MBỤME 5

Nso ke N̄kpanam Edieke Ẹfiomode Mi ke Ufọkn̄wed?

SE INAMDE EMI EDI ETI MBỤME

Nte anamde n̄kpọ ekeme ndinam ẹtre ndifiomo fi mîdịghe ẹtetịm ẹfiomo fi.

**NSO KE AFO AKPANAM?**

Kere ban̄a uwụtn̄kpọ emi ise: Thomas iyomke ndika n̄wed mfịn, inyụn̄ iyomke-yom ndika ufọkn̄wed aba. Mfịna esie ọkọtọn̄ọ ọfiọn̄ ita emi ẹkebede, ke ini nditọ ufọkn̄wed mmọ ẹkesude ata idiọk nsu ẹdori enye. Mmọ ẹma ẹtọn̄ọ ndikot enye ntaha ntaha enyịn̄. Ndusụk ini, mmọ ẹsikokoi ẹtuak enye ẹbọ n̄wed ẹduọn̄ọ, mîdịghe ẹda ke edem ẹmia enye utọn̄, ẹnyụn̄ ẹsat iso ẹda nte idịghe mmimọ ikamia enye. Se ikam idiọkde ikan edi ke mmọ ẹma ẹnọ enye etop n̄kpọn̄ ẹte enye okûdedei anyan iso ke ufọkn̄wed edieke enye amade uwem esie.

Nso ke afo akpanam edieke ekpedide Thomas?

TỊM KERE KAN̄A!

Kûyak ndịk anam fi, emekeme ndikan owo emi esifiomode fi edi un̄wanake ye enye. Didie ke ekeme ndinam emi?

MỤM IDEM KAMA. Bible ọdọhọ ke “ndisịme owo owụt ofụri iyatesịt esie, edi owo ọniọn̄ omụm idem akama tutu esịm akpatre.” (Mme N̄ke 29:11) Edieke omụmde idem akama, mûnyụn̄ unamke nte n̄kpọ etịbe, mmọ ẹyesion̄o idem ẹkpọn̄ fi.
KÛSIO USIENE. Bible ọdọhọ ete: “Ẹkûda idiọk ẹsio owo usiene idiọk.” (Rome 12:17) Ndisio usiene edikam ababiat n̄kpọ ọnọ fi utu ke ndinam n̄kpọ ọfọn.
KÛMEN IDEM UKÛSỊN KE AFANIKỌN̄. Bible ọdọhọ ke “owo mbufiọk ada okụt afanikọn̄ ndien edịbe, edi ọkọi ebe aka ọkọbọ ufen.” (Mme N̄ke 22:3) Edieke ekemede, kûsan̄a ukpere mbon oro ẹkemede ndifiomo fi, kûnyụn̄ unam n̄kpọ emi ekemede ndinam ẹfiomo fi.
DOMO NDINAM N̄KPỌ KE USỤN̄ ORO MMỌ MÎKODORIKE ENYỊN. Bible ọdọhọ ke “sụn̄sụn̄ ibọrọ osụk ifụtesịt.” (Mme N̄ke 15:1) Nam mmọ ẹsak imam. Ke uwụtn̄kpọ, edieke owo mfiomo ọdọhọde fi ete, “Se nte ọdiọkde idem.” Emekeme ndituak inua imam nnyụn̄ ndọhọ ete, “Unana udia anam oro!”
SAN̄A DAHA. Nora emi edide isua 19 ọdọhọ ete: “Ndidop uyo owụt ke ọmọdiọn̄ọ idem onyụn̄ okop odudu akan owo oro ofiomode fi. Emi owụt n̄ko ke amafara ke idem, kpa edu emi mbon mfiomo mînyeneke.”—2 Timothy 2:24.
NAM N̄KPỌ UKO UKO. Mbon mfiomo ẹsifiọk mbon emi mînyeneke uko, emi mîdinyụn̄ in̄wanake ye mmọ. Mmọ idinamke fi n̄kpọ ke ini mmọ ẹkụtde ke afo emenyene uko, ke unyụn̄ ufeheke mmimọ.
TỊN̄ NỌ OWO. Akani andikpep kiet ọkọdọhọ ete: “Ami ndọhọ owo ekededi oro ẹfiomode etịn̄ n̄kpọ emi ọnọ owo. Oro edi nnennen n̄kpọ ndinam, ndien emi ekeme ndinam ẹtre” ndifiomo owo.

