Saa ziralaman

SAA min melekenin lo poto nin na, saa yɛrɛyɛrɛ tɛ. Saa ziralaman lo. Jehova y’a fɔ Musa ye ko a k’a dulon poto la walisa jama ka se k’a filɛ ani ka to niin na. Nka, saa minw be duguma olu ye saa yɛrɛyɛrɛw lo ye. U ye mɔgɔw cin ani ka bana bila u la. I b’a lɔn fɛɛn min kama wa?

O kɛra sabu Israɛldenw ŋunuŋununa Ala ni Musa kama. U ŋunuŋununa ko: ‘Mun na aw y’a kɛ an bɔra Misira janko an ka sa kongokolon kɔnɔ? Dumuni ni jii foyi tɛ yan. Maanɛ nin lɔgɔ bɔra an na.’

Nka, maanɛ tun ye dumuni ɲuman ye. Jehova tun ye kabako lo kɛ walisa k’a di u ma. Ani a tun ye kabako kɛ ka jii fana di u ma. Nka, Jehova y’a janto u la cogo min na, u m’a waleɲuman lɔn o kosɔn. O kama, Jehova ye saa fariman nunu ci walisa ka Israɛldenw ɲangi. Saaw y’u cin, ani u caaman sara.

A laban, jama nana a fɔ Musa ye ko: ‘An ye jurumu kɛ, sabu an ye kuma jugu fɔ e ni Jehova ma. I ka Jehova deli ko a ka saa nunu bɔ an cɛma.’

Musa ye Jehova deli jama ye. A y’a fɔ Musa ye ko a ka saa ziralaman nin dilan. A y’a fɔ a ye ko a k’a dulon poto dɔ la, ani saa mana mɔgɔ o mɔgɔ cin o tigi ka kan k’o saa ziralaman nin filɛ. Ala ye min fɔ, Musa y’o kɛ. Ni saa tun ye mɔgɔ o mɔgɔ cin, n’a tigi tun ye saa ziralaman nin filɛ o tigi tun be kɛnɛya.

An be se ka kalan dɔ sɔrɔ nin koo la. Faan dɔ fɛ, an bɛɛ be i n’a fɔ o Israɛldenw, saa ye minw cin. An bɛɛ be saya sira kan. A filɛ i lamini na, i bena a ye ko mɔgɔw be kɔrɔ, u be bana ani u be sa. Koow be ten sabu cɛɛ fɔlɔ ni muso fɔlɔ, Adama ni Awa, y’u kɔɔ di Jehova ma ani an bɛɛ y’u deenw ye. Nka, Jehova ye fɛɛrɛ dɔ kɛ walisa an ka se ka ɲɛnamaya kɛ fɔɔ abada.

Jehova y’a Dencɛ Yezu Krista ci ka na dugukolo kan. U ye Yezu dulon yiri la sabu mɔgɔ caaman y’a miiri ko mɔgɔ jugu lo. Nka, Jehova ye Yezu ci ka na an kisili lo kosɔn. N’an y’a filɛ, o kɔrɔ ko n’an tugura a kɔ, an be se ka ɲɛnamaya banbali sɔrɔ. An bena koo caaman kalan o koo la kɔfɛ.