Ibuot 129

Mme N̄kaiso Ediwụt Idem

MME mbet ẹsụk ẹtie mfụhọ mfụhọ. Mmọ itịmke ifiọk ntak emi udi anade ukpọk, m̀mê mmọ ndinịm mbụk iban oro ke akpanikọ. Ntre nte ini akade ke Sunday oro, Cleopas ye mbet en̄wen ẹkpọn̄ Jerusalem ẹka Emmaus, emi oyomde usụn̄ ke n̄kpọ nte itiat itiaba.

Ke usụn̄ isan̄, ke adan̄aemi mmọ ẹsụk ẹnemede ẹban̄a mme n̄kpọntịbe usen oro, esenowo adiana ye mmọ. Enye obụp ete, “Nso orụk nneme ke ẹneme ntem ke isan̄ mbufo?”

Mbet ẹmi ẹtuak ẹda, iso mmọ ẹnyụn̄ ẹtie mfụhọ mfụhọ, ndien Cleopas ọbọrọ ete: “Nte Afo kpọt edi esenowo ke Jerusalem, ndien ufiọkke se ikotịbede do ke usen ifan̄ ẹmi?” Enye obụp ete, “Nso idi oro?”

“Se iban̄ade Jesus emi otode Nazareth,” ntre ke mmọ ẹbọrọ. “Ikpọ oku ye mme andikara nnyịn ẹma ẹyak enye ẹnọ ubiereikpe n̄kpa ẹnyụn̄ ẹwot enye ke eto. Edi nnyịn ikodori enyịn ite ke owo emi ekedi enyeemi ẹkenịmde ndifak Israel.”—NW.

Cleopas ye nsan̄a esie ẹnam mme utịbe utịbe edinam eke usen oro an̄wan̄a—mbụk aban̄ade utịbe utịbe edikụt mme angel ye udi ndina ukpọk—edi ekem ẹyarade editịmede esịt mmọ kaban̄a se n̄kpọ ẹmi ọwọrọde. Esenowo oro asua ọnọ mmọ ete: “O mbon ẹmi ẹnanade ibuot, ẹmi mîsọpke ndinịm kpukpru se mme prọfet ẹketịn̄de ke akpanikọ. Nte inaha nte Christ okụt mme ukụt ẹmi, ndien ebe odụk ke Ubọn̄ Esie?” Enye ndien anam mme ufan̄ikọ ẹtode edisana uwetn̄kpọ ẹmi aban̄ade Christ an̄wan̄a mmọ.

Ke akpatre mmọ ẹsan̄a ẹkpere Emmaus, ndien esenowo oro anam nte n̄kpọ eke oyomde ndibe n̄ka iso. Ke ẹyomde ndikop ikọ efen efen, mbet ẹmi ẹkpak ẹte: “Dan̄ ye nnyịn; koro ke ekpere mbubịteyo.” Ntre enye etie ndidia udia. Nte enye ọbọn̄de akam onyụn̄ obụn̄de uyo ayak ọnọ mmọ, mmọ ẹfiọk ẹte ke enye ke akpanikọ edi Jesus ke idem eke owo oro emende-men ọfọrọ. Edi adan̄aoro enye osop mmọ ke enyịn.

Idahaemi mmọ ẹfiọk nte esenowo oro ekenyenede ifiọk ntre! Mmọ ẹbụp ẹte: “Nte esịt ikofiopke nnyịn, ke ini Enye enemede nneme ye nnyịn ke usụn̄, onyụn̄ asiakde ikọ Abasi ọnọ nnyịn?” Ye unana ubiatini, mmọ ẹdaha ke enyọn̄ ẹnyụn̄ ẹsọsọp ẹsan̄a ofụri anyanusụn̄ oro ẹfiak ke Jerusalem, ke ebiet emi mmọ ẹkụtde mme apostle ye mmọemi ẹsopde idem ye mmọ. Mbemiso Cleopas ye nsan̄a esie ẹkemede ndisioro uyo, mbon eken ke nduaidem ẹbụk ẹte: “Ọbọn̄ emeset ke akpanikọ, omonỵụn̄ owụt Simon idem.” Ekem owo iba ẹmi ẹbụk nte Jesus okonyụn̄ owụtde mmimọ idem n̄ko. Emi anam ọyọhọ utịm ikanan̄ ke usen oro enye owụtde nsio nsio mbet esie idem.

