“Ekpon̄idịm ke Ikọt”

UNANA utom. Ekọmurua n̄kpọ ndidọk. Unana. Idiọk ndutịm uforo. Mme ikọ ẹmi ẹsiwak ndidu ke mme mbụk n̄kpọntịbe. Ndien mmọ ẹwụt nsọn̄ọn̄kpọ oro ediwak miliọn owo ẹsobode nte mmọ ẹdomode ndinọ mme ubon mmọ udia ye ọfọn̄ nnyụn̄ nnọ mmọ itie udakibuot.

Otụk mme andinịm ke akpanikọ ye mbon oro mînịmke ke akpanikọ ukem ukem. Edi owo ikpọn̄ke mme andinịm ke akpanikọ ke idemmọ ndisak iso nse mme mfịna oro. Jesus, ke etịn̄de ikọ ọnọ mme osụhọdeidem owo ke akpa isua ikie, ọkọdọhọ ete: “Ẹse mme inuen enyọn̄, ete mmọ itọhọ-tọ, inyụn̄ idọkke-dọk, inyụn̄ ibonke inịm ke ubet; ndien Ete mbufo emi odude ke heaven ọbọk mmọ. Nte mbufo ikponke ikan mmọ?”—Matthew 6:26.

Jesus ama etịn̄ n̄ko ete: “Ẹkere ekpon̄idịm ke ikọt nte mmọ ẹkọride; mmọ inamke ọkpọsọn̄ utom, inyụn̄ ifiakde ndidi: edi ndọhọ mbufo nte, kpa Solomon ke ofụri ubọn̄ esie ikesịneke se iyede nte kiet ke otu mmọ. Edi edieke Abasi esịnede mbiet in̄wan̄ n̄kpọ ntem, . . . nte Enye idisịneke mbufo n̄kpọ ikan?”—Matthew 6:28-30.

Nte emi ọwọrọ ete ke iyomke Christian anam utom man enyene se adade odu uwem? N̄wan̄ansa-o! Christian esinam utom ọkpọsọn̄ nte oyomde man ekpe okụk mme n̄kpọ oro enye edepde. Apostle Paul ọkọdọhọ ete: “Edieke owo mînyịmeke ndinam utom, enye okûnyụn̄ adia n̄kpọ.” (2 Thessalonica 3:10) Edi, Christian ọdiọn̄ọ aban̄a ima ima ukpeme Abasi onyụn̄ enyene mbuọtidem nte ke Ete imọ eke heaven eyese aban̄a imọ. Ntem, mme editịmede esịt eke uwem inụkke enye iduọk. Idem ke mme ini nsọn̄ọn̄kpọ, enye onịm mme ebeiso n̄kpọ—mme n̄kpọ eke spirit—akpa. Enye onịm mme ikọ Jesus ẹmi ke akpanikọ: “Ẹkam ẹbemiso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ ẹmi ẹnọ mbufo.”—Matthew 6:33.