Enye Ama Okụt Tract ke Afan̄usụn̄

ISUA oro ekedi 1921. Ke obot obot ikpehe Transvaal, mbahade obio ukara South Africa kiet, otu mbonutom udiọn̄ usụn̄ tren ke ẹkenam utom mmọ ke unaisọn̄ unaisọn̄ ikpehe usụn̄ tren oro. Esenyịn otu mbonutom oro, edide afiaowo South Africa emi ekerede Christiaan Venter, ama okụt ekpri babru ke idak usụn̄ tren. Enye ekedi tract emi Watch Tower Bible and Tract Society emịn̄de.

Ke ama ọkọnọ uyo ete ikọt esie ẹtuak ẹda, Christiaan ama okot tract oro ye ọkpọsọn̄ nduaidem, enye ama efehe okosobo ye ebe-eyen esie, Abraham Celliers, onyụn̄ ọtọt ye nduaidem ete: “Abraham, mmokụt akpanikọ mfịn!”

Esisịt ini ke oro ebede, mmọ ẹma ẹwet n̄wed ẹnọ mme andimịn̄ tract oro kaban̄a ntọt efen efen. Ke ibọrọ n̄kọk itieutom Watch Tower Society eke South Africa ama ọnọ n̄wed ukpep Bible efen ẹsọk mmọ. Iren iba ẹmi ẹma ẹsikpep enye ọtọkiet ke ini nduọkodudu udia uwemeyo mmọ ye ke ufọt okoneyo. Ikebịghike mmọ ẹma ẹtọn̄ọ ndibuana akpanikọ oro ye mme ufan esie ye isenowo.

Ke akpatre, mmọ mbiba Christiaan ye Abraham ẹma ẹkabade ẹdi Mme Ntiense Jehovah oro ẹyakde idem ẹnọ nte utịp ifịk ye edinam akpanikọ mmọ, ẹma ẹn̄wam ediwak mbon South Africa ndisịm ifiọk akpanikọ. Akande oro, mme andito ubon mmọ ẹwakde ẹbe ikie edi mme enyene-ifịk Ntiense Jehovah mfịn! Kiet ke otu mmọ anam utom ke ibuot itieutom ofụri ererimbot eke Mme Ntiense Jehovah ke Brooklyn, New York, ye efen ke ofis Watch Tower Society ke South Africa.

Mfịn, n̄kpọ nte isua 70 ke ukperedem, mme tract ẹtịn̄de n̄kpọ ẹban̄a Bible ke ẹkaiso ndinyene akpan udeme ke edisuan etop obio ubọn̄.