Ibuot 10
Isan̄ Uka Jerusalem
INI-UTỌ ọmọbiọn̄ọde. Ndien edi ini ọnọ ubon Joseph, ọkọrọ ye mme ufan ye iman, ndinam isan̄ ini-utọ eke isua ke isua mmọ n̄ka Jerusalem man ẹkenịm usọrọ Passover. Nte mmọ ẹdahade isan̄ oro edide n̄kpọ nte itiat 65, nduaidem oro esidude kpukpru ini omodu. Jesus edi isua 12 ke emana idahaemi, ndien enye omodori enyịn ye akpan udọn̄ aban̄a usọrọ oro.
Kaban̄a Jesus ye ubon esie, Passover idịghe n̄kpọ usen kiet. Mmọ n̄ko ẹsitie man ẹdụk Usọrọ Uyo eke Leaven Mîdụhe oro etienede ke usen itiaba, emi mmọ ẹbatde nte ubak ini Passover. Nte utịp, ofụri isan̄ oro ọtọn̄ọde ke ufọk mmọ ke Nazareth, ọkọrọ ye edidu ke Jerusalem, ada n̄kpọ nte urua iba. Edi isua emi, ke ntak n̄kpọ oro abuanade Jesus, enye ebịghi akan oro.
Ẹdiọn̄ọ mfịna oro ke usụn̄ unyọn̄ Jerusalem. Joseph ye Mary ẹkere ẹte ke Jesus odu ke otu mme iman m̀mê mme ufan oro ẹsan̄ade kiet. Edi owo ikwe enye ke ini ẹyomde ndidan̄ ke okoneyo oro, ndien mmọ ẹdụk ẹyom enye ke otu mbonisan̄ mmọ. Owo ikwe enye. Ntre Joseph ye Mary ẹfiak ẹka Jerusalem ndiyom enye.
Mmọ ẹda ofụri usen kiet ẹyom enye edi ikwe. Mmọ inyụn̄ ikemeke ndikụt enye ke ọyọhọ usen iba. Ke akpatre, ke ọyọhọ usen ita, mmọ ẹka ke temple. Do, ke ubet kiet, mmọ ẹkụt Jesus etiede ke ufọt mme Jew ẹdide mme andikpep, ke akpan̄ utọn̄ ọnọ onyụn̄ obụp mmọ mbụme.
Mary obụp ete, “Eyen mi, nsinam anamde ntem ye nnyịn? Sese, usọ ye ami imasan̄a iyom Fi ye mfụhọ.”
Jesus odu ke n̄kpaidem nte mmọ mîkọfiọkke ebiet emi ẹkpekụtde imọ. Enye obụp ete, “Nsidi ntak eke mbufo ẹyomde Mi? Nte ifiọkke ite, nnyene ndidu ke ufọk Ete Mi?”
In̄wan̄ake Jesus ntak emi ete ye eka esie mîkpọfiọkke iban̄a emi. Ekem, Jesus etiene ete ye eka esie ọnyọn̄ ufọk onyụn̄ akaiso osụk ibuot ọnọ mmọ. Enye ọdọdiọn̄ ọkọri ke eti ibuot ye idaha onyụn̄ okụt mfọn ke iso Abasi ye owo. Ih, toto ke uyen esie akaiso, Jesus omonịm eti uwụtn̄kpọ ke ndiyom mme ufọn n̄kpọ eke spirit ọkọrọ ye ediwụt ukpono nnọ ete ye eka esie. Luke 2:40-52; 22:7.
▪ Nso isan̄ ini-utọ ke Jesus esinam kpukpru ini ye ubon esie, ndien esibịghi adan̄a didie?
▪ Nso itịbe ke isan̄ oro mmọ ẹnamde ke ini Jesus edide isua 12 ke emana?
▪ Nso uwụtn̄kpọ ke Jesus onịm ọnọ mme uyen mfịn?