Ukpepn̄kpọ 6
Nso Idi Obio Ubọn̄ Abasi?
Obio Ubọn̄ Abasi odu ke m̀mọ̀n̄? (1)
Anie edi Edidem esie? (2)
Nte mbon en̄wen ẹbuana ke ndikara ye Edidem oro? Edieke edide ntre, owo ifan̄? (3)
Nso iwụt ite ke nnyịn idu uwem ke ukperedem ini? (4)
Nso ke Obio Ubọn̄ Abasi edinam ọnọ ubonowo ke ini iso? (5-7)
1. Ke ini enye okodude ke isọn̄, Jesus ama ekpep mme anditiene enye ndibọn̄ akam nyom Obio Ubọn̄ Abasi. Obio ubọn̄ edi ukara oro edidem akarade. Obio Ubọn̄ Abasi edi san̄asan̄a ukara. Ẹwụk enye ke heaven ndien eyekara isọn̄ emi. Enye eyenam enyịn̄ Abasi asana. Enye eyenam ẹnam uduak Abasi ke isọn̄ kpa nte ẹnamde ke heaven.—Matthew 6:9, 10.
2. Abasi ama ọn̄wọn̄ọ ete ke Jesus eyekabade edi Edidem Obio Ubọn̄ Imọ. (Luke 1:30-33) Ke ini Jesus okodude ke isọn̄, enye ama owụt ete ke imọ ididi Andikara oro ọfọnde ido, enende, onyụn̄ ọfọnde ama. Ke ini enye akafiakde ọnyọn̄ heaven, owo ikodorike enye ndondo oro ke ebekpo nte Edidem Obio Ubọn̄ Abasi. (Mme Hebrew 10:12, 13) Ke 1914, Jehovah ama ọnọ Jesus odudu oro Enye ọkọn̄wọn̄ọde ndinọ enye. Toto ke ini oro, Jesus amakara ke heaven nte Edidem oro Jehovah emekde.—Daniel 7:13, 14.
3. Jehovah emek n̄ko ndusụk mme anam-akpanikọ iren ye iban ke isọn̄ ndika heaven. Mmọ ẹyekara ye Jesus nte ndidem, mme ebiereikpe, ye mme oku ubonowo. (Luke 22:28-30; Ediyarade 5:9, 10) Jesus okokot ekemmọ mme andikara ẹmi ke Obio Ubọn̄ esie “ekpri otu erọn̄.” Ibat mmọ edi 144,000.—Luke 12:32; Ediyarade 14:1-3.
4. Ndondo oro Jesus akakabarede edi Edidem, enye ama osio Satan ye ndiọi angel esie ke heaven ọduọn̄ọ ke n̄kann̄kụk isọn̄. Oro edi ntak mme n̄kpọ ẹkabade ẹdiọk ẹkan mi ke isọn̄ toto ke 1914. (Ediyarade 12:9, 12) Ekọn̄, akan̄, idiọk udọn̄ọ, ukwan̄ido nditọt—kpukpru ẹmi ẹdi ubak “idiọn̄ọ” owụtde ete ke Jesus ke akara ye nte ke editịm n̄kpọ emi odu ke ukperedem ini esie.—Matthew 24:3, 7, 8, 12; Luke 21:10, 11; 2 Timothy 3:1-5.
5. Idibịghike Jesus eyebiere ikpe ọnọ mme owo, abahade mmọ nte emi ekpemerọn̄ abaharede erọn̄ ye ebot. “Erọn̄” ẹdi mbon oro ẹdiwụtde nte mmimọ idide mme andidu ke idak esie ẹmi ẹnamde akpanikọ. Mmọ ẹyenyene nsinsi uwem ke isọn̄. “Ebot” ẹdi mbon oro edide ẹma ẹsịn Obio Ubọn̄ Abasi. (Matthew 25:31-34, 46) Ke n̄kpet n̄kpet ini iso, Jesus eyesobo kpukpru mbon mbietebot. (2 Thessalonica 1:6-9) Edieke afo oyomde ndidi kiet ke otu “erọn̄” Jesus, afo enyene ndikpan̄ utọn̄ nnọ etop Obio Ubọn̄ nnyụn̄ nnam n̄kpọ ke n̄kemuyo ye se afo ekpepde.—Matthew 24:14.
6. Idahaemi ẹbahade isọn̄ ẹsịn ke ediwak idụt. Idụt kiet kiet enyene ukara esiemmọ. Idụt ẹmi ẹsiwak ndin̄wana ye kiet eken. Edi Obio Ubọn̄ Abasi eyeda itie kpukpru ukara owo. Enye eyekara nte n̄kukụre ukara ke ofụri isọn̄. (Daniel 2:44) Adan̄aoro ekọn̄, ubiatibet, ye afai ididụhe aba. Kpukpru owo ẹyedụn̄ ọtọkiet ke emem ye edidianakiet.—Micah 4:3, 4.
7. Ke ini Tọsịn Isua Ukara Jesus, mme owo ẹmi ẹdide mme anam-akpanikọ ẹyekabade ẹdi mfọnmma, ndien ofụri isọn̄ eyekabade edi paradise. Etisịm utịt tọsịn isua oro, Jesus eyenam kpukpru n̄kpọ oro Abasi ọkọdọn̄de enye ete anam. Ekem enye eyeyak Obio Ubọn̄ oro ọnọ Ete esie. (1 Corinth 15:24) Ntak mûtịn̄ke unọ mme ufan ye mbonima fo uban̄a se Obio Ubọn̄ Abasi edinamde?
[Ndise ke page 13]
Ke idak ukara Jesus, usua m̀mê asari ididụhe aba