Ibuot 48
Ndikpọn̄ Ufọk Jairus Nnyụn̄ Mfiak N̄ka Nazareth
USEN oro ọkọyọhọ ye utom ọnọ Jesus—ndiwat ke ubom nnyọn̄ Decapolis ndi, ndinam n̄wan oro ọkọdọn̄ọde uwọrọ iyịp okop nsọn̄idem, ndinyụn̄ nnam eyen-an̄wan Jairus eset ke n̄kpa. Edi usen oro ibehe ifep kan̄a. Ke akpanikọ, nte Jesus ọkpọn̄de ufọk Jairus, nnan iba ẹtiene enye ke edem, ẹfiori ẹte: “Eyen David, tua nnyịn mbọm.”
Ke ndikot Jesus “Eyen David,” irenowo ẹmi ke ntem ẹwụt ke imonịm ke akpanikọ ite ke Jesus edi adia akpa ebekpo David, ntre ke enye edi Messiah oro ẹken̄wọn̄ọde. Nte ededi, etie nte Jesus esịn ndinọ un̄wam oro mmọ ẹyomde, ndusụk ndidomo ime mmọ nse. Edi irenowo ẹmi ikpaha mba. Mmọ ẹtiene Jesus ẹka ebiet emi enye odude, ndien ke ini enye odụkde ufọk, mmọ ẹtiene enye ẹdụk esịtufọk.
Do Jesus obụp ete: “Nte mbufo ẹmenịm ke akpanikọ ẹte, mmekeme ndinam n̄kpọ emi?”
Mmọ ẹbọrọ uko uko ẹte, “Nnyịn imonịm, Ọbọn̄.”
Ntre, ke otụkde enyịn mmọ, Jesus ọdọhọ ete: “Yak osu ọnọ mbufo nte mbuọtidem mbufo edide.” Ndondo oro mmọ ẹkeme ndikụt usụn̄! Jesus ndien ọsọn̄ọ owụk mmọ ete: “Ẹtịm ẹse ẹte owo baba kiet okûfiọk.” Edi sia ẹyọhọde ye idatesịt, mmọ ẹfụmi ewụhọ Jesus ẹnyụn̄ ẹtịn̄ ẹban̄a enye ke ofụri n̄kann̄kụk oro.
Ndondo oro irenowo ẹmi ẹnyọn̄ọde, mme owo ẹda owo emi demon odụn̄de ke idem, emi demon anamde enye akabade edi imụm, ẹdi. Jesus ebịn demon oro efep, ndien ke ebe oro, eren oro ọtọn̄ọ nditịn̄ ikọ. Otuowo ẹdu ke n̄kpaidem ke mme utịben̄kpọ ẹmi, ẹdọhọde ẹte: “Akananam owo ikwe orụk n̄kpọ eke etiede ntem ke Israel.”
Mme Pharisee ẹdu do n̄ko. Mmọ ikemeke ndineni utịben̄kpọ oro, edi ke idiọk unana edinịm ke akpanikọ mmọ, mmọ ẹfiak ẹtịn̄ edori ikọ mmọ ẹban̄a itie emi utom odudu Jesus ẹtode, ẹdọhọde ẹte: “Enye ada odudu ọbọn̄ mme demon ebịn mme demon ọduọk.”
Ibịghike ke n̄kpọntịbe ẹmi ẹbede, Jesus ọnyọn̄ edi obio emana esie, Nazareth, ye mme mbet esie ẹsan̄ade ye enye ke isan̄ enyeemi. Ke n̄kpọ nte isua kiet ke edem edem, enye ama aka synagogue onyụn̄ ekekpep mme owo n̄kpọ do. Okposụkedi mme owo oro ke akpa ẹkekopde n̄kpaidem ke inem inem ikọ esie, ke ukperedem mmọ ẹma ẹyat esịt ke ukpepn̄kpọ esie ẹnyụn̄ ẹdomo ndiwot enye. Kemi, Jesus ke mbọm afiak esịn ukeme ndin̄wam n̄kani mbọhọidụn̄ esie.
Ke adan̄aemi mme owo ẹkebụn̄ọde ẹtiene Jesus ke mme itie efen, ke akpanikọ, mmọ inamke ntre mi. Ntre, ke Sabbath, enye aka synagogue ndikpep mme owo n̄kpọ. Ediwak mmọemi ẹkpan̄de utọn̄ ẹnọ enye ẹdu ke n̄kpaidem. Mmọ ẹbụp ẹte, “Owo emi ada ọniọn̄ emi ye utom odudu emi ke m̀mọ̀n̄? Nte Enye idịghe eyen anamusọ? Nte eka Esie ikereke Mary? Nte nditọeka Esie inyụn̄ ikereke James, ye Joseph, ye Simon, ye Judas? Nte kpukpru nditọeka Esie iban inyụn̄ idụhe ye nnyịn? Ke m̀mọ̀n̄ ndien ke owo emi ada kpukpru n̄kpọ ẹmi?”
Mmọ ẹkọk ibuot ẹte, ‘Jesus akam edi owo n̄kann̄kụk emi nte nnyịn. Nnyịn ima ikụt nte enye ọkọride, imọnyụn̄ ifiọk ubon esie. Didie ke enye ekeme ndidi Messiah?’ Mmọdo, kpa ye ofụri n̄kpọ ntiense oro ẹdude—akwa ọniọn̄ ye utịben̄kpọ esie—mmọ ẹsịn enye. Idem mme iman esie, ke ntak mmọ ẹtịmde ẹmehe ye enye, ẹduọ ke ntak esie, anamde Jesus eberi ete: “Prọfet inanake ukpono ke mîbọhọke ke obio emana esie, ye ke ufọk esie.”
Ke akpanikọ, unana mbuọtidem mmọ akpa Jesus idem. Ntre enye inamke baba utịben̄kpọ kiet do ke ebede enye ndidori mbon udọn̄ọ ifan̄ ubọk nnyụn̄ nnam mmọ ẹkop nsọn̄idem. Matthew 9:27-34; 13:54-58; Mark 6:1-6; Isaiah 9:7.
▪ Ke ndikot Jesus “Eyen David,” nso ke mme nnan oro ẹwụt nte inịmde ke akpanikọ?
▪ Nso ubiere ke mme Pharisee ẹsịm kaban̄a mme utịben̄kpọ Jesus?
▪ Ntak emi owụtde mbọm ke Jesus ndifiak n̄ka n̄kan̄wam mbon oro ẹdude ke Nazareth?
▪ Didie ke mme owo ẹdara Jesus ke Nazareth, ndien ntak-a?