Kalanbagaw Ka ƝIningaliw

Yezu wolonin kɔ, mun na Yusufu ni Mariyamu tora Bɛtilehɛmu, u ma kɔsegi u fɛ Nazarɛti?

Bibulu t’o fɔ an ye. Nka, a be kunnafoni jɔnjɔn dɔw di minw be se k’an dɛmɛ k’a faamu fɛɛn min kama u m’a latigɛ ka kɔsegi Nazarɛti o wagati la.

Mɛlɛkɛ dɔ tun y’a fɔ Mariyamu ye ko a bena kɔnɔ ta ani ka deen wolo. Tuma min na mɛlɛkɛ y’o cii lase Mariyamu ma, ale ni Yusufu tun siginin be Nazarɛti, Galile mara la (Luka 1:26-31; 2:4). Kɔfɛ, u bɔnin kɔ Ezipiti, u kɔsegira Nazarɛti. Yezu lamɔna o yɔrɔ lo la ani a tun be weele ko Nazarɛtika (Mat. 2:19-23). O lo kama, n’an be kumana Yezu, Yusufu ani Mariyamu koo la, an be miiri Nazarɛti dugu koo la.

Mariyamu somɔgɔ dɔ tun be Zuda mara la ani a tɔgɔ tun ko Elizabɛti. Sarakalasebaga Zakari muso tun lo ani a nana kɛ Zan Batizelikɛla bamuso ye (Luka 1:5, 9, 13, 36). Mariyamu tagara bɔ Elizabɛti ye Zuda mara la ani a ye kalo saba kɛ yen. O kɔ, a kɔsegira Nazarɛti (Luka 1:39, 40, 56). O lo kama, Mariyamu tun be Zuda mara lɔn.

Kɔfɛ, cii min dira ko mɔgɔw “tɔgɔ ka sɛbɛn,” Yusufu y’o labato. O lo kama, a bɔra Nazarɛti ka taga Bɛtilehɛmu, o min tun ye “masacɛ Dawuda ka dugu ye.” A tun fɔra kiraya kumaw kɔnɔ fana ko Masiya tun bena wolo o yɔrɔ lo la (Luka 2:3, 4; 1 Sam. 17:15; 20:6; Mise 5:1). Yezu wolola Bɛtilehɛmu le. Denɲɛnin tun be Mariyamu bolo minkɛ, Yusufu m’a ɲini ka sirajan minɛ n’a ye ka kɔsegi Nazarɛti. U tora Bɛtilehɛmu. Kilomɛtɛrɛ 9 ɲɔgɔn lo tun be o dugu ni Zeruzalɛmu cɛ. O la, a tun ka nɔgɔ u ma ka taga n’u ka denɲɛnin ye Alabatosoba kɔnɔ ani ka sarakaw bɔ ka kɛɲɛ ni sariya ye.—Lev. 12:2, 6-8; Luka 2:22-24.

Ala ka mɛlɛkɛ tun kɔnna k’a fɔ Mariyamu ye ko a dencɛ bena kɛ “masa ye i n’a fɔ a faa Dawuda.” N’a sɔrɔ Yusufu ni Mariyamu y’a faamu ko a tun kɔrɔtanin lo Yezu ka wolo Dawuda ka dugu la (Luka 1:32, 33; 2:11, 17). N’a sɔrɔ u y’a miiri ko a ka fisa u ka to o dugu la fɔɔ wagati min na Ala bena cikan wɛrɛw di u ma.

An m’a lɔn Yusufu n’a ka denbaya tun ye wagati hakɛ min kɛ Bɛtilehɛmu tuma min na lɔnnikɛla dɔw nana bɔ u ye. Nka o wagati la, Yusufu n’a ka denbaya tun be boon dɔ lo kɔnɔ (Mat. 2:11). A be komi sanni u ka kɔsegi Nazarɛti, u tora Bɛtilehɛmu ka wagatijan kɛ yen fɔɔ a kɛra u sigiyɔrɔ ye.

Erɔdi ye cii di ko sɔrɔdasiw ka “Bɛtilehɛmu . . . deen cɛmanw bɛɛ faga minw bɛɛ sii ma tɛmɛ saan fila kan.” (Mat. 2:16). Ala ye Yusufu ni Mariyamu lasɔmi o cikan koo la minkɛ, u bolila ka taga ni Yezu ye Ezipiti. U tora yen fɔɔ Erɔdi sanin kɔ. O kɔ, Yusufu y’a ka denbaya minɛ u kɔsegira Nazarɛti. Mun na u ma kɔsegi Bɛtilehɛmu? Sabu o wagati la, Erɔdi dencɛ Arikelayusi lo tun sigira masaya la Zuda mara kun na ani a tun ka fari. Mɛlɛkɛ dɔ tun ye Yusufu lasɔmi fana ko a kana taga yen. Mɔgɔw tun latanganin lo Nazarɛti minkɛ, Yusufu tun be se ka Yezu lamɔ yen walisa a ka kɛ Ala batobaga ye.—Mat. 2:19-22; 13:55; Luka 2:39, 52.

Yanni Yezu ka sa ani ka sababu di mɔgɔ wɛrɛw ma u ka taga sankolo la, a be komi Yusufu tun sara ka ban. O kama, Yusufu suu bena kunu yan le dugukolo kan. Mɔgɔ caaman bena se k’a ye ani k’a ɲininga fɛɛn min kama ale ni Mariyamu tora Bɛtilehɛmu Yezu wolonin kɔ.