“Ẹkûbọp Idem Utịn̄e-Utịn̄e”

NYARA enan̄ iba oro ẹwụtde mi ẹnyene akwa ukeme, an̄wamde mmọ ndidụri ndodobi mbiomo mfefere mfefere. Edi nso edieke ẹkpemende donkey ẹkpụhọ ye enan̄ kiet. Sia donkey ekpride onyụn̄ ememde akan enan̄, eyedi enye eyesọn̄ ibuot onyụn̄ atịgha ibiọn̄ eto emi ẹdade ẹyịri ke utọ utịn̄e utịn̄e mbọbọ emi. Ye eti ntak, ndien, ibet oro Abasi ọkọnọde Israel ama ọdọhọ ete: “Kûbọp enan̄ ye ass ọtọkiet ufụn̄ isọn̄.”—Deuteronomy 22:10.

Apostle Paul ama ewet n̄kpọ eke akade ntre aban̄a mme owo. Enye ọkọdọhọ ete: “Ẹkûbọp idem utịn̄e-utịn̄e ye mmọ eke mînịmke ke akpanikọ.” (2 Corinth 6:14) Owo ekpenyene ndinyene emi ke ekikere akpan akpan ke ini emekde nsan̄andọ. Ndọ edi nsinsi itie ebuana, koro Jesus Christ ọkọdọhọ ete: “Se Abasi ama akadian, yak owo okûdianade.” (Matthew 19:6) Ọkpọsọn̄ iduọesịt esidu ke ini mme ọdọndọ mîbuanake ukem edinịm ke akpanikọ, mme edumbet, ye utịtmbuba. Ke ntre ke nsụhọde n̄kaha owụt eti ibuot nditiene item Bible ndidọ “owo Abasi ikpọn̄îkpọn̄.” (1 Corinth 7:39) Ndidọ owo oro mîdụhe ye afo ke ukem ido ukpono eyekam ada akamba mfịna edi akan edidian enan̄ ye donkey.

Ukpụhọde ke edinịm ke akpanikọ eke ido ukpono akam edi ntak kiet oro ekemede ndinam mme ọdọndọ ẹbọp idem utịn̄e utịn̄e. Mbon oro ẹyomde ndikabade ndi nsan̄andọ—idem ẹdude ke ukem ido ukpono—ẹyenam ọfọn ndibụp ẹte, ‘Nte nnyịn imenyene ukem utịtmbuba? M̀mọ̀n̄ ke nnyịn ididụn̄? Anie edise aban̄a ubiatokụk? Ndi nnyịn mbiba iyenam utom? Nso kaban̄a nditọ? Ndi mfọnido ye edikere mban̄a ẹyekara itie ebuana oro?’

Ke ndusụk udomo, usụn̄ nte ẹnemede mme utọ n̄kpọ ntre ekeme ndiwụt m̀mê mbọbọ oro eyedi ndọdọnọ ndọdọnọ m̀mê edidi utịn̄e utịn̄e. Nte ededi, idụhe owo iba ẹmi ẹkemede ndidi ata ukem ukem. Ke ofụri ofụri, nte ededi, edieke owo iba emi ẹyomde ndidọ ndọ ẹkemede ndisak iso nse nnyụn̄ n̄kọk mme mfịna ọtọkiet n̄ko edieke mmọ ẹkemede ndinịm usụn̄ nneme in̄wan̄, otịm etie nte mmọ idibọpke idem utịn̄e utịn̄e.