Zonasi ni jɛgɛba

CƐƐ nin filɛ jii kɔnɔ! Tɔɔrɔ b’a kan dɛ, tiɲɛn tɛ? Jɛgɛ belebeleba nin bena a kunu! I b’a lɔn cɛɛ nin ye mɔgɔ min ye wa? A tɔgɔ ko Zonasi. An k’a filɛ mun lo ye tɔɔrɔba nin lase a ma.

Zonasi tun ye Jehova ka kira lo ye. Kira Elize sara a ma mɛɛn, Jehova y’a fɔ Zonasi ye ko: ‘Wuli ka taga Ninivu duguba kɔnɔ. O dugu mɔgɔw ka koo juguw cayara kojugu. N b’a fɛ i ka taga kuma u fɛ o koo la.’

Nka, Zonasi tun t’a fɛ ka taga yen. O kama, a donna kurun dɔ kɔnɔ ka dugu wɛrɛ sira minɛ. Zonasi wulila ka boli minkɛ, o ma diya Jehova ye. O kama, a y’a to fɔɲɔba dɔ wulila. Fɔɲɔ juguyara fɔɔ kurun tun be ɲini ka tiɲɛ. Kurun bolibagaw siranna kosɔbɛ, u y’u ka joow weele walisa u k’u dɛmɛ.

A laban Zonasi y’a fɔ u ye ko: ‘Jehova Ala min ye sankolo ni dugukolo dan, ne be ale lo bato. Jehova ye cii min di ne ma, n t’a fɛ k’o kɛ, o lo y’a to n be bolila a ɲɛ.’ O la, kurun bolibagaw y’a ɲininga ko: ‘An ka kan ka mun lo kɛ i la walisa kɔgɔji ka mala?’

Zonasi y’u jaabi ko: ‘ A’ ye ne minɛ ka n fili jii la, kɔgɔji bena mala.’ Kurun bolibagaw tun t’a fɛ k’o kɛ, nka komi fɔɲɔ tun be juguyara ka taga, u labanna k’a minɛ k’a fili kɔgɔji la. O yɔrɔnin bɛɛ, fɔɲɔ lɔra ani jii malara.

Komi Zonasi tun be jigira jii jukɔrɔ, jɛgɛba y’a kunu. Nka a ma sa. A ye tile saba ni suu saba kɛ jɛgɛ nin kɔnɔ. Zonasi ma Jehova kaan minɛ ani a banna ka taga Ninivu dugu la minkɛ, a nimisara kosɔbɛ o la. I b’a lɔn a ye min kɛ wa?

A ye Jehova deli a k’a dɛmɛ. Jehova ye sira di jɛgɛ ma ko a ka Zonasi fɔɔnɔ k’a bila dugukolo kan. O kɔ, Zonasi wulila ka taga Ninivu. Zonasi ka koo b’an kalan ko Jehova mana koo o koo fɔ an ye, a kɔrɔtanin lo an k’o kɛ.