“Jehovah Ama Ọbọrọ Akam Mi!”

KE OFỤRI ererimbot, Mme Ntiense Jehovah ke ẹnịm se ikperede ndisịm ukpepn̄kpọ Bible miliọn ition ye mme owo ẹmi ẹnyenede udọn̄ ndinyene nnennen ifiọk aban̄ade Abasi ye utịbe uduak esie kaban̄a ubonowo. Idem nditọwọn̄ ke otu Mme Ntiense Jehovah ke ẹtiene ẹbuana ke utom emi. Da, ke uwụtn̄kpọ, eyeneren kiet emi ekerede Joel. Enye akayarade uyakidem esie ọnọ Jehovah onyụn̄ ana baptism ke edide isua usụkkiet ke emana. Isua kiet ke oro ebede enye ama enyene ifiọkutom emi:

“Ke adan̄aemi nnamde utom ukwọrọikọ, mma nsobo ye n̄wan kiet emi ekerede Candy. Mma nnọ enye ediye uduot ekpri n̄wed ‘Sese! Mmanam Kpukpru N̄kpọ Ẹdi Mbufa.’ Enye ama enyenyene enye, ntre mma nnọ enye n̄wed oro Afo Emekeme Ndidu Uwem ke Nsinsi ke Paradise ke Isọn̄. Enye ama enyenyene enyeoro n̄ko. Ndien mma n̄kere nte, ‘Ami mmọn̄ n̄kpep Bible ye n̄wan emi.’ Enye ama enyịme!

“Eyeneka Candy an̄wan, emi ọkọdọn̄ọde kansa, okodụn̄ ye enye. Adianade do, Candy ke ọkọbọ ukpep ndidi nurse. Ntre ke anyanini, ukpepn̄kpọ Bible oro ama etre. Edi ami ye ete ye eka mi ima isika ikosobo ye enye ebe ke ndikpọn̄ mme magazine nnọ enye m̀mê ebe esie, Dick. Enye ama asian nnyịn ete ke n̄wan esie esibon mme magazine oro ekpere bed esie onyụn̄ okot mmọ ke okoneyo.

“Ke akpatre, eyeneka Candy an̄wan ama akpa. Ami ye Papa ye Mama ima inyene nneme ye Candy iban̄a idaha mme akpan̄kpa. Enye ama ebiere ndifiak ntọn̄ọ ukpepn̄kpọ Bible esie. Ke usen efen, nnyịn ima ibụp Dick m̀mê enye akpama ndikpep n̄kpọ ọtọkiet ye Candy nnyụn̄ nnam enye edi ukpepn̄kpọ ubon. Enye ama ekere ke oro ekedi eti ekikere. Ntre idahaemi, ke adianade ye Papa, ami ke n̄kpep n̄kpọ ye Dick ye Candy. Mmọ ke ẹnam eti n̄kọri ẹnyụn̄ ẹwụt esịtekọm oro mmọ ẹnyenede ẹnọ ukpepn̄kpọ Bible.

“Mma nsibọn̄ akam nyom ukpepn̄kpọ Bible, ndien Jehovah ama ọbọrọ akam mi!”