Edisu Eke Prọfesi Bible

KE Imperial War Museum ke London, England, ẹkọn̄ n̄wọrọnda n̄kanika ye n̄kpọ ubat ibat ilektrọnik emi esiwụtde nọmba. Nte n̄kanika emi asan̄ade akanade, n̄kpọ ubat ini oro esisịk ke kpukpru sekọn 3.31. Ke ini kiet kiet emi enye esịkde nọmba efen esidiana ke ofụri ibat oro. Ini kiet kiet oro enye esịkde, nọmba kiet kiet, ada aban̄a erenowo, n̄wan, m̀mê eyenọwọn̄ emi akpade ke ntak ekọn̄ ke isua ikie emi.

N̄kpọ ubat ini oro ọkọtọn̄ọ ibat esie ke June 1989 ndien ẹdori enyịn enye ndikụre ibat emi ke ufọt okoneyo emi edisierede isua 2000. Etisịm ini oro ibat emi odude ke n̄kpọ ubat ini oro eyesịm miliọn ikie—kpa ibat n̄kpan̄a ẹmi ẹkerede ke enyene ebuana ye ekọn̄ ke ofụri isua ikie 20 emi.

Ke se ikperede ndisịm isua 2,000 ẹmi ẹkebede, Jesus Christ ama ebem iso etịn̄ aban̄a ini oro ‘idụt ndidaha n̄n̄wana ye idụt ye obio edidem kiet ndidaha n̄n̄wana ye obio edidem efen’ edinịmde idiọn̄ọ. Nte ekemde, Mme Ntiense Jehovah ẹmekwọrọ ke anyanini nte ke mme akama-nsobo ekọn̄ eke isua ikie emi, ọkọrọ ye ata ediwak unyekisọn̄, ndiọi udọn̄ọ, unana udia, ye mme mfịna eken, ẹdiana ọtọkiet ẹnọ uyarade nte ke nnyịn idu ke “ukperedem ini”—iduọk ini oro etienede edidori Christ ke ebekpo nte Edidem ke heaven ke 1914.—Luke 21:10, 11; 2 Timothy 3:1.

Ke adade Bible nte odudu esie, Enyọn̄-Ukpeme ọmọtọt eti mbụk nte ke Obio Ubọn̄ Abasi ọyọsọp osobo mbon ufịk onyụn̄ anam isọn̄ akabade edi paradise. Ndien nso kaban̄a ekọn̄ ke ini iso? Bible ọdọhọ ete: “Mbufo ẹdi ẹdise se Jehovah anamde, emi esịnde n̄wụre ke ererimbot. Enye anam ekọn̄ etre tutu esịm ke utịt ekondo; oyobụn̄ utịgha, onyụn̄ esịbe eduat: oyonyụn̄ ọfọp mme chariot [ekọn̄] ke ikan̄.”—Psalm 46:8, 9.

[Ebiet Ẹdade Ndise Ẹto ke page 32]

N̄kanika: Ẹbọ ẹto Imperial War Museum