Mmanie Ẹdidi Mme Ọkwọrọikọ?

KE Mbono Esop Ufọkabasi Ofụri Ererimbot ẹkenịmde ke n̄kpọ nte isua 40 ẹmi ẹkebede, ẹma ẹkpak mme andibuana ẹte “ẹdaha ẹda ye edu ukwọrọikọ” ẹnyụn̄ ẹkpep otuerọn̄ mmọ “ndiwọrọ nsan̄a n̄kwọrọ ikọ.” Isua ition ke ukperedem John A. O’Brien, ọkwọrọ ederi Catholic, ama ewet aban̄a ediyom oro oyomde ẹtan̄ mbufa mbet ẹdi “ebe ke ndiwọrọ mbịne mmọ” inyụn̄ idịghe n̄kukụre “ke nditie ke ufọk nnyịn.” Ndien ke January 1994, Pope John Paul II ama etịn̄ ete ke emi “idịghe ini ndikop bụt mban̄a Eti Mbụk, edi, edi ini ndida ke enyọn̄ọkọm n̄kwọrọ ikọ.”

Etie nte owo iyereke ikot emi ẹnọde ẹyom mme ọkwọrọikọ ke ini ke ini mi. Ibuotikọ kiet ke n̄wedmbụk n̄kpọntịbe Australia oro Illawarra Mercury ọkọdọhọ ete: “Mme ọwọrọiso mbon Catholic eke Mbenesụk Edem Edere inyeneke udọn̄ ndinam n̄kpọ ke ukem usụn̄ oro Mme Ntiense Jehovah ẹnamde kaban̄a mbuọtidem mmọ.” Owo kiet ọkọdọhọ ete ke ukwọrọikọ ikam “idịghe ekikere Catholic.” Owo efen ọnọ ekikere ete: “Ọfọn Ufọkabasi emenede itie esie, edi idịghe ke ndisikọn̄ usụn̄ufọk. Ekeme ndidi ndinịm mme ufọkn̄wed m̀mê ndinọ mme leta ẹwọrọ ẹyefọn ẹkan.” Idem oku akwa ufọkederi kiet iketịmke ifiọk nte akpanamde mme ikọ pope ẹmi ẹn̄wan̄a. Enye ọkọdọhọ ete: “Nnyịn iyesịn udọn̄ inọ mme owo ndinanam Gospel emi mmọ ẹfiọkde ke uwem mmọ. Edide oro ọwọrọ ndisikọn̄ usụn̄ufọk ami nyomke nditịn̄.” Akpan ibuotikọ ke n̄wedmbụk esịn enye ibio ibio ke ediye usụn̄ ete: “Mbon Catholic idinamke item Pope emi ọdọhọde ẹkwọrọ ikọ.”

Kpa ye oro Christendom okpude ndikwọrọ ikọ, Mme Ntiense Jehovah ẹwakde ẹbe miliọn ition ke ẹnam ewụhọ Jesus nte “ẹka ẹkanam kpukpru mme idụt edi mbet.” (Matthew 28:19, 20; men Utom 5:42 domo.) Ẹnam utom edikwọrọ ikọ mmọ to ke enyịnusụn̄ sịm enyịnusụn̄ idahaemi ke se iwakde ikan idụt 230. Etop oro mmọ ẹnọde edi in̄wan̄în̄wan̄, owụtde mme utịbe utịbe un̄wọn̄ọ Bible kaban̄a ini iso. Ntak mûnyeneke nneme ye mmọ ini efen oro mmọ ẹwahade?