Ukpepn̄kpọ 2
Anie Edi Abasi?
Anie edi ata Abasi, ndien nso idi enyịn̄ esie? (1, 2)
Nso orụk idem ke enye enyene? (3)
Nso idi mme n̄wọrọnda edu esie? (4)
Ndi akpana nnyịn ikama ndisọi mbiet ye mme idiọn̄ọ ke utuakibuot oro ituakde inọ enye? (5)
Nso idi usụn̄ iba ẹmi nnyịn ikemede ndikpep n̄kpọ mban̄a Abasi? (6)
1. Mme owo ẹtuak ibuot ẹnọ ediwak n̄kpọ. Edi Bible asian nnyịn ete ke ATA Abasi kiet kpọt odu. Enye okobot kpukpru n̄kpọ ke heaven ye ke isọn̄. Koro enye ọkọnọde nnyịn uwem, enye edi n̄kukụre Owo oro nnyịn ikpatuakde ibuot inọ.—1 Corinth 8:5, 6; Ediyarade 4:10b.
2. Abasi enyene ediwak udorienyịn̄ edi enyene enyịn̄ kiet kpọt. Enyịn̄ oro edi JEHOVAH. Ke ata ediwak Bible, ẹma ẹsio enyịn̄ Abasi ẹfep ẹma ẹnyụn̄ ẹda mme udorienyịn̄ nte ỌBỌN̄ m̀mê ABASI ẹsịn ke itie esie. Edi ke ini ẹkewetde Bible, enyịn̄ oro Jehovah ama esịne ke esịt esie ke n̄kpọ nte utịm ike 7,000!—Exodus 3:15; Psalm 83:18.
3. Jehovah enyene idem, edi enye itiehe nte eke nnyịn. Bible ọdọhọ ete: “Abasi edi spirit.” (John 4:24) Spirit edi uduot uwem oro enen̄erede okon̄ akan eke nnyịn. Akananam owo ndomokiet ikwe Abasi. Jehovah odụn̄ ke heaven, edi enye ekeme ndikụt kpukpru n̄kpọ. (Psalm 11:4, 5; John 1:18) Nso, ndien, idi edisana spirit? Enye idịghe owo nte Abasi. Utu ke oro, enye edi anamutom odudu Abasi.—Psalm 104:30.
4. Bible ayarade edu Jehovah ọnọ nnyịn. Enye owụt ete ke mme n̄wọrọnda edu esie ẹdi ima, unenikpe, ọniọn̄, ye odudu. (Deuteronomy 32:4, NW; Job 12:13, NW; Isaiah 40:26; 1 John 4:8) Bible asian nnyịn ete ke enye n̄ko esiwụt mbọm, ọfọn ido, efen ọnọ, atat ubọk, onyụn̄ eme ime. Nnyịn, nte mme okopitem nditọ, ikpenyene ndidomo ndikpebe enye.—Ephesus 5:1, 2.
5. Ndi akpana nnyịn inụhọ m̀mê ibọn̄ akam inọ ndisọi mbiet, ndise, m̀mê mme idiọn̄ọ ke utuakibuot nnyịn? Baba-o! (Exodus 20:4, 5) Jehovah ọdọhọ ke nnyịn inyene ndituak ibuot nnọ imọ kpọt. Enye idibuanake ubọn̄ esie ye owo ndomokiet m̀mê n̄kpọ efen ekededi. Edisọi mbiet inyeneke odudu ndomokiet ndin̄wam nnyịn.—Psalm 115:4-8; Isaiah 42:8.
6. Didie ke nnyịn ikeme ndinen̄ede ndiọn̄ọ Abasi? Usụn̄ kiet edi ndise mme n̄kpọ oro enye okobotde nnyụn̄ n̄kere ntotụn̄ọ ntotụn̄ọ mban̄a se mmọ ẹtịn̄de ẹnọ nnyịn. Mme n̄kpọ obot Abasi ẹwụt nnyịn ẹte ke enye enyene akwa odudu ye ọniọn̄. Nnyịn imokụt ima esie ke ofụri n̄kpọ oro enye anamde. (Psalm 19:1-6; Rome 1:20) Usụn̄ efen oro nnyịn ikemede ndikpep n̄kpọ mban̄a Abasi edi ndikpep Bible. Ke esịt esie enye asian nnyịn ata ekese n̄kpọ aban̄a orụk Abasi oro enye edide. Enye n̄ko etịn̄ ọnọ nnyịn aban̄a uduak esie ye se enye oyomde nnyịn inam.—Amos 3:7; 2 Timothy 3:16, 17.
[Mme ndise ke page 5]
Nnyịn ikpep n̄kpọ iban̄a Abasi ebe ke n̄kpọ obot ye Bible