N̄kponn̄kan Esopikpe Connecticut Ọsọn̄ọ Unen Owo Udọn̄ọ
Ke April 16, 1996, N̄kponn̄kan Esopikpe Connecticut, U.S.A., ama ọsọn̄ọ unen oro Mme Ntiense Jehovah ẹnyenede ndisịn edikịm iyịp nsịn ke idem. Ubiere emi ama abiat mbemiso ubiere oro akpa esopikpe ọkọnọde.
Ke August 1994, Nelly Vega, kiet ke otu Mme Ntiense Jehovah, ama ọtọn̄ọ ndinyene ọkpọsọn̄ uwọrọiyịp ke ama akaman akpa eyen esie. Ukeme oro ẹkesịnde ndinam uwọrọiyịp esie etre ọkọwọrọ ikpîkpu. Nte idaha Mma Vega eketịmde-tịm ọdiọk, ufọkibọk ama oyom unyịme oto esopikpe oro ọkọnọde odudu ndinọ edikịm iyịp. Mma Vega ama esesịn ubọk ke n̄wed ubiomode mbiausọbọ mbiomo etemede ete owo okûda iyịp m̀mê n̄kpọ ndomokiet oro ẹdade iyịp ẹnam ẹsọbọ imọ ke ofụri ini oro ididude ke ufọkibọk, ke ntre obiomorede ufọkibọk mbiomo ke se ededi oro ubiere esie edidade ikosụn̄ọ. Kpa ye oro, ufọkibọk oro ama afan̄a ete ke ndinyịk enye ọbọ edikịm iyịp edi ndinam n̄kpọ ke akakan ufọn nsekeyen, emi, nte ufọkibọk ọkọdọhọde, oyomde eka esie. Akpa esopikpe oro ama ekere n̄ko ete, ke ẹsiode iyịp esie ndisụhọde ẹfep, Mma Vega ekedi akparawa an̄wan, emi enyenede nsọn̄idem. Ntem, kpa ye oro ebe Mma Vega ye ekpeibet esie ẹkefan̄ade, esopikpe ama ọnọ ewụhọ ndien ẹma ẹkịm iyịp ẹsịn enye ke idem.
Nte ini akakade, ẹma ẹda ikpe oro ẹka N̄kponn̄kan Esopikpe Connecticut. Do, ẹma ẹbiere ke unyịme kpukpru owo ẹte ke edinam ufọkibọk oro ama abiat unen Mma Vega. Ubiereikpe oro ọkọdọhọ ete: “Ikpe oro ke akpa esopikpe akada itie ke ufọt okoneyo, ke ata mbabuat idaha oro mîkọfọnke ikem inọ edem mbiba ndinọ mfan̄a mmọ ọyọhọ ọyọhọ.”
Ubiereikpe N̄kponn̄kan Esopikpe Connecticut emi edi akpan n̄kpọ ọnọ mbon efen n̄ko ke ẹsiode Mme Ntiense Jehovah ẹfep. Donald T. Ridley, ekpeibet Mma Vega, ọdọhọ ete: “Enye edi akpan n̄kpọ ọnọ kpukpru mbon udọn̄ọ ẹmi mîdinyịmeke ye ubiere mme dọkta mmọ. Ubiereikpe emi ayakpan mme ufọkibọk ndikara mme edumbet mbon udọn̄ọ, edide eke ido ukpono m̀mê eke ererimbot.”