“Ntiense Akpanikọ Ke Ikpaenyọn̄”
ANYANINI mbemiso akpa owo okodụn̄ de ke isọn̄, ọfiọn̄ ama esiyama ke ikpaenyọn̄ ke okoneyo. Ini kiet ko ediwak owo ẹma ẹtuak ibuot ẹnọ enye nte abasi-an̄wan. Ewetn̄wed owo Greek oro Plutarch ama ọdọhọ ete ke enye edi akpatre ebietidụn̄ ndisana ukpọn̄ ke n̄kpa ebede. Ke n̄ke mbon Baltic ọfiọn̄ ekedi erenowo, ebe utịn. Mmọ ẹma ẹnyene mfịna ke ndọ mmọ, ndien ọfiọn̄ ama efehe ọkpọn̄ n̄wan esie, iwakke ndiwọrọ ye enye nda ke enyọn̄!
Mfịn, mme ufan ẹdide n̄kparawa—ye ikpọ owo—ẹsimenede enyịn ẹse ọfiọn̄ ẹnyụn̄ ẹnyene mme nneme ima. Ke mme iduọk isua 1960, ntaifiọk ẹma ẹbiat ediwak okụk ndidọn̄ mme owo ẹka ọfiọn̄ ẹnyụn̄ ẹda esisịt udomo itiat ẹdi man ẹda ẹnam ndụn̄ọde. N̄kpọ kiet edi akpanikọ aban̄a ọfiọn̄. Usen kiet kiet, ke nnennen ini emi ẹdiomide, enye eyesiaha onyụn̄ osop. Enye anam akpanikọ etieti ke ndutịm edisan̄a n̄kanade esie tutu nnyịn ikeme ndibat ini emi ẹnye ọwọrọde ye ini emi enye osopde ke tọsịn isua ifiak edem.
Ke ini nditọ Israel ẹkesede ọfiọn̄, mmọ ẹma ẹti n̄kpọ emi ekedide utịbe utịbe. Abasi ama ọn̄wọn̄ọ ete ke udịm ubọn̄ Edidem David idibehe ifep. Enye ọkọdọhọ ete: “[Ubon David] eyesọn̄ọ ada nte ọfiọn̄ ke nsinsi, ye nte ntiense akpanikọ ke ikpaenyọn̄.” (Psalm 89:35-37) Un̄wọn̄ọ emi ama osu Jesus, “Eyen David” ke idem. (Luke 18:38) Ke n̄kpa esie ebede ẹma ẹnam Jesus eset nte spirit eke mîkemeke ndikpa onyụn̄ ọdọk ke heaven. (Utom 2:34-36) Nte ini akade ẹma ẹdori enye ke ebekpo nte Edidem Obio Ubọn̄ Abasi eke heaven. (Ediyarade 12:10) Obio Ubọn̄ oro ke akara idahaemi ndien “enye eyeda ke nsinsi.” (Daniel 2:44) Ke usụn̄ emi ke Jesus, andida ke ibuot udịm ubọn̄ David oro mîkemeke ndikpa ke nsinsi, edibịghi nte ọfiọn̄, kpa “ntiense akpanikọ ke ikpaenyọn̄.”
Ntre, ini ekededi oro afo okụtde ọfiọn̄ ayamade ke ikpaenyọn̄ ke okoneyo, ti un̄wọn̄ọ oro Abasi ọkọn̄wọn̄ọde ọnọ David nyụn̄ wụt esịtekọm nte ke Obio Ubọn̄ Abasi ke akara idahaemi eyenyụn̄ akara ke nsinsi, kaban̄a ubọn̄ Abasi ye kaban̄a nsinsi edidiọn̄ eke anam-akpanikọ ubonowo.—Ediyarade 11:15.
[Ebiet Ẹdade Ndise Ẹto ke page 32]
Frank Zullo