Ntọt M’ọkwọrọ Obio Ubọn̄

Ndisọn̄ọ Nda ke Ufọkn̄wed Akama Utịp

BIBLE ama ebemiso etịn̄ ete: “Jehovah eyenyụn̄ eteme kpukpru nditọ fo; ndien emem nditọ fo okpon.” (Isaiah 54:13) Ke usụn̄ atarade, “kpukpru nditọ fo” ekeme ndida mban̄a ofụri otu mme asan̄autom Abasi ke isọn̄, esịnede ata n̄kpri owo. Mfịn, mme ete ye eka ẹdide Christian ẹkụt ẹte ke ‘Jehovah eteme’ nditọ mmọ ke ufọk ye ke mme mbonoesop Christian.

Nte ededi, ke ini ẹkade ufọkn̄wed, n̄kpri owo ẹdide Christian ẹsisobo n̄kpọsọn̄ idaha. Ediwak ini mmọ ẹsikụt nte odotde ndisọn̄ọ nda etiene se mmọ ẹkekpepde ẹto Bible. Ke ini mmọ ẹnamde, mme utịp ẹkeme ndinyene ufọn nnọ nditọ ufọkn̄wed ye mme andikpep ukem ukem, nte ifiọkutom otode Micronesia emi etienede mi owụtde.

Ke ekpri isuo Tol odude ke otu mme Isuo Chuuk ke n̄kan̄ edem usoputịn Pacific, mme andikpep ke ufọkn̄wed n̄kann̄kụk ẹma ẹdọhọ kpukpru nditọwọn̄ ẹben̄e idem ẹnyụn̄ ẹtiene ẹbuana ke usọrọ Halloween. Nditọ ufọkn̄wed ẹdide Mme Ntiense ẹma ẹfiọk ẹte ke usọrọ emi ekeme ndibuana mme n̄kpọ mbana ye mme edisịnen̄kpọ oro ẹbietde ekpo, mbon ubi, ye mme ifọt—kpukpru ẹnyenede ebuana ye mme edinam ubụpekpo. Nditọwọn̄ ẹmi ikemeke nditiene mbuana ye eti ubieresịt.a

Otode ke ukpep oro ọkọn̄ọde ke Bible emi mmọ ẹbọde ke ufọk ye ke esop Christian, mmọ ẹma ẹfiọk ẹte ke mme utọ edinam oro inemke Abasi esịt, idem ke ini ẹnamde enye n̄kukụre kaban̄a unọ idem inemesịt. Man an̄wam ndinam idaha mmọ etịm an̄wan̄a, nditọwọn̄ oro ẹma ẹkot Barak, kiet ke otu isụn̄utom ke isuo oro emi edide Ntiense editịn̄ ikọ ọnọ mme andikpep mmọ.

Ke ẹma ẹkekop se ẹnamde an̄wan̄a oro, mme andikpep ẹma ẹnam ndutịm ẹnọ edifiak nsobo, emi Barak edikemede nditịn̄ ikọ nnọ ofụri mbonutom ke ufọkn̄wed oro. Ke edisobo emi, Barak ama etịn̄ mme n̄kpọ oro ẹwụtde se Halloween enen̄erede edi. Enye akada ntọt esie oto nsio nsio n̄wed Watch Tower ọkọrọ ye mme n̄wed efen. Mme andikpep ye mme anam ndutịm ẹma ẹdu ke n̄kpaidem ke se mmọ ẹkekopde ẹban̄a ntọn̄ọ, mbụk, ye idaha ido ukpono usọrọ oro. Mmọ ẹma ẹmek ndinyene mbono ye mbonutom ndibiere nte ẹdisede ẹban̄a idaha oro.

Usen ifan̄ ke ukperedem, ẹma ẹtọt ubiere oro owo mîkodorike enyịn emi ẹkesịmde. Ẹma ẹbiat kpukpru mben̄eidem oro ẹkenamde ẹnọ Halloween ẹfep. Ufọkn̄wed oro ikakam inịmke usọrọ Halloween isua oro. Nso eti utịp ikosụn̄ọ ntem ito ubiere mme uyen Ntiense ẹmi ndinam se inende ke ufọkn̄wed! Iyomke n̄kpri owo ẹkop ndịk m̀mê bụt ndisọn̄ọ nda nnọ akpanikọ Bible.

Ke ofụri ererimbot, Mme Ntiense Jehovah ẹkpep nditọ mmọ ndinam utom ọkpọsọn̄ ke ufọkn̄wed. Ẹnọ n̄ko mme uyen Ntiense ukpep ndida mme edumbet Bible ndu uwem nnyụn̄ mbuana idotenyịn mmọ ye se mmọ ẹnịmde ke akpanikọ ye nditọ ufọkn̄wed eken nte mmọ ẹnyenede ifet. Idem ke ini mme utịp mîfọnke mînyụn̄ idịghe ke ndondo oro nte ekedide ke idaha enyeemi, n̄kpri owo ẹkeme ndinyene mbuọtidem ye uyụhọ oro otode ke ndinam se inende. Ndien ke edide akpan n̄kpọ akan, mmọ ẹkeme ndinịm ke akpanikọ nte ke Ete mmọ eke heaven enem esịt oyonyụn̄ ọdiọn̄ mmọ ke n̄kopitem edinam akpanikọ mmọ.

[Ikọ idakisọn̄]