Ibuot 74

Item Ẹnọde Martha, ye Ntọt Kaban̄a Akam

KE ISAN̄ ukwọrọikọ Jesus ke Judea, enye odụk obio-in̄wan̄ Bethany. Emi edi ebiet oro Martha, Mary, ye eyeneka eren mmọ, Lazarus, ẹdụn̄de. Eyedi Jesus ama ososobo ye mmọ mbita ẹmi mbemiso ke ini utom ukwọrọikọ esie ndien ke ntem ama ededi n̄kpet n̄kpet ufan mmọ. Ke idaha ekededi, Jesus idahaemi aka ufọk Martha ndien Martha adara edidi esie.

Martha enyene udọn̄ ndinọ Jesus ata mfọn n̄kan n̄kpọ oro enye enyenede. Ke akpanikọ, edi akwa ukpono owo ndikụt Messiah oro ẹken̄wọn̄ọde awahade ke ufọk esie! Ntem, Martha esịn idem ke nditem ọkpọmiọk udia ndinyụn̄ nse mban̄a ediwak n̄kpọ eken oro odiomide ndinam Jesus okop inemesịt ye ifụre oro okponde akan ke ediwaha esie.

Ke n̄kan̄ eken, Mary, eyeneka Martha etie ke isọn̄ ke ukot Jesus onyụn̄ akpan̄ utọn̄ ọnọ enye. Ke esisịt ini ebede, Martha asan̄a ekpere onyụn̄ ọdọhọ Jesus ete: “Ọbọn̄, nte ukereke emi eyeneka mi ọkpọn̄de utom ọnọ mi ikpọn̄? Dọhọ enye edi edin̄wam mi nan̄a.”

Edi Jesus imaha nditịn̄ baba n̄kpọ kiet ye Mary. Utu ke oro, enye ọnọ Martha item ke ndikere mban̄a n̄kpọ obụkidem mbe ubọk. Enye ke mfọnido asua ọnọ ete: “Martha, Martha, afo ayak ediwak n̄kpọ ẹtịmede fi ekikere, ẹnyụn̄ ẹnọ fi afanikọn̄: n̄kpọ kiet edi se nyomde.” Jesus ọdọhọ ke ufọn idụhe ndibiat ekese ini ntem ediwak orụk udia ke udia ini kiet. Esisịt kpọt, mîdịghe sụk orụk udia kiet kpọt ekem.

Uduak Martha edi eti; enye oyom ndidi enyeneufọk oro atatde ubọk. Edi, ke enye ndinọ ọkpọsọn̄ ntịn̄enyịn ke mme n̄kpọ obụkidem, enye ke ọduọk ifet ndibọ ọkpọ ọkpọ item nto Eyen Abasi! Ntre Jesus eberi ke ndidọhọ: “Koro Mary ememek eti udeme, eke mîdibọhọ enye ifep.”

Ekem, ke idaha efen, mbet kiet obụp Jesus ete: “Ọbọn̄, kpep nnyịn ndibọn̄ akam, kpa nte John onyụn̄ ekpede mbet esie.” Ekeme ndidi mbet emi ikodụhe ke n̄kpọ nte isua kiet ye ubak oro ẹkebede ke ini Jesus ọkọnọde akam uwụtn̄kpọ ke Ukwọrọikọ esie oro ke Obot. Ntre Jesus afiak ọnọ mme item esie edi ekem akaiso ndinọ uwụtn̄kpọ man ọsọn̄ọ owụt ufọn oro odude ke ndikọbọ ke edibọn̄ akam.

Jesus ọtọn̄ọ ete, “Anie ke otu mbufo edinyene ufan, edinyụn̄ adaha etiene enye ke ufọt okoneyo, onyụn̄ ọdọhọ enye ete, Ufan, buọt mi uyo ita; koro ufan mi kiet, emi asan̄ade isan̄, ama edi ke ufọk mi, ndien nnyeneke se nnịmde enye ke iso: ndien enyeemi odude ke esịtufọk edibọrọ ete, Kûnọ mi afanikọn̄: mmesesịn usụn̄; ami ye nditọ mi imodụk; n̄kemeke ndidaha nnọ fi. Ndọhọ mbufo nte, okposụkedi nte enye mîdidahake inọ enye ke ntak ufan, edi koro owo [oro] ­eyịrede, enye eyedaha ke enyọn̄ ọnọ enye adan̄a nte enye oyomde.”

Ke edimen ndomo emi, Jesus iwụtke ke se imọ itịn̄de ọwọrọ nte ke Jehovah Abasi isinyịmeke ndiyere mme eben̄e, nte ufan oro akanamde ke mbụk esie. Baba, edi enye ọnọ uwụtn̄kpọ ete ke edieke ufan oro etiede mmen̄e mmen̄e edinyịmede ọnọ mme eben̄e oro ẹyịrede, n̄wan̄waedinso ke ima ima Ete nnyịn eke heaven mîdinyịmeke! Ntem Jesus akaiso ete: “Ntre ke ndọhọ mbufo nte, Ẹben̄e, ndien ẹyenọ mbufo; ẹyom, ndien mbufo ẹyekụt; ẹtuak, ndien ẹyesio usụn̄ ẹnọ mbufo. Koro kpukpru owo eke ẹben̄ede ẹbọde; owo eke oyomde okụtde; ẹdinyụn̄ ẹsiode usụn̄ ẹnọ owo eke atuakde.”

Jesus ndien etịn̄ otụk mme anamidiọk, ete unana mfọnmma, ọdọhọde ete: “Ewe ete odu ke otu mbufo eke edinọde eyen itiat, ke ini eyen eben̄ede enye uyo; m̀mê edinọde eyen ­urụkikọt ke ibuot iyak ke ini eyen eben̄ede enye iyak; m̀mê edinọde eyen ikpeyen, ke ini eyen eben̄ede enye nsen­unen? Mmọdo edieke mbufo ẹmi ẹdiọkde ẹfiọkde ndinọ nditọ mbufo nti ­enọ, adan̄a didie akan oro ke Ete mbufo ­ke heaven ediyak edisana spirit ọnọ mmọ eke ẹben̄ede Enye?” Ke akpanikọ, nso nsịnudọn̄ oro ­edemede ukpọn̄ ke Jesus ọnọ ntem ete iyịre ke edibọn̄ akam. Luke 10:⁠38–11:⁠13.

▪ Ntak emi Martha anamde utọ akwa ntịmidem ntre eben̄e Jesus?

▪ Nso ke Mary anam, ndien ntak emi Jesus otorode enye utu ke ndi­toro Martha?

▪ Nso inam Jesus afiak ọnọ mme item esie kaban̄a akam?

▪ Didie ke Jesus owụt ufọn edikọbọ ke akam?