Jesus inikiet inikiet owụt idem ọyọhọ utịm ikotion. Idem okposụkedi ẹkọbide usụn̄ ke ntak emi mme mbet ẹkopde ndịk ẹban̄a mme Jew, enye odụk, ada ke ufọt mmọ, onyụn̄ ọdọhọ ete: “Emem akpakam odu ye mbufo.” Mmọ ẹkop ndịk, ẹkerede ẹte ke mmimọ ikụt spirit. Ntre, ke anamde an̄wan̄a nte ke imọ idịghe ekpo, Jesus ọdọhọ ete: “Nsinam esịt etịmerede mbufo, nsinyụn̄ inam eyịghe otịbede mbufo ke esịt? Ẹse ubọk ye ukot Mi, ẹfiọk ete edi Ami ke Idem Mi; ẹfiọn̄ọ Mi, ẹnyụn̄ ẹse: koro spirit inyeneke obụk ye ọkpọ nte mbufo ẹkụtde Ami nnyenede.” Kpa ye oro, mmọ ẹsụk ẹmemen̄e ndinịm ke akpanikọ.

Man an̄wam mmọ ẹdiọn̄ọ ke imọ ke akpanikọ idi Jesus, enye obụp ete: “Nte mbufo ẹmenyene se owo adiade mi?” Ke ọbọde ibio ọfọp iyak ata, enye ọdọhọ ete: “Emi edi ikọ eke n̄ketịn̄de ye mbufo, ke adan̄aemi n̄kodude ye mbufo [mbemiso n̄kpade]; nte, kpukpru se ẹkewetde ẹban̄a Mi ke ibet Moses ye mme prọfet ye mme psalm ẹnyene ndisu.”

Nte utịp, ke akade iso ke se idade iban̄a ukpepn̄kpọ Bible ye mmọ, Jesus ekpep ete: “Ẹkewet ntem, ẹte Christ enyene ndikpa, ndinyụn̄ ntọn̄ọ ntak nset ke n̄kpa ke ọyọhọ usen ita: ẹnyụn̄ ẹnyene nditọn̄ọ ke Jerusalem n̄kwọrọ edikabade esịt ye edifen mme idiọkn̄kpọ ke enyịn̄ Esie nnọ kpukpru mme idụt. Mbufo ẹdi mme ntiense n̄kpọ ẹmi.”

Ke ndusụk ntak Thomas idụhe ke akpan mbono mbubịteyo Sunday emi. Ntre ke usen ẹmi ẹtienede, mbon eken ẹsian enye ye idatesịt ẹte: “Nnyịn imokụt Ọbọn̄.”

Thomas afan̄a ete, “Ndinịmke ke akpanikọ ibọhọke ini n̄kụt[de] nde okpukwak ke ubọk Esie, nnyụn̄ nsịn nnuenubọk mi ke nde okpukwak, nnyụn̄ nsịn ubọk mi ke n̄kan̄ Esie.”

Ọfọn, usen itiaita ke ukperedem mme mbet ẹtọn̄ọ ntak ẹbono ke esịtufọk. Isan̄ enyeemi Thomas odu ye mmọ. Okposụkedi ẹkọbide mme usụn̄, Jesus inikiet efen ada ke ufọt mmọ onyụn̄ ọdọhọ ete: “Emem osụk odu ye mbufo.” Ekem, ke ọwọn̄ọrede ebịne Thomas, enye ọdọhọ ete: “Nyan nnuenubọk fo, se ubọk Mi; nyụn̄ nyanade ubọk fo sịn ke n̄kan̄ Mi: kûnyụn̄ unana mbuọtidem, edi nịm ke akpanikọ.”

Thomas ofiori ete, “Ọbọn̄ mi ye Abasi mi.”

Jesus obụp ete, “Sia ama okokụt Mi, omonịm ke akpanikọ? Ọfọfọn ọnọ mmọemi mîkekwe, edi ẹnịmde ke akpanikọ.” Luke 24:​11, 13-48; John 20:​19-29.

▪ Nso mbụme ke esenowo obụp mbet iba ke usụn̄ ẹkade Emmaus?

▪ Nso ke esenowo oro etịn̄ emi anamde esịt mbet ẹmi ofiop?

▪ Mbet ẹmi ẹsan̄a didie ẹfiọk enyeemi esenowo emi edide?

▪ Ke ini Cleopas ye nsan̄a esie ẹfiakde ẹnyọn̄ọ Jerusalem, nso nduaidem nduaidem mbụk ke mmọ ẹkop?

▪ Ewe ediwụt idem ọyọhọ utịm ikotion ke Jesus owụt mbet esie, ndien nso itịbe ke ini oro?

▪ Nso itịbe ke usen itiaita ẹma ẹkebe nte Jesus okowụt idem ọyọhọ utịm ikotion, ndien didie ke Thomas onịm ke akpanikọ ke akpatre ete ke Jesus odu uwem?