Ẹkûsịn Ikọ ke Esịt

EKEME nditotịm ndi n̄kpọ-ata akan nte akanam edide nditre ndiyat esịt ke ini owo eduede nnyịn. Bible enyene eti item ọnọ mme utọ idaha oro. Apostle Paul ekewet ete: “Ẹyat esịt, edi ẹkûdue; ẹkûyak utịn osụhọde edisịm iyatesịt mbufo.”—Ephesus 4:26.

Ke ini owo eduede nnyịn, akam edi ndammana n̄kpọ ndikop ndusụk udomo iyatesịt. Paul ndidọhọ “ẹyat esịt” owụt ete ke iyatesịt ekeme ndidot ndusụk ini—ndusụk ke ndinam n̄kpọ mban̄a utụk m̀mê ukwan̄ikpe. (Men 2 Corinth 11:29 domo.) Edi ke ini akade iso ye unana edibiere, idem iyatesịt oro enende ekeme ndikama idiọk utịp, adade osịm akwa idiọkn̄kpọ. (Genesis 34:1-31; 49:5-7; Psalm 106:32, 33) Ntre, nso ke afo akpanam ke ini ẹnamde fi ayat esịt?

Ke ata ediwak idaha oro abuanade n̄kpri ndudue, afo emekeme ndibiere n̄kpọ emi ke esịt fo ‘onyụn̄ odop uyo’ mîdịghe aka ebịne owo oro anamde ndudue onyụn̄ eneme n̄kpọ oro ye enye. (Psalm 4:4; Matthew 5:23, 24) Ekededi ke otu usụn̄ iba ẹmi, mfọnn̄kan n̄kpọ edi ndibiere n̄kpọ emi usọp usọp mbak iyatesịt edikọri onyụn̄ ada ubiak ubiak utịp edi.—Ephesus 4:31.

Jehovah ke mfọnido esifen mme idiọkn̄kpọ nnyịn, idem mme idiọkn̄kpọ oro nnyịn ke unana ifiọk mîfiọkke ke ima inam. Nte nnyịn nde ikemeke ndifen n̄kpri ndudue ekemmọ owo?—Colossae 3:13; 1 Peter 4:8.

Nte enemde, ikọ Greek emi adade ọnọ “edidahado” ke ataata usụn̄ ọwọrọ “yak atak.” Edifen nnọ iyomke ite nnyịn ise idiọkn̄kpọ ke usụhọde m̀mê ifụmi enye. Ndusụk ini enye n̄kukụre ekeme ndibuana ndiyak idaha oro atak, ifiọkde ite ke ndisịn ikọ ke esịt edikam adadian n̄kpọ ke mbiomo fo onyụn̄ abiat edidianakiet esop Christian. N̄ko-n̄ko, enye ekeme ndibiat nsọn̄idem fo!—Psalm 103:9.