Daniyɛli n’a tɔɲɔgɔn saba

ISRAƐLDEN minw kalannin lo kosɔbɛ, masacɛ Nabukodonozɔri ye olu bɛɛ cɛ ka taga n’u ye Babilɔni. Olu cɛma, a ye kanbele dɔw woloma minw cɛ ka ɲi kosɔbɛ ani hakilitigiw lo. I ɲɛɛ be kanbele naani minw na, olu dɔw lo. Kelen tɔgɔ ko Daniyɛli, Babilɔnikaw ye saba tɔɔ nunu tɔgɔw la ko Sadiraki, Mesaki ani Abɛdenego.

Masacɛ ye kanbele minw woloma, a tun b’a fɛ k’olu degi a ka soo kɔnɔ baaraw la. U tun bena u kalan saan saba kɔnɔ. O kɔ, u tun bena hakilitigiw dama sugandi olu ka masacɛ dɛmɛ k’a ka gwɛlɛyaw ɲɛnabɔ. Masacɛ tun b’a fɛ o kanbelew bɛɛ ka fanga ni kɛnɛya sɔrɔ u ka fɔrɔmasɔn wagati la. O kama, a ye cii di a ka baaradenw ma ko ale n’a somɔgɔw be dumuni ɲuman min kɛ ani ka diwɛn min min, o ɲɔgɔn ka to ka di kanbele nunu ma.

Daniyɛli filɛ. I b’a lɔn a be min fɔra Nabukodonozɔri ka baaradenw kuntigi Asipenazi ye wa? Daniyɛli b’a fɔra a ye ko dumuni min be kɛ masacɛ ka tabali kan, ale t’a fɛ k’o dumu. O kumaw ye Asipenazi kɔnɔ gwan. A y’a fɔ ko: ‘Masacɛ lo ye aw ka dumuniko latigɛ. N’a nana a ye ko aw fasanin lo ka tɛmɛ aw filankuru tɔɔw kan, a bena ne faga.’

Asipenazi tun ye Daniyɛli n’a teri saba ka koo don cɛɛ min bolo, Daniyɛli kumana ale fɛ ko: ‘Ne b’i deli, i ka to ka ɲugu ni jii gwansan di an ma, k’an filɛ yanni tile 10. O kɔ, kanbele minw be masacɛ ka dumuni kɛ, i k’an suma n’olu ye k’a filɛ minw ɲɛda ka ɲi.’

O cɛɛ sɔnna k’o kɛ. Tile 10 dafara tuma min na, Daniyɛli n’a tɔɲɔgɔnw ɲɛda tun be manamana ka tɛmɛ kanbele tɔɔw nunu bɛɛ kan. O kama, o cɛɛ tora ka ɲugu di u ma masacɛ ka dumuni nɔɔ na.

Saan saba banni kɔ, u tagara ni kanbele nunu bɛɛ ye masacɛ ɲɛɛ kɔrɔ. A ye baro kɛ n’u bɛɛ ye. A y’a ye ko Daniyɛli n’a tɔɲɔgɔnw ka hakilitigiya ɲɔgɔn tɛ yen kanbele nunu cɛma. O kama, a y’a fɔ k’u ka to masaso kɔnɔ k’ale dɛmɛ. Masacɛ tun mana Daniyɛli, Sadiraki, Mesaki ani Abɛdenego ɲininga koo o koo la, wala a tun mana koo gwɛlɛ o koo gwɛlɛ kalifa u ma, a tun b’a ye k’u ka fisa n’a ka jamana kɔnɔ jootigiw ni lɔnnikɛlaw ye fɔɔ siɲɛ tan.