Owo mfiomo efehe akparawa emi enyenede uko — Ama enyene uko, owo mfiomo edifefehe fi

NDI AMA ỌFIỌK?

Ndifiomo owo idịghe sụk ndinụk, ndituak, m̀mê ndimia owo. Enye ekeme ndisịne n̄ko:

Ndisụn̄i owo. “Ndifreke ndiọi enyịn̄ oro mmọ ẹkekotde mi m̀mê se mmọ ẹketịn̄de ye ami. Mmọ ẹma ẹnam n̄kere ke n̄wọrọke n̄kpọ, ke owo inyụn̄ imaha mi. Akpakakam ọfọn mmọ ẹmia mi utu ke ndisụn̄i mi.”—Celine, emi edide isua 20.
Ndisọn owo. “Nditọ ufọkn̄wed nnyịn ẹma ẹtọn̄ọ ndisọn mi. Mmọ ikesiyakke ntie ye mmọ ke okpokoro udia ndia udia. Ke ofụri isua kiet, mma nsitua eyet nnyụn̄ ntie ikpọn̄ ndia udia.”—Haley, emi edide isua 18.
Ndida fon m̀mê Intanet mfiomo owo. “Afo emekeme ndida Intanet mbiat owo enyịn̄ m̀mê ndikam n̄wot owo. Se ntịn̄de emi ekeme nditie nte idịghe akpanikọ, edi ekeme nditịbe!”—Daniel, emi edide isua 14.

**MME MBỤME EMI ẸBỤPDE ẸBAN̄A EDIFIOMO OWO**
AKPANIKỌ M̀MÊ NSU	IBỌRỌ
1 Ẹma ẹsifiomo mme owo toto ke eset.	1 Akpanikọ. Ke uwụtn̄kpọ, Bible etịn̄ aban̄a Nephilim, emi ọwọrọde “Mbon Oro Ẹsinamde Mbon En̄wen Ẹduọn̄ọ.” —Genesis 6:4.
2 Edifiomo owo edi n̄kpọ mbubru. Idiọkke nte mme owo ẹkerede.	2 Nsu. Ediwak mbon oro ẹkenen̄erede ẹfiomo ẹma ẹkam ẹwot idem.
3 Mfọnn̄kan n̄kpọ ndinam mbak ẹdifiomo fi edi ndin̄wana ye owo oro ofiomode fi.	3 Nsu. Mbon mfiomo ẹsiwak ndikop odudu n̄kan mbon oro mmọ ẹsifiomode, ntre ufọn idụhe ndin̄wana ye mmọ.
4 Ọfọn odop uyo ke ini okụtde nte ẹfiomode owo.	4 False. Nsu. Edieke ẹfiomode owo, afo adada ese, ukemeke ndidọhọ ke ubọk imọ asana. Ndidodop uyo ọwọrọ ke ekeme ndidi amama nte ẹfiomode owo oro.
5 Kpa ye oro mbon mfiomo ẹsiwọkde inua, mmọ ẹsiwak ndidi mbon esịt ndịk.	5 Akpanikọ. Kpa ye oro ndusụk mbon mfiomo ẹsiwọkde inua, ediwak mmọ ẹdi mbon esịt ndịk, ẹsinyụn̄ ẹnenem mmọ ndifiomo mbon en̄wen.
6 Mbon mfiomo ẹkeme ndikpụhọde.	6 Akpanikọ. Mbon mfiomo ẹkeme ndikpụhọde edieke ẹn̄wamde mmọ.