Mbọbọ Ndọ Oro Ememde
EKPRI ekaeyen kiet ama afat nsekeyen ọfiọn̄ iba esie. Ekem, ke mbuari, enye ama ayak eyen ọtọ ke isọn̄. Eyen oro ama akpa hour ifan̄ ke ukperedem. Ekaeyen oro ọkọdọhọ ete, “Ami n̄kokokoi nyak enye ntọ, koro ebe mi ikereke iban̄a ubon esie.” Utu ke ndineme n̄kpọ emi ye ebe esie, enye ama an̄wan̄a iyatesịt esie ofụk nsekeyen oro mîduehe.
Ibat ibat eka ẹsika anyan ẹkosịm utọ ebeubọk edinam oro, edi ediwak owo ẹnyene ukem ekikere esie. Ototịm edi ọkpọsọn̄ n̄kpọ akan ọnọ mme ọdọndọ ndinam ndọ mmọ okụt unen. Journal of Marriage and the Family ọdọhọ ete, “Ke ini ifet oro odude ọnọ ndọ ndikụt unen osụhọrede nte edide ke United States mfịn, ndinam enyene-iwụk, ubiere ndidụk ọyọhọ ndọ . . . edi ata n̄kpọndịk tutu idụhe ata owo oro ekerede n̄kpọ oro okpodụkde enye.”
Ke ini ndutịme emi, obukpo ido, unana edikem ye kiet eken, isọn, ntuaha ye mme ukot, ye ibụk ẹmedemede en̄wan esịtufọk, emi esiwakde ndikọri n̄kosịm usiondọ. Idaha emi otịm ọsọn̄ ubọk ke Japan tutu idem Ufọkabasi Catholic, emi ọwọrọde etop ke ndikpan usiondọ, onịm san̄asan̄a kọmiti ndisụhọde asari oro odude ke ufọt mbon Catholic kaban̄a mbon oro ẹsiode ndọ ẹnyụn̄ ẹfiakde ẹdọ ndọ. Mme aka ufọkabasi oro ẹkọride-kọri ke ibat ẹdi se mme mfịna oro ẹnyenede ebuana ye usiondọ ẹtụkde.
Nte ededi, ibat usiondọ owụt sụk ekpri ikpehe ke akamba mfịna oro odude. Ndụn̄ọde ke United States owụt nte ke edi idaha uwem ndọ ke idemesie oro ataharede edi ntak n̄kọri ke usiondọ, utu ke ndidi mme edinam n̄kaowo kpọt anam usiondọ edi mmemmem n̄kpọ akan. Ke ndisịn esisịt ukeme nnyụn̄ nnam esisịt ubiere, uwem ndọ ọduọk uyai esie. Ediwak owo ẹwụt enyọn̄ enyọn̄ nte idide mme ọdọndọ, edi mmọ inyeneke ebuana idan̄ ye nsan̄andọ mmọ, onyụn̄ ọsọsọn̄ mmọ ndinyene nneme ye kiet eken. Ndusụk mmọ ẹkere nte n̄wan Edem Usiahautịn ekekerede emi ekedepde san̄asan̄a itie emi edibụkde enye, ọdọhọde ete, ‘Ami nyomke ndidu ye ebe mi ke udi.’ Sia mîkemeke ndiwọrọ ebe esie ndọ idahaemi, enye aduak ndiwọrọ ndọ ke ama akakpa. Ke mfụhọ, okposụkedi mme utọ owo oro mîwọrọke ndọ, uwem ndọ idịghe n̄kpọ inemesịt inọ mmọ.
Emi ekedi ntre ye Isao. Enye ọkọdọ n̄wan esie ke ibụmede, ntre enye ikekwe ntak ndomokiet ndikpụhọde ibụk ibụk usụn̄uwem esie. Okposụkedi enye akadiade uwak okụk nte awat moto mbiomo, enye ama abiat kpukpru okụk esie ke ndidia udia ye ke ndin̄wọn̄ n̄kpọ, isehe iban̄a ubon esie. Nte utịp, utọk ye n̄wan esie akananam itreke. Isao eti ete, “Ke ini ekededi oro n̄kpọ ọkọdiọkde ye ami, ami mma nsika ufọk nnyụn̄ n̄kan̄wan̄a ifụtesịt mi mfụk ubon mi.” Nte obot oro esision̄ode nsụn̄ikan̄ oro mîsidoboke, nneme aban̄ade usiondọ ekesisiaha kpukpru usen.
Ediwak irenowo ye iban ke ẹyọ idiọk ndọ. Edide mmọ ẹsion̄o ndọ m̀mê isioho, mmọ inyeneke inemesịt. Nte usụn̄ odu mmọ ndinam ndọ mmọ okụt unen? Nso ke mmọ ẹkeme ndinam ndisọn̄ọ mbọbọ ndọ?