Mme Edumbet Obio—Ubọn̄ Ndiyom Edinen Ido Abasi

OMOFỤN̄ ubọk ọkọm mbọhọidụn̄ fo nte asan̄ade ebe. Omokụt ke ndondo emi ke enye esima ndise nte afo ye ubon fo ẹnamde n̄kpọ. Enye etiene ofụn̄ fi ubọk onyụn̄ ada ubọk okot fi. Enye ọdọhọ ete: “Mbọk enyene se nyomde ndibụp fi. Nso inam mbufo ẹkpụhọde ntre?” Afo ọdọhọ ete: “Ikọ fo in̄wan̄ake mi.” Enye afiak obụp fi ete: “N̄kọ mbufo ẹdi Mme Ntiense Jehovah? Mbufo ibietke owo en̄wen. Mbufo ibietke mme ido ukpono eken—mbufo isidiaha usọrọ ido ukpono, isisịnke idem ke mbubehe ukara, isinyụn̄ in̄wanake ekọn̄. Mbufo isin̄wọn̄ke sika. Ndien ubon mbufo ẹnyene ata eti ido uwem. Nso inam mbufo ẹnen̄ede ẹkpụhọde ntre?”

Afo ọmọfiọk ke ibọrọ edi emi: Obio Ubọn̄ Abasi akara nnyịn. Jesus emi edide Edidem akaka iso ndinam nnyịn isana. Enye ke an̄wam nnyịn isan̄a ke nde ikpat esie inyụn̄ iwọrọ ida san̄asan̄a ke idiọk ererimbot emi. Ke ikpehe emi, iyokụt nte Obio Ubọn̄ Messiah anamde ikọt Abasi ẹsana ke kpukpru usụn̄ man ẹkpenọ Jehovah ubọn̄.