Mme Spirit Ikodụhe Uwem Inyụn̄ Ikpan̄a ke Isọn̄
Adam okoto ntan, onyụn̄ afiak ke ntan
Mme spirit ẹdu! Ke obio mme spirit oro enyịn mîkwe, nti ye ndiọi spirit ẹdu. Nte mmọ ẹdi mme owo oro ẹma ẹkedodu uwem ẹnyụn̄ ẹkpan̄a ke isọn̄?
Baba, mmọ idịghe. Ke ini owo akpade, enye isibehe ntre ika obio mme spirit, nte ediwak owo ẹkerede. Nnyịn isan̄a didie ifiọk emi? Koro Bible etịn̄ ntre. Bible edi n̄wed akpanikọ emi otode n̄kukụre Abasi akpanikọ edi, emi enyịn̄ esie edide Jehovah. Jehovah okobot mme owo; enye ọdiọn̄ọ mfọn mfọn se isitịbede inọ mmọ ke ini mmọ ẹkpan̄ade.—Psalm 83:18; 2 Timothy 3:16.
Bible ọdọhọ ete ke Abasi okobot Adam, akpa erenowo oro, “ke ntan isọn̄.” (Genesis 2:7) Abasi ama esịn enye ke Paradise, kpa in̄wan̄ Eden. Ke ekpedide Adam ama onịm ibet Jehovah, enye ikpakakpaha; enye okposụk ododu uwem ke isọn̄ mfịn. Edi ke ini Adam okokoide-koi abiat ibet Abasi, Abasi ama ọdọhọ enye ete: “[Afo eyefiak] ke isọn̄ emi ẹsiode fi ke esịt: koro afo edide ntan, eyenyụn̄ afiak ke ntan.”—Genesis 3:19.
Nso ke emi ọwọrọ? Ọfọn, Adam okodu m̀mọ̀n̄ mbemiso Jehovah akadade ntan obot enye? Enye ikoduhe. Enye ikedịghe spirit oro mîmanake kan̄a ke heaven. Enye ikodụhe uwem. Ntre ke ini Jehovah ọkọdọhọde ete ke Adam ‘eyefiak ke ntan,’ ikọ esie ọkọwọrọ ete ke Adam eyekpa. Enye ikebehe ika obio mme spirit. Ke ini akakpade, Adam inikiet efen ama akabade anana uwem, idụhe uwem. N̄kpa edi unana uwem.
Edi nso kaban̄a mbon eken oro ẹma ẹkekpan̄a? Nte mmọ n̄ko idụhe uwem? Bible ọbọrọ ete:
“Kpukpru [mme owo ye mme unam] ẹka ọtọkiet: kpukpru ẹto ke ntan: kpukpru ẹyenyụn̄ ẹfiak ke ntan.”—Ecclesiastes 3:20.
“Mme akpan̄kpa . . . ifiọkke baba n̄kpọ kiet.”—Ecclesiastes 9:5.
“Ima mmọ, ye usua mmọ, ye ufụp mmọ ẹmetak ẹma.”—Ecclesiastes 9:6.
“Koro baba edinam, baba uduak, baba ifiọk, baba mbufiọk mîdụhe ke obio ekpo [udi] emi afo akade do.”—Ecclesiastes 9:10.
“[Owo] afiak ke ntan esie; ke kpasụk usen oro mme uduak esie ẹtak.”—Psalm 146:4.
Mme odu-uwem ikpọn̄ikpọn̄ ẹkeme ndinam mme n̄kpọ emi
Ndi mme itien̄wed Abasi ẹmi ẹsọn̄ fi idem ndinịm? Edieke edide ntre, kere ban̄a emi: Ke ediwak ubon, erenowo esinam utom ọbọ okụk man an̄wam mbonufọk esie. Ke ini eren oro akpade, ubon esie nte ido edide ẹsisobo nsọn̄ọn̄kpọ. Ndusụk ini n̄wan ye nditọ esie isikam inyeneke-nyene okụk oro ekemde ndida ndep udia. Iso-ọfọn mme asua eren oro ẹyesụn̄i mmọ. Idahaemi bụp idemfo: ‘Edieke eren oro odude uwem ke ererimbot mme spirit, ntak emi enye mîkaha iso ndinọ se ubon esie oyomde? Ntak emi enye mîkpemeke ubon esie isio ndiọi owo ke ubọk?’ Ntak edi koro mme itien̄wed Abasi oro ẹnende. Eren oro inyeneke uwem, ikemeke ndinam baba n̄kpọ kiet.—Psalm 115:17.
Mme akpan̄kpa ikemeke ndin̄wam mbon ọ-biọn̄ m̀mê ndikpeme mbon oro ẹsuenede
Ndi emi ọwọrọ ke mme akpan̄kpa idifiakke idinyene uwem aba tutu amama? Baba, iwọrọke ntre. Nnyịn iyeneme n̄kpọ iban̄a ediset ke n̄kpa ke ukperedem. Edi enye ọwọrọ ete ke mme akpan̄kpa ifiọkke se afo anamde. Mmọ ikemeke ndikụt fi, ndikop se etịn̄de, m̀mê nditịn̄ ikọ nnọ fi. Afo unyeneke ndifehe mmọ. Mmọ ikemeke ndin̄wam fi, mmọ inyụn̄ ikemeke ndinọ fi unan.—Ecclesiastes 9:4; Isaiah 26:14.