Ntọt M’ọkwọrọ Obio Ubọn̄

Odudu Oro Ikọ Abasi Enyenede Ndikpụhọde Owo

NTE enye onyịmede, enye ekesidi ‘osụn̄i isụn̄i, andikọbọ, andisuene, ye owo usọn̄enyịn.’ (1 Timothy 1:13) Edi enye ama okpụhọde! Ukpụhọde oro apostle Paul akanamde ama okpon etieti tutu enye ke ukperedem ama ekeme ndidọhọ ete: “Mbufo ẹkabade ẹkpebe mi, kpa nte ami n̄kpebede Christ.”—1 Corinth 11:1.

Mfịn, ediwak tọsịn mme andituak ibuot ke mme itie ikie oro ẹnyenede esịt akpanikọ ke ofụri ererimbot ke ẹnam mme ukem ukpụhọde oro. Nso in̄wam mmọ ndinam ntre? Mmọ ke ẹbọ ifiọk Ikọ Abasi ndien ke ẹda enye ẹsịn ke edinam ke uwem mmọ. Ifiọkutom etienede mi owụt odudu oro Ikọ Abasi enyenede ndikpụhọde owo.

Ke Slovenia odu ebe ye n̄wan oro ẹma ẹkesọn̄ ẹdụn̄de ikpọn̄ nsannsan ke obio-in̄wan̄. Jože, emi edide ebe, ekedi n̄kpọ nte isua 60 ke emana ama onyụn̄ enyene ọkpọsọn̄ mfịna edide mbumehe un̄wọn̄ ọkpọsọn̄ mmịn. Kpa ye oro, enye ama ese aban̄a n̄wan esie, Ljudmila, oro ọkọdọn̄ọde. Usen kiet mme anditan̄a Obio Ubọn̄ iba ẹma ẹsobo ye Jože. Enye ama ada Mme Ntiense oro odụk ufọk esie, ke ebiet emi mmọ ẹkesobode ye n̄wan esie. Ke okopde etop Obio Ubọn̄, mmọn̄eyet idatesịt ama ewet osụhọde Ljudmila ke iso. Se Jože n̄ko okokopde ama enem enye ndien enye ama obụp ediwak mbụme. Ke ẹma ẹkenịm ediwak n̄wed Bible ye ebe ye n̄wan oro, Mme Ntiense oro ẹma ẹnyọn̄ọ.

Ọfiọn̄ kiet ke oro ebede Mme Ntiense oro ẹma ẹkeme ndifiak n̄ka, ndien mmọ ẹma ẹkụt n̄wed oro Afo Emekeme Ndidu Uwem ke Nsinsi ke Paradise ke Isọn̄ odorode ke okpokoro. Ke ini ẹkebụpde ebiet enye akadade enye, Jože ama ọdọhọ ete: “N̄kokụt ẹnọde etop ẹban̄a enye ke ikpaedem kiet ke otu magazine oro mbufo ẹkekpọn̄de ye ami. Ntre mma n̄wet ọfis mbufo ke Zagreb nnyụn̄ mben̄e n̄wed oro.” Ke ntak udọn̄ esie, ẹma ẹnọ enye ikot ndidụk Editi n̄kpa Christ oro ẹkeyomde ndinịm ke Ufọkmbono Obio Ubọn̄. Ke inemesịt Mme Ntiense oro, enye ama aka!

Ikebịghike ẹma ẹtọn̄ọ ukpepn̄kpọ Bible, ẹnyụn̄ ẹnam eti n̄kọri. Ke uwụtn̄kpọ, ke ini ẹkewụtde Jože ke Bible ẹte “kûnam edisọi mbiet unọ idem fo . . . kûnụhọ unọ mmọ, kûnyụn̄ unam n̄kpọ mmọ,” inikiet inikiet enye ama atan̄ kpukpru edisọi mbiet ido ukpono oro ẹkedude ke ufọk, esịnede mme ndise, onyụn̄ otop mmọ ọduọn̄ọ.—Exodus 20:4, 5.

Ẹma ẹyụhọ udọn̄ Jože kaban̄a akpanikọ eke spirit. Nte ededi, ke ndiọkiso, enye okosụk enyenyene udọn̄ efen. Ke n̄kpọ nte isua 18, enye ama esin̄wọn̄ n̄kpọ nte ekpeme wine duop ke usen. Ke ntak mfịna un̄wọn̄ n̄kpọ esie emi, enye ikenen̄ekede inọ ntịn̄enyịn ke ukamaidem esie. Edi ke ama ekekpep ekikere Abasi kaban̄a edida mmịn ke idiọk usụn̄, enye ama ebiere ndikpụhọde.

Enye ama odomo ndikan mfịna un̄wọn̄ n̄kpọ esie sụn̄sụn̄, ewetde udomo emi enye ọn̄wọn̄de ke usen ke usen onịm. Ikebịghike enye ikedịghe ofụn inọ wine aba. Ke n̄kaiso ukpep Bible esie, enye n̄ko ama ekpep ete ke oyom mme ata Christian ẹkama idem asana. Ntem, enye ama ọnọ Mme Ntiense oro okụk onyụn̄ ọdọhọ ete: “Ọfọn, ẹka ẹkedep mme ọfọn̄ ekededi oro ẹyomde nsịne man n̄kama idem nte ọfọnde ke mme mbonoesop Christian ye ke utom an̄wautom!” Mme Ntiense oro ẹma ẹnyọn̄ ẹdi ye mme ọfọn̄ idakidem, mme sọks, mme ikpaukot, mme ọfọn̄idem, mme suit, mme tai, ye ekpat ubọk.

Ke ẹma ẹkekpep Bible ke isua kiet, Jože ye Ljudmila ẹma ẹdot ndisan̄a ye Mme Ntiense ke utom ukwọrọikọ eke ufọk ke ufọk. Ọfiọn̄ ita ke oro ebede mmọ ẹma ẹyarade uyakidem mmọ nnọ Abasi ke baptism mmọn̄ ke mbono district eke Mme Ntiense Jehovah. Kpa ye usọn̄ ye udọn̄ọ, Jože ama esibuana kpukpru ini ke ndikwọrọ eti mbụk ndien ke ukperedem, anam utom ke edinam akpanikọ nte asan̄autom unamutom ke esop tutu ke n̄kpa esie ke May eke 1995. Nti mfri oro eren emi ye n̄wan esie ẹkesion̄ode ke uwem ọnọ ikọ ntiense aban̄a odudu oro Ikọ Abasi enyenede ndikpụhọde owo!