Isaiah
3 Koro, sese! ata Ọbọn̄,+ kpa Jehovah mme udịm, ọmọn̄ osio un̄wam ye ibetedem efep ke Jerusalem+ ye ke Judah, ofụri un̄wam uyo ye ofụri un̄wam mmọn̄,+ 2 ọkpọsọn̄ erenowo ye owoekọn̄, ebiereikpe ye prọfet,+ ebreidiọn̄ ye akani eren,+ 3 etubom owo aba ye duop+ ye owo eke ẹtịmde ẹkpono ye ọnọitem ye ata ebre mfọni, ye ata ọkọk-nduọhọ.+ 4 Ndien nyanam n̄kpri nditọiren ẹdi mbọn̄ mmọ, ukara ufịk oyonyụn̄ akara mmọ.+ 5 Ndien mme owo ẹyefịk kiet eken, ekemmọ owo oyonyụn̄ efịk ekemmọ owo.+ Mmọ ẹyesọn̄ọ enyịn, ekpri eyeneren ọyọsọn̄ọ akani eren enyịn,+ owo emi ẹbatde ke usụhọde oyonyụn̄ ọsọn̄ọ owo emi ẹkponode enyịn.+ 6 Koro owo kiet kiet oyomụm eyenete esie ke ufọk ete esie, ete: “Afo emenyene ọfọn̄. Kabade di edidem ufịk+ nọ nnyịn, ndien yak ibombom n̄wụre emi esịne fi ke ubọk.” 7 Enye eyemenede uyo esie ke usen oro ete: “Ndikabakede ndi ọsọbọ unan; uyo m̀mê ọfọn̄ inyụn̄ idụhe ke ufọk mi. Mbufo ẹkûnịm mi nte edidem ufịk ke otu mme owo.”
8 Koro Jerusalem amatuak ukot ọduọ, Judah omonyụn̄ ọduọ,+ koro edeme mmọ ye mme edinam mmọ ẹduede Jehovah,+ ke mmọ ndisọn̄ ibuot ke enyịn enye emi enyenede ubọn̄.+ 9 Nte iso mmọ ẹtiede etie ntiense aban̄a mmọ,+ mmọ ẹnyụn̄ ẹtịn̄ ẹban̄a idiọkn̄kpọ mmọ emi ebietde eke Sodom.+ Mmọ idịpke enye. Mbọm ukpọn̄ mmọ! Koro mmọ ẹmeda afanikọn̄ ẹsọk idemmọ.+
10 Mbufo ẹdọhọ ke ọyọfọn ye edinen owo,+ koro mmọ ẹyedia mbun̄wụm utom mmọ.+ 11 Mbọm idiọkowo!—Afanikọn̄; koro ẹyenam ye enye kpa nte enye akadade ubọk esie anam!+ 12 Amaedi ikọt mi, mbon oro ẹdemede utom ẹnọ mmọ ẹmesọn̄ ido, iban ẹnyụn̄ ẹkara mmọ.+ O ikọt mi, mbon oro ẹdade mbufo usụn̄ ke ẹnam mbufo ẹyo,+ mmọ ẹmenyụn̄ ẹtịmede mme usụn̄ mbufo.+
13 Jehovah ke ada ndin̄wana onyụn̄ adaha ada ndibiere ikpe nnọ mme owo.+ 14 Jehovah ayada n̄kani owo ke otu ikọt esie ye mbọn̄ mmọ aka ikpe.+
“Ndien mbufo ẹmefọp in̄wan̄ vine. Se ẹkebọde owo ukụt ke n̄wo ẹdu ke ufọk mbufo.+ 15 Edinam mbufo ọwọrọ nso, emi mbufo ẹnuakde ikọt mi, ẹnyụn̄ ẹdiọn̄de-diọn̄ ẹfịk mbon ukụt?”+ emi edi uyo Akakan Ọbọn̄ Andikara, kpa Jehovah mme udịm.
16 Ndien Jehovah ọdọhọ ete: “Ke ntak emi nditọiban Zion ẹseride iseri ẹnyụn̄ ẹsan̄ade ẹtop itọn̄ ẹnyụn̄ ẹsuande enyịn use, ẹwerede isan̄, ẹnyụn̄ ẹnamde ikpat mmọ ẹsioro uyo,+ 17 Jehovah n̄ko ayanam etịn̄ibuot nditọiban Zion asiaha ikpọk,+ Jehovah oyonyụn̄ ofụhọde ọkpọiso mmọ enịm in̄wan̄.+ 18 Ke usen oro Jehovah oyosio uyai efep ke okpoho ubọk ye ke uyaraibuot ye ke n̄kpọmbana emi ebietde ọfiọn̄,+ 19 ye ke n̄kpanuen utọn̄ ye ke n̄kpọubọk ye ke ufụhọn̄kpọ,+ 20 ye ke ọfọn̄ ibuot ye ke n̄kpọmbana itọn̄ukot ye ke ubọpisịn+ ye ke ‘otu udọn̄ ufuọn̄n̄kpọ’* ye ke n̄kpọmbana emi anamde uyom,+ 21 ye ke n̄kpanuen ubọk ye ke n̄kpanuen ibuo,+ 22 ye ke ewụra akpan edinam ye ke n̄kpọhọde ewụra ye ke akwa ọfọn̄idem ye ke ekpatokụk, 23 ye ke n̄kpri ukụtiso+ ye ke ọfọn̄ idakidem ye ke mbọbọ ibuot+ ye ke akamba ufụhọn̄kpọ.+
24 “Ndien ama ekem utu ke ufuọn̄ aran balsam,+ un̄waha; utu ke ubọpisịn, urụk; utu ke ndudiọn̄ edidọk idet, ibọ;+ utu ke ediye ọfọn̄idem, ọfọn̄ ntuan̄a;+ mbọn ikan̄+ utu ke uyai. 25 Irenowo fo ẹyeduọn̄ọ ke akan̄kan̄, n̄kpọsọn̄ owo fo ẹyenyụn̄ ẹduọn̄ọ ke ekọn̄.+ 26 Ndien mme inuaotop esie ẹyetuan̄a+ ẹnyụn̄ ẹfụhọ, ẹyenyụn̄ ẹnam enye ana ukpọk. Enye oyosụhọde etie ke isọn̄.”+