Ukara Emi Edikarade ke Nsinsi

Okoneyo usen kiet, Edidem Nebuchadnezzar ama adaba ata esen esen ndap emi akafịnade enye, inyụn̄ iyakke enye ede aba. Enye ama okot mbiaibọk esie ete ẹnam ndap oro an̄wan̄a imọ. Mmọ ẹma ẹdọhọ ẹte: ‘O edidem, tịn̄ ndap fo nọ nnyịn.’ Edi enye ama ọdọhọ mmọ ete: ‘Nditịn̄ke! Ẹtịn̄ se n̄kadabade ẹnọ mi mîdịghe ntre nyowot kpukpru mbufo.’ Mmọ ẹma ẹdọhọ enye ẹte: ‘Ekpetịn̄ ndap fo ọnọ nnyịn, iyetịn̄ se enye ọwọrọde.’ Enye ama ọdọhọ ete: ‘Kpukpru mbufo ẹyom ndibian̄a mi. Ẹtịn̄ se n̄kadabade!’ Mmọ ẹma ẹdọhọ enye ẹte: ‘Idụhe owo ndomokiet ke isọn̄, emi ekemede ndidiọn̄ọ se afo akadabade. Idụhe owo emi ekemede ndinam utọ n̄kpọ oro.’

Nebuchadnezzar ama ayat esịt ete ẹwot kpukpru mbiaibọk ye mme ọfiọk n̄kpọ owo ke Babylon. Daniel, Shadrach, Meshach, ye Abednego ẹma ẹsịne ke otu mbon emi akanade ẹwot. Daniel ama ọdọhọ enye ọnọ imọ ekpri ini. Daniel ye mme ufan esie ẹma ẹbọn̄ akam ẹdọhọ Jehovah an̄wam mmimọ. Ndi ọmọdiọn̄ọ se Jehovah akanamde?

Jehovah ama ayarade ndap oro ye se enye ọwọrọde ọnọ Daniel ke n̄kukụt. Ke eyo ama ekesiere, Daniel ama ọkọdọhọ etubom mbon ukpeme edidem ete: ‘Kûwot ọfiọkn̄kpọ owo ndomokiet. Mmekeme nditịn̄ ndap edidem nnyụn̄ nnam an̄wan̄a enye.’ Ete oro ama emen Daniel ebịne edidem. Daniel ama ọdọhọ edidem ete: ‘Abasi ayarade se iditịbede ke ini iso ọnọ fi. Afo okokụt akamba mbiet emi ibuot edide gold, ikpanesịt ye ubọk ẹdi silver, idịbi ye ifụhi ẹdi okpoho, ukot edi ukwak, ikpat onyụn̄ edi ukwak ye mbat. Ekem ẹma ẹsiak itiat ẹsio ke obot kiet, ẹnyụn̄ ẹnam enye editọ mbiet oro ke ukot. Itiat oro ama anuak mbiet oro enye akabade ntọn̄, ofụm onyụn̄ emen enye osio. Itiat oro ama akabade ata akamba obot, onyụn̄ ofụk ofụri isọn̄.’

Daniel ama etịn̄ se ndap oro ọwọrọde ete: ‘Ibuot gold oro edi ukara fo. Silver oro edi ukara emi edidade itie fo. Ekem ukara en̄wen emi editiede nte okpoho ayakara ofụri ererimbot. Enye emi edidade itie esie ọyọsọn̄ nte ukwak. Ndien ke akpatre, ukara emi mîdidianake kiet, emi etiede nte n̄kpọ emi ẹbuakde ukwak ye mbat, ayadaha ada akara. Itiat oro akakabarede edi obot do, ada aban̄a ukara Abasi. Ukara Abasi oyosobo kpukpru ukara eken onyụn̄ akara ke nsinsi nsinsi.’

Nebuchadnezzar ama ọduọ ekịbi iso ke isọn̄ ke iso Daniel onyụn̄ ọdọhọ ete: ‘Abasi fo ayarade ndap oro ọnọ fi. Idụhe Abasi en̄wen emi etiede nte enye.’ Utu ke enye ndiwot Daniel, enye ama emek Daniel edi ibuot ọnọ kpukpru mme ọfiọkn̄kpọ owo, onyụn̄ emek enye kiet ke otu mme andikara ke Babylon. Ndi omokụt nte Jehovah ọkọbọrọde akam Daniel?