Mme Mbụme Ẹtode Mme andikot
Abasi okodụri Cain utọn̄ ete ‘ke idiọkn̄kpọ ke akana ke enyịnusụn̄ ndien enye eyenyụn̄ osụk ibuot ọnọ enye,’ emi etiede nte ke ẹtịn̄ ẹban̄a idiọk unam ye unam oro enye esitade. (Genesis 4:7) Ntak emi ẹkedade ikọ oro, edieke mme unam ẹkesitade ikọn̄ kpọt mbemiso Ukwọ?
Ke mme n̄wed oro Moses ekewetde, nnyịn imokụt ediwak ufan̄ikọ oro ẹwụtde mme akpanikọ m̀mê mme n̄kpọ ẹban̄ade mbụkeset oro ẹtiede nte idotke ke itie oro ẹsịnde mmọ ke mbụk.
Ke uwụtn̄kpọ, mbụk oro ke Genesis 2:10-14 ọnọ ọyọhọ mbụk aban̄ade nte isọn̄ in̄wan̄ Eden eketiede. Moses ekewet nte ke akpa kiet ekedi enyeoro “[asan̄ade] ke iso Assyria.” Edi idụt Assyria ada enyịn̄ esie oto Asshur, eyen Shem oro akamanade ke Ukwọ ama ekebe. (Genesis 10:8-11, 22; Ezekiel 27:23; Micah 5:6) Nte an̄wan̄ade, ke nnennen mbụk eke odudu spirit esie emi, Moses n̄kukụre akada ikọ oro “Assyria” nditịn̄ mban̄a ikpehe oro mme andikot n̄wed esie ẹketịmde emehe.
Kere ban̄a uwụtn̄kpọ efen ke mme ntọn̄ọ ntọn̄ọ ibuotn̄wed Genesis. Ke Adam ye Eve ẹma ẹkenam idiọk ndien ẹdi se ẹbịnde efep ke in̄wan̄, Jehovah ama ọbiọn̄ọ mmọ ndifiak n̄ka do. Didie? Genesis 3:24 ọdọhọ ete: “Enye osio owo oro efep: ndien onịm cherubim ye eminen̄minen̄ ofụt ikan̄ ke edem usiahautịn in̄wan̄ Eden, ete ekpeme usụn̄ eto uwem.” Tịmfiọk, “eminen̄minen̄ ofụt ikan̄.” Nte Abasi ama anam mme ofụt?
Nnyịn inyeneke ndisịm ubiere nte ke ima ima Andibot nnyịn ekebemiso anam se nnyịn ifiọkde nte ofụt. Adam ye Eve ẹma ẹkụt n̄kpọ oro akayamade ofụn̄de ke iso mme angel. Nso ke enye ekenen̄ede edi? Etisịm ini emi Moses ekewetde n̄wed Genesis, ẹma ẹtetịm ẹdiọn̄ọ ofụt ẹnyụn̄ ẹda ẹn̄wana ekọn̄. (Genesis 31:26; 34:26; 48:22; Exodus 5:21; 17:13) Ntre mme ikọ Moses oro “eminen̄minen̄ ofụt ikan̄” ama an̄wam mme andikot n̄wed esie ndikụt se ikotịbede ke usụn̄ Eden ke ndusụk udomo. Ntọt oro ẹkediọn̄ọde ke eyo Moses ama otịp n̄kpọ esịn ke edinam mme utọ n̄kpọ oro an̄wan̄a. Ndien anaedi ikọ oro Moses akadade ama enen, sia Jehovah akayakde esịn enye ke Bible.—2 Timothy 3:16.
Idahaemi nso kaban̄a Genesis 4:7? Do Abasi ama odụri Cain utọn̄ ete: “Afo akpanam eti n̄kpọ, nte (iso) ikpenen̄ekede fi? Edi mûnamke eti n̄kpọ, idiọkn̄kpọ ke ana ke enyịnusụn̄. Enye eyenyụn̄ osụk idem ọnọ fi, ndien afo eyekan enye.” Nte efiọkde, etie nte ikọ oro ọnọ ekikere aban̄a idiọk unam oro okopde biọn̄ emi okụbọde ndifrọ mmụm nnyụn̄ nta unam efen.
Nte ededi, mme uyarade ke Bible ẹwụt nte Adam ye Eve ẹkedude ke emem ye kpukpru unam. Ekeme ndidi ndusụk edibotn̄kpọ ẹma enen̄ede ẹkop ifụre ndidụn̄ n̄kanade mme owo, idem ẹbọde ufọn ẹto ndidụn̄ n̄kpere mme owo. Mmọ eken ẹkedi mme idiọk unam, mme unam emi ke obot ẹsiyomde ndidụn̄ nsannsan n̄kpọn̄ mme owo. (Genesis 1:25, 30; 2:19) Edi, Bible inọhọ ekikere nte ke unam ekededi ama omụm mme unam efen m̀mê mme owo ata. Ke akpa, Abasi ọkọnọ mme unam ye mme owo ikọn̄ san̄asan̄a nte udia. (Genesis 1:29, 30; 7:14-16) Oro ikokpụhọkede tutu ke Ukwọ ama ekebe, nte Genesis 9:2-5 owụtde.
Nso, ndien kaban̄a ntọt oro Abasi ọkọnode Cain, nte nnyịn ikotde ke Genesis 4:7? Ke akpanikọ ekikere aban̄ade unam oro okopde biọn̄ emi ọkụbọde onyụn̄ odude ke mben̄eidem ndifrọ mmụm unam efen nta enyene ndidi ama enen̄de an̄wan̄a ke eyo Moses, ndien enye an̄wan̄a nnyịn n̄ko. Ntre, n̄ko, ekeme ndidi Moses akada ikọ oro ekekemde ye mme andikot n̄wed esie oro ẹkedude ke ererimbot ke Ukwọ ama ekebe. Ndien idem edieke edide Cain ikekwe utọ edibotn̄kpọ oro akananam, enye ekpekekeme ndidiọn̄ọ akpan n̄kpọ oro odude ke ntọt oro ekemende idiọk oro okodude enye ke idem ẹdomo ye unam oro enen̄erede okop biọn̄, kpa idiọk unam.
Ke akpanikọ akpan ikpehe oro okpotịmde otụk nnyịn ẹdi ẹmi: mfọnido Abasi ke nditọt Cain, ufọn edisụhọde idem mbọ item, adan̄a nte ufụp ekemede ndibiat owo mmemmem mmemmem, ye adan̄a nte nnyịn ikpadade mme ntọt Abasi eken oro Abasi esịnde ke N̄wed Abasi ọnọ nnyịn ke akpan n̄kpọ.—Exodus 18:20; Ecclesiastes 12:12; Ezekiel 3:17-21; 1 Corinth 10:11; Mme Hebrew 12:11; James 1:14, 15; Jude 7, 11.