Edisio Akpatre Ikpan̄wed Inyan̄ Inụn̄
KE SEPTEMBER isua oko, ke akpatre ẹma ẹmen n̄kpọ oro ọkọbiọn̄ọde nditọ ukpepn̄kpọ ke ediwak isua ẹfep. Eketie nte ke ọkpọsọn̄ eneni oro okodude ke ufọt nditọ ukpepn̄kpọ Ikpan̄wed Inyan̄ Inụn̄ ama osịm utịt, okposụkedi ekemede ndidi obufa eneni ama edemede.
Ẹma ẹfiọhọ Ikpan̄wed Inyan̄ Inụn̄ ke mme abaitiat ẹmi ẹdude ẹkpere Inyan̄ Inụn̄ ke 1947 ye ke mme isua oro ẹketienede. Mmọ ẹma ẹnyene akwa ufọn ke ndiwụt nte uwetn̄kpọ N̄wed Abasi usem Hebrew edide nnennen ye ke ndisịn un̄wana ke mme idaha ido ukpono oro ẹkedude ke Palestine ke ini Jesus okodude ke isọn̄. (Isaiah 40:8) Ke adan̄aemi ẹkesiode ndusụk ikpan̄wed usọp usọp nte owụtde ifiọk, ke 1991 owo ikosioho se ikperede ndisịm ikpan̄wed 400, ikonyụn̄ idụhe inọ n̄wakn̄kan nditọ ukpepn̄kpọ. Ediwak owo, nte Prọfesọ Ben Zion Wacholder ẹma ẹkụt “edikpu ke ndifiọk nte ke otode ibat n̄wed oro ẹdude kemi kpukpru nnyịn iyekpan̄a ke ini ofụri uwetn̄kpọ Inyan̄ Inụn̄ ẹdidude inọ ofụri ererimbot.”
Edi idaha oro ama okpụhọde ke September isua oko. Akpa, Prọfesọ Wacholder ye nsan̄a esie kiet, Martin Abegg ẹma ẹtọt ẹte ke mmimọ ke mbufiọk ima ikama kọmputa ndifiak nsion̄o mme uwetn̄kpọ oro otịmde ẹbiet mmọ oro. Ekem, Itie Ubonn̄wed Huntington ke San Marino, California, U.S.A., ama ọtọt nte ke mmimọ imenyene mme foto akpasarade uwetn̄kpọ oro ndien ke iyenam mmọemi ẹdu ye unana ukpan ọnọ nditọ ukpepn̄kpọ oro ẹnyenede eti etop. Nte an̄wan̄ade, ẹmesio ikpan̄wed oro ediwak foto ẹnịm. man ẹkụt ẹte ke ẹtịm mmọ ẹnịm. Ẹbon otu foto ẹmi ke nsio nsio itie, ndien ke akpatre kiet ama edidu ke Itie Ubonn̄wed Huntington.
Eyen ukpepn̄kpọ kiet okokot edikpụhọde oro mme n̄kpọ ẹkpụhọrede mi ‘edinam nditọ ukpepn̄kpọ oro etiede ukem nte ediwụri Ibibene Berlin.’ Mme ewetn̄wed oro ẹkemekde ẹkekot uwetn̄kpọ oro ẹkedade kọmputa ẹwet ye edision̄o mme foto oro ndi ‘uyịp inọ.’ Iso-ọfọn, mfan̄a aban̄ade mme edu eyeka iso ke ediwak isua. Kan̄a kemi, etie nte nditọ ukpepn̄kpọ efen efen ẹyekeme ndinyene ofụri Ikpan̄wed Inyan̄ Inụn̄.
[Ndise ke page 32]
Ndise n̄wed utatikọ oro odude ke Habakkuk, kiet ke otu Ikpan̄wed Inyan̄ Inụn̄