Ntọt M’ọkwọrọ Obio Ubọn̄

‘Ndidọk Idọk’ ke Venezuela

Ke idaha kiet Jesus ama emen utom ukwọrọikọ odomo ye idọk eke isua ke isua. (Matthew 9:36-38) Enyene idọk edi Jehovah Abasi, ndien idọk enen̄ede okpon ke ofụri ererimbot. Emi esịne efakutom emi owo mîsinamke utom ndien ndien ke Venezuela.

Ọfis n̄kọk itieutom Watch Tower Society ke Venezuela ọtọt se ikotịbede ke ini otu Mme Ntiense ẹkenamde utom ke efakutom eke Sabana Grande, Guárico State. Mme Ntiense oro ẹtọt ẹte: “Ufọk oro nnyịn ikenyenede ndidu ekedi eti ufọk ndinịm mme mbonoesop, ntre ye unana ubiatini nnyịn ima itọn̄ọ ndinọ mme owo ikot ndidụk mme mbonoesop do. Mme owo ikọdiọn̄ọke Mme Ntiense Jehovah. Okposụkedi otu mme ọkwọrọikọ ufọkederi inan̄ ẹkedude ke obio oro, mme owo ẹma ẹnyene udọn̄ ndikpep Bible.

“Nnyịn ima inam utom ke hour ita ke usenubọk ye ke hour ita ke uwemeyo, isan̄ade ke ufọk ke ufọk inyụn̄ inọde mme owo ikot ndidi ndidụk mbonoesop ke mbubịteyo oro eketienede. Nnyịn ikenyeneke n̄kpọitie, ntre nnyịn ima idọhọ mmọ ẹsan̄a ye n̄kpọitie mmọ ẹdi. Ke ini ama ekedisịm nditọn̄ọ mbonoesop oro, mme owo ẹma ẹtọn̄ọ ndidi, owo kiet kiet akamade n̄kpọitie kiet. Ke ini mbonoesop akasuanade, nnyịn ima isian mmọ ite ke ikpama ndiwet enyịn̄ mbon oro ẹyomde ndinyene ukpepn̄kpọ Bible mfọn. Ofụri owo 29 ẹkedụkde ẹma ẹyom ẹwet enyịn̄ mmimọ.

“Nte nnyịn ikeberide usụn̄ ke akpatre owo ama ọkọwọrọ, nnyịn ima ikụt irenowo ita ẹdade ke inụk ufọk oro. Ke n̄kpọ nte n̄kanika usụkkiet, nnyịn ima iben̄e idem ndisụhọde ntetie ndia udia ke ini mmọ ẹkekọn̄de usụn̄. Mmọ ẹma ẹbụp mme utọ mbụme nte: ‘Nso idi ukwọrọikọ oro mbufo ẹkwọrọde ke obio emi? Ntak emi mbufo ẹkenyenede mbono mi mbubịteyo emi-e?’

“Nnyịn ima ibụp m̀mê ima ikam ibiat ibet ekededi. Mmọ ẹma ẹbọrọ baba ẹnyụn̄ ẹdọhọ ke mmimọ idi mme pastọ ke otu n̄ka ukwọrọikọ ufọkederi ita ẹmi ẹdude ke obio oro. Mmọ ẹma ẹkop iyatesịt koro ufọkederi mmọ akanade ukpọk mbubịteyo oro. Nnyịn ima idọhọ mmọ ẹdụk ufọk inyụn̄ inam utom nnyịn an̄wan̄a mmọ. Nnyịn ima inịm n̄ko ndusụk n̄wed ye mmọ inyụn̄ idọhọ mmọ ẹfiak ẹdi ke Thursday oro eketienede.

“Ke Thursday efen mme pastọ ẹmi ẹma ẹfiak ẹdi, ẹsan̄ade ye owo 22 efen ẹmi ẹkeyomde ndikop se iditịn̄de. Mme pastọ ẹmi ẹkekere ẹte, ke sia idide iban, nnyịn idikemeke ndida mmimọ ke iso ke nneme. Edi, mbonoesop oro ama okụt unen nte nnyịn ikerede. Ke akpatre nnyịn ima inam an̄wan̄a nte ke nnyịn imewet enyịn̄ mbon oro ẹyomde ndikpep n̄kpọ efen efen ke Bible. Ediwak ufan mme pastọ ẹmi ẹma ẹyom ẹwet enyịn̄ mmimọ, ndien ndusụk ẹma ẹkam ẹdọhọ ke imoyom ndisan̄a ye nnyịn ke utom ukwọrọikọ!

“Nnyịn ima inam an̄wan̄a nte ke oyom mmọ ẹnyene ifiọk Bible efen efen ẹnyụn̄ ẹbọ ukpep mbemiso mmọ ẹkemede nditiene nnyịn nnam utom ukwọrọikọ. Kpukpru usen mme owo ẹma ẹsidi ufọk oro, ẹdọhọde nnyịn inam Bible an̄wan̄a mmimọ. Ndusụk ini, ke ini nnyịn ima iketịn̄ ikọ tutu ke ufọt okoneyo, nnyịn ikenyene ndidọhọ mmọ ẹnyọn̄ ufọk. Ke ini nnyịn ke akpatre ikenyenede ndikpọn̄ efakutom oro, mmọ ẹma ẹkop mfụhọ etieti ẹnyụn̄ ẹsian nnyịn ẹte ke ini idifiakde idi, mmimọ iyesan̄a ye nnyịn ika utom ukwọrọikọ. Mmọ ẹma ẹn̄wọn̄ọ ẹte ke etisịm ini oro mmimọ iyenam n̄kọri oro ẹyomde.”

Ke ini Mme Ntiense ẹkekpọn̄de efakutom oro, owo 40 ẹma ẹdu ẹmi ẹkeyomde ndikpep Bible. Ẹma ẹyak enyịn̄ mbon oro ẹnyenede udọn̄ mi ẹnọ esop oro ekperede akan, emi oyomde usụn̄ ke n̄kpọ nte itiat 30. Ke etienede oro, ndusụk Mme Ntiense ẹtode obio efen ẹma ẹwọrọ ẹka obio emi, ndien ẹma ẹtọn̄ọ ifịk ifịk otu mme ọkwọrọikọ do.