Edimịn̄ Eke Ukem Ini Ke Isua Duop!

KE INI ẹkebụpde nte eketiede enye ke idem ke isua duop ẹmi ẹkebede ke ini ẹketọn̄ọde ndimịn̄ nsiondi Enyọn̄-Ukpeme usem Spain ke ukem ini ye eke Ikọmbakara, edima eyenete an̄wan Spain kiet ọkọbọrọ ete: ‘Nnyịn ida enye nte edidiọn̄, mbufo ẹsidọdọhọ didie emi, koro nnyịn isan̄a ikpat kiet ye Ikọmbakara. Ke ini ndọhọde Ikọmbakara, kpukpru ini nsikere mban̄a esop. Nnyịn isikot esop “Mama.” Nnyịn imenyene ata n̄kpet n̄kpet itie ebuana. Edi ediye n̄kpọ. Edi utịben̄kpọ! 

Anam-akpanikọ eyenete an̄wan emi okowụt nte esitiede ediwak mme andikot oro mîdịghe mbon Ikọmbakara ke idem. Ke mme isua ẹmi ẹkebede, mme ibuotikọ ẹkesidu ke nsiondi Enyọn̄-Ukpeme usem Spain ke ẹma ẹkemịn̄ mmọ ke n̄kpọ nte ọfiọn̄ itiokiet ke Ikọmbakara. Mme usem en̄wen ẹma ẹsibịghi ntre. Nte an̄wan̄ade, ọkpọsọn̄ udọn̄ ama odu kaban̄a edimịn̄ ukem ibuotikọ, ke ukem ini, ke ediwak usem.

Ntre ọtọn̄ọde ye nsiondi eke April 1, 1984, nsiondi eke usem Spain ekedi akpa oro ẹkemịn̄de ukem ini ye nsiondi eke Ikọmbakara. Mme usem en̄wen ẹma ẹdiana ke mîbịghike. Ke ntọn̄ọ ntọn̄ọ 1985, ẹkemịn̄ mme nsiondi usem 23 ke ukem ini. Nte ẹkenyenede mme akabaden̄wed ẹnyụn̄ ẹnọde ukpep, mme nsiondi ke usem efen efen ẹma ẹdisan̄a ukem ye Ikọmbakara.

Nsiondi Enyọn̄-Ukpeme emi anam ọyọhọ isua duop nte ẹketọn̄ọ ndimịn̄ ke ukem ini. Ẹmịn̄ Enyọn̄-Ukpeme idahaemi ke usem 116, usem 85 ke otu mmọ ẹdide ke ukem ini. Emi ọwọrọ ete ke ẹmịn̄ mbahade 99.3 eke ikie ke otu ofụri ibat Enyọn̄-Ukpeme 16,100,000 oro ẹsimịn̄de ke ẹbaharede ukem ukem ye ukem ndise ikpaedem ye ibuotikọ. Amaedi mbon oro ẹsidụkde Ukpepn̄kpọ Enyọn̄-Ukpeme eke urua ke urua, se ikande mbahade 95 eke ikie ẹsikpep ukem n̄kpọ ke ukem ini.

Ẹmịn̄ Awake!, nsan̄a magazine Enyọn̄-Ukpeme, ke usem 37 ke ukem ini ke otu usem 74 oro ẹmịn̄de enye. Ẹmịn̄ Yearbook of Jehovah’s Witnesses eke isua ke isua ke usem 18. Utọ n̄wed oro ẹmịn̄de ke ukem ini do anam n̄kpọ ndidian ikọt Abasi ọtọkiet ke “edinyene esịt kiet ye ekikere kiet.”​—⁠1 Corinth 1:⁠10.