’an sutara. O kɔrɔ ko u man kan k’an fari yɔrɔ bɛɛ yira wala ka mɔgɔw ɲɛɛ sama an kan. 3) An ka ɲi ka koow kɛ ni hakilitigiya ye. O kɔrɔ ko an t’a ɲini ka kɛ sanga la tuma bɛɛ an fanidoncogo n’an sawura fɛ. 4) An sawura ka ɲi k’a yira tuma bɛɛ ko an “be siran Ala ɲa” ani ko an be tiɲɛn Ala lo bato.—1 Korɛntikaw 10:31.
2. An sawura be se ka mun lo kɛ an balimaw la?
Tiɲɛn lo ko fani min k’an diya, an be se k’o don. Nka, an ka ɲi ka miiri k’a filɛ an sawura be se ka min kɛ tɔɔw la. An b’an jija an kana mɔgɔ si kɔnɔ gwan. Ani, an b’an “tɔɲɔgɔn diyanakow kɛ a ka ɲa kama, janko ka se k’a dɛmɛ a ka taga ɲa.”—Ɔrɔmukaw 15:1, 2 kalan.
3. An sawura be se ka tiɲɛn batoli nege don mɔgɔw la cogo di?
An b’an jija tuma bɛɛ ka fani don cogo bɛnnin na sanko n’an be tagara kafo ka lajɛnw na ani waajuli la. An t’a fɛ an sawura ka mɔgɔw bali ka kibaro diiman lamɛn koɲuman. Nka an b’a fɛ a ka tiɲɛn batoli nege don u la ani ka “an Kisibaa Ala ka kalan bonya.”—Titi 2:10, Bible senuma.
A ƝINI KA DƆ LƆN TUGUN
An k’a filɛ an be se ka min kɛ walisa an ka fanidoncogo n’an sawura k’a yira mɔgɔw la ko an ye kerecɛn sɔbɛw ye.
An ka fanidoncogo be se k’a yira n’an be bonya la faamanw kan. Hali ni Jehova be an dusukun lo filɛ, an sawura ka ɲi k’a yira ko an be bonya la a kan
4. N’an sawura ka ɲi, o be bonya la Jehova kan
Mun lo y’a to an b’an janto kosɔbɛ an sawura koo la? Zaburuw 47:3 kalan. O kɔ, a’ ye ɲiningali nunu kɛ ani ka baro kɛ u kan:
Komi an ye Jehova ka lasigidenw ye, o ka ɲi k’an lasun ka fani don cogo juman na?
E ka miiri la, a bɛnnin lo an k’an janto an sawura koo la n’an be tagara lajɛnw na wala waajuli la wa? Mun na i ko ten?
5. Desizɔn ɲumanw ta i sawura koo la
An ka faniw sɔngɔ mana kɛ min o min ye, min kɔrɔtanin lo, o ye ko u ka ɲi ka saniya ani ka kɛɲɛ an ka kokɛtaw ma. 1 Korɛntikaw 10:24 ani 1 Timote 2:9, 10 kalan. O kɔ, a’ ye baro kɛ k’a yira fɛɛn min kama an man kan ka faniw don . . .
minw ferekenin lo wala minw waganin lo.
minw b’an dɛrɛ kojugu, minw b’an fari yira, wala minw b’a to u b’an ta cɛɛ wala muso ye.
Hali ni kerecɛnw tɛ Musa ka sariya kɔrɔ, o sariya b’an dɛmɛ ka Jehova ka miiriya lɔn. Deteronɔmu 22:5 kalan. O kɔ, a’ ye ɲiningali nin kɛ ani ka baro kɛ o kan:
Fanidoncogo ani kuun dilancogo minw b’a to u tɛ cɛɛ lɔn ka bɔ muso la, mun na an ka kan k’an yɛrɛ tanga u ma?
1 Korɛntikaw 10:32, 33 ani 1 Zan 2:15, 16 kalan. O kɔ, a’ ye ɲiningali nunu kɛ ani ka baro kɛ u kan:
Mun na an ka ɲi k’an janto an sawura kana an sigiɲɔgɔnw wala kafomɔgɔw kɔnɔ gwan?
Fanidoncogow ani kuun dilancogo jumanw lo be sanga la i ka mara la?
E ka miiri la, u dɔw bɛnnin tɛ kerecɛn ma wa? Mun na i ko ten?
Fanidoncogo caaman be yen minw ka di Jehova ye
NI MƆGƆ DƆ Y’A FƆ I YE KO: “Fani min ka n’ diya, n’ b’o lo don.”
E be mun miiri o la?
MIIRIYA JƆNJƆN
N’an b’an janto an sawura koo la, o b’a yira ko an be bonya la Jehova n’an mɔgɔɲɔgɔn kan.
I ye mun lo faamu?
Mun na an ka fanidoncogo n’an kuun dilancogo kɔrɔtanin lo Jehova ɲɛɛ kɔrɔ?
Bibulu ka sariyakolo jumanw be se k’an dɛmɛ ka desizɔn ɲumanw ta an sawura koo la?
An sawura be se ka mɔgɔw lasun ka tiɲɛn batoli koo ta cogo di?
NUNU LAJƐ FANA
An ka fanidoncogo be mun lo yira an koo la?
“Que révèle ma façon de m’habiller ?” (A be sɔrɔ jw.org kan)
Mun na hakilitigiyako lo an ka miiri fɔlɔ ka sɔrɔ ka an fari ɲɛgɛɲɛgɛ?
“K’i fari ɲɛgɛɲɛgɛ, Bibulu be mun lo fɔ o koo la?” (A be sɔrɔ jw.org kan)
Bibulu ka sariyakolo wɛrɛ minw b’an dɛmɛ ka desizɔn ɲumanw ta.
“Ton habillement honore-t-il Dieu ?” (Saan 2016, sɛtanburukalo ka Kɔrɔsili Sangaso)
Muso dɔ tun b’a fɛ k’a koo diya Ala ye. A nana laban ka sɔn a ma ko joo be tɔɔw fɛ k’u ɲɛnafaniw sugandi.