Nte Afo Ebiet Kiet Ke Otu Mmọemi?

‘ỌFỌN ndidi ekpe ke usen kiet akan ndidi eyenerọn̄ ke isua ikie.’ Ẹdọhọ ke Benito Mussolini, akani akara ukara ufịk eke Italy eketịn̄ mme ikọ oro.

Ukem nte Mussolini ediwak owo ẹkpefan̄a ndidi se ẹdade mmọ nte nditọerọn̄ ye erọn̄. Nte ededi, David kpa andiwet psalm ye edidem Israel eset akatan̄a ete: “Jehovah edi andibọk mi . . . Eyeda mi aka ke mmọn̄ nduọkodudu.” (Psalm 23:1, 2) Ih, Jehovah Abasi edi Akwa Ekpemerọn̄, oro ọnọde ikọt esie ima ima ukpeme nte n̄kpọ eke mmọ ẹdide mme erọn̄ oro mîkemeke ndinọ unan.

Ẹtịn̄ ẹban̄a ikọt Abasi nte ẹdide ndamban̄a erọn̄ ke Psalm 95:7, ke ebiet emi nnyịn ikotde ite: “Koro [Jehovah] edide Abasi nnyịn; ndien nnyịn idi ikọt emi enye ọbọkde, ye ufene ubọk esie.” Ndusụk owo ẹkpekedori enyịn ndikụt andiwet psalm etịn̄de aban̄a “erọn̄ emi enye ọbọkde” ye “ikọt ubọk esie.” Edi mi ẹwọn̄ọde mme n̄kpọ ẹbon, ndien ikọt Jehovah ke idemmọ ke ntem edi se ẹdiọn̄ọde nte erọn̄ esie. Mmọ ẹdara ufọn edibọk oro Abasi ọbọkde ẹnyụn̄ ẹdi se enye adade usụn̄ ke ima ima ubọk esie.

Eyen Jehovah, Jesus Christ, edi Eti Ekpemerọn̄. Enye esiwak nditịn̄ mban̄a mme owo nte mme erọn̄. Ke uwụtn̄kpọ, Jesus ama etịn̄ aban̄a “ekpri otuerọn̄” ye “mme erọn̄ en̄wen” esie. (Luke 12:32; John 10:14-16) Kaban̄a mme osụkidem mbieterọn̄ mbet esie, Jesus ọkọdọhọ ete: “Mme erọn̄ Mi ẹkọp Mi uyo, Ami mmonyụn̄ mfiọk mmọ, mmọ ẹnyụn̄ ẹtiene Mi. Ami nnyụn̄ nnọ mmọ nsinsi uwem; ndien mmọ iditakke ke nsinsi, baba owo kiet idinyụn̄ iwamakede mmọ isio mi ke ubọk.” (John 10:27, 28) Ke ubọk atatido andikara, mme andidu ke idak esie ẹsibọ ufọn ẹto odudu, mfọn, ndausụn̄, ye ukpeme esie.—Ediyarade 1:16, 20; 2:1.

Baba owo kiet ikemeke ndiwamade mme ata mbon mbieterọn̄ nsio ke ubọk ukpeme Jesus. Mfịn, enye ke abahade mme owo nte “ebot” oro mînyeneke mfọn esie mîdịghe nte “erọn̄” oro ẹdidarade uwem nsinsi ke idak ukara Obio Ubọn̄ heaven Abasi. (Matthew 25:31-46) Nte afo eyewụt nte idide kiet ke otu mme erọn̄ oro ẹdiọn̄de?

[Ebiet Ẹdade Ndise Ẹto ke page 32]

Garo Nalbandian